ەكى كۇنگە جوسپارلانعان يگىلىكتى ءىستىڭ ءبىرىنشى كۇنى عىلىمي-پراكتيكالىق كونفەرەنتسيا بولدى. العاشقى ءسوزدى اۋدان اكىمى ش.نۋراحۋنوۆ الىپ, بۇل اتاۋلى مەرەكە ەلباسىنىڭ رۋحاني جاڭعىرۋ يدەياسى نەگىزىندە ۇكىمەتتىڭ ارنايى قاۋلىسى شىققانىن اتاپ, اباي الەمىنە شولۋ جاساپ, قىسقا عۇمىرىندا مول مۇرا قالدىرعان ءانشى-كومپوزيتوردىڭ اۋەزدى انىنە, سازدى سوزىنە توقتالىپ, وسى ەلدىك جۇمىستىڭ كەڭ كولەمدە اتالىپ وتۋىنە قامقورلىق جاساعان ازاماتتاردىڭ قاتارىندا مەملەكەتتىك سىيلىقتىڭ لاۋرەاتى, اقىن-دراماتۋرگ ن.ءورازاليننىڭ, الماتى وبلىسىنىڭ اكىمى ا.باتالوۆتىڭ, بەلگىلى مەتسەنات س.بەلعوجاەۆتىڭ, ەل اعالارى ى.بەكتۇرسىنوۆتىڭ, ت.ەستەنوۆتىڭ, ن.ەسجاننىڭ, تاعى باسقا جاناشىرلاردىڭ بولعانىن اتاپ ريزالىعىن ءبىلدىردى.
«حالىقتىڭ ءانى كەتسە, ادەبيەتى جەسىر قالادى, ءسانى كەتەدى, ءسانى كەتسە, جانى كەتەدى» دەگەن جىر جاسىنى س.تورايعىروۆتىڭ قاناتتى سوزىنەن وي وربىتكەن, مەملەكەتتىك سىيلىقتىڭ لاۋرەاتى, جازۋشى ب.نۇرجەكە ۇلى ءان مەن ءسوزىنىڭ ۇمىتىلماۋى ناعىز تالانتقا ءتان قاسيەت ەكەنىنە دايەكتەر كەلتىرىپ, «سارى بيدايدى» قوسقاندا, ارتىنا جەتى ءان-مۇراسىن قالدىرعان سادىقوجا تۋىندىلارى عىلىمي دايەكتەلگەنىن, جالپى قاي باستامانىڭ دا ارقاۋىن عىلىممەن تياناقتالۋىن اتاپ, جەتى ءان ەمەس ءبىر عانا «بالاسى باسىعارا قاناپيا» دەپ كەلەتىن ءبىر انىمەن تاريحتا قالعان قاناپيانى مىسالعا كەلتىردى.
سادىقوجانىڭ اۋەزدى ءانى مەن ءنارلى ءسوزى تۋرالى «انا ءتىلى» ۇلت اپتالىعىنىڭ باس رەداكتورى, تالانتتى اقىن ج.ءاشىمجان جان-جاقتى اڭگىمە قوزعاپ, ولەڭ سوزدەرىندەگى تۇنىپ تۇرعان ليريكاعا ەرەكشە ءمان بەردى.
جەتىسۋ ءان-ولەڭى مەن كۇيىن زەردەلى زەرتتەپ جۇرگەن زەرەك عالىم قازمۇۋ-دىڭ جۋرناليستيكا فاكۋلتەتىنىڭ دەكانى س.مەدەۋبەك ۇلى سادىقوجا شىعارماشىلىعىنا بويلاپ بارىپ, ءار ءسوزىن ءان اۋەنىمەن بەكىتىپ, «اق تاماقتان ەمىنتىپ ءبىر يىسكەتسەڭ, اينالسوقتاپ قاسىڭنان كەتەمىن بە», «ات ارىلتىپ الىستان بارعانىمدا, اقمارالداي كەرىلىپ شىقساڭ شىركىن» دەگەن ءنارلى ولەڭ جولدارىن مىسالعا كەلتىردى. سول سەكىلدى بۇرىن قىزىل بيداي, ءبىر بيداي دەگەن تىركەستەردىڭ بولعانىن, ال سارى بيداي سادىقوجا قوسقان تىڭ ءسوز ەكەنىن العا تارتتى.
ال اتالمىش ءانشى كومپوزيتوردىڭ العاشقى ءىزاشارى بولعان تۋىندىلارىن تۇڭعىش ورىنداعان پروفەسسور ق.الپىسباەۆ سادىقوجا اقان, ءبىرجان, ەستاي, اسەت, كەنەن اندەرىنىڭ ءداستۇرىن جالعاستىرۋشى ەكەنىنە دايەكتەر كەلتىرىپ, جەتى ءاننىڭ تاريحىنا توقتالىپ, العاش وزىمەن قاتارلاسا ورىنداعان م.شاپيەۆ, ج.مىرقاەۆ ەكەنىن دە ەسكە سالىپ ءوتتى. ول سادىقوجا اندەرىنىڭ تاعىلىمدى ەكەنىن دە تىلگە تيەك ەتتى. كونفەرەنتسيادا ونەرتانۋ عىلىمدارىنىڭ كانديداتى ءا.سابىرەۆا, فيلولوگيا عىلىمدارىنىڭ كانديداتى ت.الىبەك, ولكەتانۋشى س.اعىباەۆ موشان ۇلىنىڭ مول مۇراسىن ءار قىرىنان كورسەتتى.
