سپورت • 09 قازان، 2019

الەمدىك رەيتينگتىڭ ۇزدىكتەر ساناتىندا ءۇش ورەنىمىز بار

35 رەتكورسەتىلدى

بۇل كۇندەرى دزيۋدو سالاسىنىڭ مايتالمان ماماندارىنان باستاپ، قاتارداعى قاراپايىم كورەرمەنگە دەيىن ءاربىر ءدۇبىرلى دودا اياقتالعان سايىن جاڭارىپ تۇراتىن الەمدىك رەيتينگكە ۇنەمى ۇڭىلۋدە. سەبەبى كەلەسى جىلى جاپونيا استاناسىندا الاۋى تۇتاناتىن XXXIII جازعى وليمپيا ويىندارىنا قاتىساتىن بالۋاندار تەك وسى ءتىزىم ارقىلى انىقتالادى. ياعني، ايتۋلى رەيتينگتە بارىنشا جوعارى تۇرعان سپورتشىلاردىڭ توكيو تاتاميىنە تابانى تيۋ مۇمكىندىگى سوعۇرلىم ارتا تۇسەدى. مىنە، بارلىق گاپ وسىندا.

اڭگىمەمىزدىڭ القيسساسىن ەرلەردىڭ الەمدىك رەيتينگىنەن باستاساق. بۇگىنگى تاڭدا «توپ-10» دزيۋدوشىنىڭ ساناتىنا قازاقستاننىڭ ءۇش بالۋانى ەنىپ وتىر. ەڭ ۇزدىك ناتيجە ايگىلى ەلدوس سمەتوۆكە تيەسىلى. 60 كيلو سالماق دارەجەسىندە بەلدەسەتىن قانداسىمىز ءتورتىنشى ورىندى يەلەنۋدە. ارينە وعان تاڭدانۋعا بولماس. ويتكەنى عالىمجان جىلكەلديەۆتىڭ شاكىرتى ءوزى قاتىسقان جارىستاردىڭ كوبىنەن ولجالى ورالىپ ءجۇر. سوڭعى رەت ول تامىز ايىنىڭ سوڭىندا توكيودا وتكەن الەم چەمپيوناتىندا قولا مەدالدى موينىنا ءىلدى. ءدال سول سالماقتا كۇش سىناسىپ جۇرگەن عۇسمان قىرعىزباەۆ ۇزدىك وندىقتى قورىتىندىلاپ تۇر. ول بيىلعى دۇنيەجۇزىلىك دودادا بەسىنشى ساتىعا تابان تىرەدى. ال 66 كيلو سالماقتا كۇرەسەتىن ەرلان سەرىكجانوۆ توعىزىنشى ورىنعا تۇراقتادى. مىنە، بۇگىنگى تاڭداعى ەلىمىزدىڭ ەڭ ۇزدىكتەرى – وسى دزيۋدوشىلار.

ەلدوس سمەتوۆ، ەرلان سەرىكجانوۆ جانە عۇسمان قىرعىزباەۆتان بولەك، ەلدوس جۇماحانوۆ (66 كيلو)، يسلام بوزباەۆ (90 كيلو) جانە ديدار حامزا (81 كيلو) سىندى قىراندارىمىزدىڭ دا قادامى ءتاۋىر. ءيا، بۇل قانداستارىمىزدىڭ بيىلعى الەم چەمپيوناتىندا وتە ناشار ونەر كورسەتكەنى راس. بارلىعى دا العاشقى اينالىمداردان اسا المادى. الايدا، سوعان قاراماستان وسىعان دەيىنگى جارىستاردا جيعان ۇپاي قورلارىنىڭ ارقاسىندا ولار بۇل كۇندەرى «توپ-20» بالۋاننىڭ قاتارىنا قوسىلىپ وتىر. ناقتىلاپ ايتساق، الەمدىك رەيتينگتە ەلدوس پەن يسلام – 11 جانە ديدار 18-ورىنداردى ەنشىلەۋدە.

