قوعام • 09 قازان، 2019

«مۋزىكانى كورىپ، ءبيدى ەستۋ»

26 رەتكورسەتىلدى

استانا بالەت» امەريكالىق حورەوگرافيا جاۋھارلارىن كورسەتتى. قازان ايىنىڭ العاشقى كۇندەرى «استانا بالەت» تەاترىندا امەريكالىق بالەت كەشى ءوتىپ، بيىلعى ماۋسىمنىڭ پرەمەراسى – دجوردج ءبالانچيننىڭ «كونچەرتو باروككو» اتتى ءبىر اكتىلى بالەتىمەن اشىلدى. بالەتتى ماەسترونىڭ ءوز شاكىرتى – نانەتت گلۋشاك قويىپ وتىر. پرەمەراعا دايىندالۋ ءۇشىن، ول ەلىمىزگە ءۇش اپتا بۇرىن كەلگەن. حورەوگرافتىڭ ايتۋىنشا، ارتىستەر بار بولعانى ءتورت كۇن ىشىندە حورەوگرافيالىق ءماتىندى مەڭگەرىپ العان.

 

 «بالەتتى وسىنشالىقتى قىسقا مەر­زىم ىشىندە مەڭگەرۋ – مەن ءۇشىن ۇل­كەن جاڭالىق. سوندىقتان فرانتسۋزدار ايت­پاقشى: شلياپامدى شەشەمىن، سىزدەرشە: باسىمدى يەمىن»، – دەيدى نانەتت گلۋشاك.

ەكىنشى جانە ءۇشىنشى بولىمدە كورەر­مەن قاۋىم، تەاتر رەپەرتۋارىنداعى دجوردج ءبالانچيننىڭ «سەرەناداسى» مەن نيكولو فونتەنىڭ «ماحابباتتىڭ عايىپ بول­عان دارابوزدارى» تۋىندىلارىن تاماشالادى.

«كونچەرتو باروككوداعى» باحتىڭ مۋزىكاسى جايلى ايتساق، ءبي­شىنىڭ ءار قي­مى­لى تۋىن­­دى­نىڭ ءار نوتاسىنا سايكەس كەلەدى. ال «سە­­رەناداداعى» چايكوۆسكيدىڭ مۋزىكاسى امبەگە ايان. كورەرمەن قۇلاعى ۇيرەنگەن تۋىندىنى ءبىز وزگەشە قىرىنان تانىتۋعا كۇش سالامىز»، – دەيدى قويۋشى-ديريجەر ارمان ورازعاليەۆ.

«كونچەرتو باروككو» بالەتى «مۋزىكانى كورىپ، ءبيدى ەستۋ» تەزيسىنە تولىق جاۋاپ بەرەدى. ەكى سوليست – تاتيانا تەن مەن نازەركە ايمۇحامەتوۆا، ور­كەستردىڭ جەتەكشى سكريپكالارىن سيپات­تاعانداي اسەرگە بولەپ، ولاردىڭ اۋەنىنە سەگىز كوريفەي ەلىتىپ، باحتىڭ مۋزىكا يىرىمدەرىن بي كومبيناتسيالارى ارقىلى پاش ەتتى. بالەتتەگى جالعىز ەر ادام  پارتياسىن فارحات بوريەۆ ورىندادى. ول ساحناداعى «سكريپكانى» قولعا العان ونەرلى مۋ­زىكانتتىڭ بەينەسىن سومدادى.

«العاشقى كۇنى ارتىستەرگە – وسى با­لەتتەن سوڭ، دەمالاسىڭدار، دەگەن ەدىم. ولار توقتاماي بيلەپ، اياعىندا، شارشاعاندىقتان، ەدەنگە جانتايىپ جاتا قالاتىن. بىراق قازىر وسىنىڭ ارقاسىندا الدەنەشە ەسە كۇش جينادى. ەستەرىڭىزدە بولسىن، وسى عالاماتتى شىعارۋعا ءۇش اپتادان كەم ۋاقىت بولىنگەن. ءوز باسىم، تاڭىرقاپ تۇرمىن»، – دەيدى نانەتت گلۋشاك.

قويۋشى-حورەوگرافتىڭ ايتۋىنشا، سىرت كوزگە قاراپايىم كورىنەتىن با­لەتتى تەحنيكالىق تۇرعىدان ورىنداۋ وتە كۇردەلى. دەكوراتسياسى جوق ساحنا­دا ارتىستەر جيىرما مينۋت بويى ۇز­دىكسىز بيلەپ، ءبىر ءسات تە قيمىلسىز قال­مايدى. حورەوگرافياسىنىڭ ءوزى قا­تەلىك جاساۋعا جول بەرمەيدى: قيمىل، ورىن اۋىس­تىرۋ، توپتاسىپ بيلەۋ سىندى قي­مىلدار ءمىنسىز ۇيلەسىمدى تالاپ ەتە­دى. ار­تىستەر وسى تالاپ­­تىڭ ۇدەسىنەن شىق­تى.

استانالىق كورەرمەن جاڭا قويىلىمعا قوشەمەتىن ءبىلدىرىپ جاتتى. ال سپەكتاكل اياقتالعان سوڭ، تەاتر فويەسىندە «استانا بالەتتىڭ» جەتەكشى سوليستەرى قولتاڭبا بەرىپ، كورەرمەندەرىمەن جۇزدەستى.

«كونچەرتو باروككو» پرەمەراسى با­لانچين قورىمەن بىرلەسە وتىرىپ قويىلعان ءارى حورەوگرافتىڭ ءستيلى مەن تەحنيكاسىنىڭ ستاندارتتارىنا ساي جاسالعان.

سوڭعى جاڭالىقتار

ۇقساس جاڭالىقتار