ەكىنشى كۇنگى سالتاناتتى ءراسىم وتكەن عاسىردىڭ 30-جىلدارىنداعى ويراننان شەكارا اسىپ كەتىپ, وندا دا تاعدىردىڭ تاۋقىمەتىن از تارتپاعان ازامات وردا بۇزارعا وتىزعا جەتپەي ومىردەن وزسا دا, ارتىندا مول مۇرا قالدىرعان ونىڭ كىندىك قانى تامعان ء«بىزدىڭ اۋىل كەتپەننىڭ ەتەگىندە» دەپ ءان اۋەلەتكەن, «كەتپەن» اۋىلىندا جالعاستى. قازاقستان جازۋشىلار وداعى باسقارما توراعاسىنىڭ ورىنباسارى, دارىندى اقىن ب.بەدەلحاننىڭ تولعاۋى نەگىزىندە قويىلىم كورسەتىلىپ, سادىقوجانىڭ ەڭسەلى ءمۇسىنىنىڭ اشىلۋى بولدى. حان-ءتاڭىرىنىڭ ءبىر شىڭىنداي بيىك مۇسىنگە قارجىنى پروفەسسور ق.الپىسباەۆتىڭ بالاسى ەدىگە قۇنىپيا ۇلى كوتەرسە, تاسقا قاشالعان تۇلعا بەينەسىنىڭ اۆتورى باقتيار قايرانباەۆ ەكەن. ۇلت اسىلىن ۇلىقتاعان ازاماتتار جاڭا زامان جاستارى, ولاردىڭ بۇل ەڭبەگىن اۋىلداستارى جوعارى باعالاپ, استارىنا كىلەم جاپقان ات مىنگىزدى.
اۋىل ورتاسىنداعى جاپ-جاسىل الاڭعا ءارلى ساحنا ورناتىپ, اينالاسىنا اق شاڭقان ۇيلەر تىگىلگەن ەكەن. قاراپايىم حالىقتىڭ ديدارىنداعى سەرپىلىس, كوڭىلىندەگى قۇلشىنىس, اسىلىنا دەگەن ءىلتيپات ەرەكشە كورىندى. ۇلكەن-كىشى ءبىر كىسىدەي جۇمىلىپ ءجۇر.
كەلىستى ساحنادا سادىقوجا اندەرىن قازاقستاننىڭ حالىق ءارتىسى ن.ءنۇسىپجانوۆ, قازاقستاننىڭ ەڭبەك سىڭىرگەن قايراتكەرلەرى ر.ستامعازيەۆ, ن.جانپەيىسوۆ, ە.شالدىبەكوۆ, وزگە دە انشىلەر كەلىستىرە ورىنداپ, جۇرتتىڭ العىسىن الدى. ەل ىشىندەگى ونەرلى ورەندەر دە ارناۋ-تولعاۋلارىن وقىپ, اندەرىن اۋەلەتتى.
رۋحاني تاعىلىمى مول قۇرمەتتىڭ جالعاسى قۇران باعىشتالعان اس داستارقانىندا ۇلاستى.
«باسقا حالىقتار مايمىلدان جاراتىلدى دەگەن ءدارۆيننىڭ ىلىمىنە تالاسپايمىن. قازاقتىڭ جىلقىدان جاراتىلعانىنا ەش كۇمان كەلتىرمەيمىن» دەپ كەڭەستىك كەزەڭدە ۇلت مىنەزىن استارلاپ ايتقان بولمىسى بولەك قالامگەر اسقار سۇلەيمەنوۆ سوزىنە باقساق, مۇنداي يگىلىكتى ءىس قاشان ات بايگەسىز ءوتىپ ەدى. ءۇيسىنتاۋدىڭ ەتەگىندە كەرەمەت ات جارىسى بولدى. ونەر قۇدىرەتى رۋحىن كوتەرگەن قالىڭ جۇرت بايگە الاڭىنا كەلگەندە, ءتىپتى ارقالانىپ, قيقۋلاي جونەلدى. جۇزدەن جۇيرىك شىققان تۇلپاردىڭ يەسى «نيۆا» كولىگىن تىزگىندەسە, وزگە سايىپقىران جۇيرىك يەلەرى دە سىي-سىياپاتسىز قالعان جوق.
سونىمەن «ەسىڭە ال, ەسكەر مەنى» دەپ كەيىنگىگە ءۇمىت ارتىپ كەتكەن سادىقوجانىڭ جۇزجىلدىعىن ەل ەسىنە الدى, ەل ەسكەردى. ول بۇگىنگىنىڭ اتقارعان ابزال ءىسى, كەيىنگىگە قالدىرعان ۇلگىسى دەپ بىلەمىز.
سۇلەيمەن مامەت,
«Egemen Qazaqstan»