جوعارىداعى جايتتاردى سارالاي كەلە، 60 جانە 66 كيلو سالماق دارەجەلەرىندە ونەر كورسەتىپ جۇرگەن ورەندەرىمىزدىڭ ونەرى كوپشىلىك كوڭىلىنەن شىعۋدا دەپ ايتا الامىز. سەبەبى سمەتوۆ پەن قىرعىزباەۆ جانە سەرىكجانوۆ پەن جۇماحانوۆ ءتۇرلى الاماندا ۇزەڭگى قاعىستىرىپ، ءبىر-بىرىنەن قالىسپاي كەلەدى. بارلىعىنىڭ كوزدەگەنى – وليمپيادا جولداماسى. ەگەر توكيوداعى جارىستا ءار سالماقتا ءبىر-ءبىر بالۋاننان عانا باق سىنايتىنىن ەسكەرسەك، وندا ولاردىڭ الداعى ۋاقىتتا نامىستارىن قامشىلاي تۇسەتىنى انىق. سول سەكىلدى 81 جانە 90 كيلو سالماق دارەجەلەرىندەگى جاعدايىمىز دا جامان ەمەس. ايتەۋىر حامزا مەن بوزباەۆ سىندى سايىپقىراندارىمىز ءتۇرلى جارىستاردا جۇلدە الىپ، كوشتەن قالماي كەلەدى.

ءداپ قازىر ءبىزدى 73 كيلو سالماقتاعى جاعداي قاتتى الاڭداتادى. وسىعان دەيىن ءتاپ-ءتاۋىر كۇرەسىپ جۇرگەن جانساي سماعۇ­لوۆ­تىڭ قارقىنى ۋاقىت وزعان سايىن باسەڭ­دەپ بارادى. جاۋاپتى جارىستاردا ءجيى ۇتىلىپ جۇرگەن قازاق دزيۋدوشىسى قازىرگى كەزدە نەبارى 22 ورىندى قاناعات تۇتۋدا.

ال 100 جانە +100 كيلو سالماقتاعى جاعدايىمىز تىپتەن مۇشكىل. شىنى كەرەك، قازىرگى كەزدە وسى سالماق دارەجەلەرىندە حالىقارالىق دودالاردا ەل نامىسىن ابىرويلى قورعاۋعا كۇش-قۋاتى مەن الەۋەتى جەتەتىن بىردە-ءبىر بالۋاندى كورە الماي وتىرمىز. قازاقستاننىڭ ەڭ بەلدى دەگەن بالۋاندارىنىڭ وزدەرى قالىڭ توپتىڭ اراسىندا قالىپ قويۋدا. ماسەلەن، بۇگىنگى تاڭدا ەراسىل قاجىباەۆ (+100 كيلو) – 33-ورىنعا جانە ۆيكتور دەميانەنكو (100 كيلو) 45-ساتىعا تابان تىرەپ تۇر.

بۇگىنگى تاڭدا الەمدىك رەيتينگتە گرۋزيانىڭ قوس بىردەي الىبى جەكە-دارا كوش باستاپ تۇر. تارقاتىپ ايتساق، ريو وليمپياداسىندا كۇمىس مەدالدى يەلەنىپ، الەم چەمپيوناتىندا بەس مارتە جەڭىس تۇعىرىنا كوتەرىلگەن 30 جاستاعى ۆارلام ليپارتەلياني 100 كيلو سالماقتا الدىنا جان سالار ەمەس. ال الەم جانە قۇرلىق چەمپيونى، ەۋروپا ويىندارىنىڭ جەڭىمپازى دەگەن دارداي اتاعى بار 24 جاستاعى گۋرام تۋشيشۆيلي +100 كيلو سالماق دارەجەسىندە دارالانۋدا.

90 كيلو سالماقتا نيكولوز شەرازا­ديش­ۆيلي شاشاسىنا شاڭ جۇقتىرماي كەلەدى. 23 جاستاعى بالۋان پيرەنەي تۇبە­گىندە تۇرىپ، سول ەلدىڭ نامىسىن قورعاپ جۇرگەنىمەن، ونىڭ تەگى – گرۋزين. كەزىن­دە اتا-اناسىمەن بىرگە ول يسپانياعا قونىس اۋدارعان. اينالدىرعان بەس جىل ارالى­عىندا نيكولوز اۋىز تولتىرىپ ايتار­لىقتاي تابىسقا قول جەتكىزىپ وتىر. ول – 2018 جىلعى الەم چەمپيونى جانە ەۋروپا بىرىنشىلىگىنىڭ قولا جۇلدەگەرى.

73 كيلو سالماق دارەجەسىندە قاپ تاۋى­نىڭ تاعى ءبىر قىرانى رۋستام ورۋدجەۆتىڭ الدىنا تۇسەر ەشكىم تابىلار ەمەس. 27 جاستاعى ازەربايجان بالۋانىنىڭ ريو وليمپياداسى مەن الەم چەمپيوناتىنىڭ ەكى دۇركىن كۇمىس جۇلدەگەرى جانە ەۋروپا چەمپيونى دەگەن اتاقتارى بار.

81 كيلو سالماقتا ءيزرايلدىڭ وكىلى سا­گي مۋكيدىڭ مەرەيى ۇستەم. ول دا 27 جاستا. مۋ­كي 2015 جىلى ەۋروپا ويىندارىندا، 2018 جىلى قۇرلىق بىرىنشىلىگىندە جانە 2019 جىلى الەم چەمپيوناتىندا توپ جاردى.

دزيۋدو كۇرەسىنىڭ وتانى – جاپونيا ەكەنى بارشاعا ءمالىم. الايدا، سول ەلدىڭ ءبىر عانا تاتامي شەبەرىنە ءداپ وسى كۇندەرى الەمدىك رەيتينگتە كوش باستاۋ باقىتى بۇيىرعان ەكەن. ول – دجۋشيرو مارۋيامو. توكيوداعى الەمدىك دودادا دارا شىققان 26 جاستاعى كۇنشىعىس ەلىنىڭ وكىلى 66 كيلو سالماق دارەجەسىنىڭ ۇزدىگى اتانىپ وتىر.

60 كيلو سالماقتا وزبەكستاننىڭ ورەنى شارافۋددين لۋتفۋللاەۆتىڭ تەگەۋرىنى كۇشتى. وسىعان دەيىن ديوربەك ۋروزبوەۆتىڭ كولەڭكەسىندە قالىپ جۇرگەن 29 جاستاعى بالۋان بيىلعى الەم چەمپيوناتىندا ءوزىن كەرەمەت قىرىنان كورسەتىپ، كۇمىس مەدالدى كەۋدەسىندە جارقىراتتى. سونىڭ ناتيجەسىندە لۋتفۋللاەۆ الەمدىك رەيتينگتە ءبىرىنشى ورىنعا كوتەرىلدى.

ال «توپ-10» دزيۋدوشىنىڭ قاتارىندا قاي مەملەكەت وكىلدەرىنىڭ قاراسى مول ەكەنى جايىندا ايتار بولساق، جاپونيا قۇراماسى وزگەلەردەن كوشى ىلگەرى. ۇزدىكتەر تىزىمىندە كۇنشىعىس ەلىنىڭ 10 ساڭلاعى بار. ەكىنشى جانە ءۇشىنشى ورىنداردا – گرۋزيا مەن يزرايل. قاپ تاۋىنىڭ – جەتى جانە ءيزرايلدىڭ التى تاتامي شەبەرى مىقتىلار ساناتىندا.

سوڭعى جاڭالىقتار

ۇقساس جاڭالىقتار