«حالىق ارەنادا» وتەتىن ءدۇبىرلى دودادا الەكسەي ميشين, ەتەري تۋتبەريدزە, ەلەنا ۆودورەزوۆا سىندى الەمگە ايگىلى باپكەرلەردىڭ ۇزدىك شاكىرتتەرى ونەر كورسەتەدى. وسى شاراعا يۋكو كاۆاگۋتي مەن الەكساندر سميرنوۆ باستاعان مانەرلەپ سىرعاناۋ سپورتىنىڭ ءبىر شوعىر جۇلدىزدارى قۇرمەتتى قوناق رەتىندە ارنايى شاقىرىلىپ وتىر.
«دەنيس تەننىڭ قورى» قوعامدىق قورىنىڭ ۇيىمداستىرۋىمەن وتەتىن ءتۋرنيردىڭ جۇلدە قورى دا قوماقتى. اتاپ ايتساق, ەرلەر مەن ايەلدەر اراسىنداعى سايىستا باس جۇلدە ولجالاعان سپورتشىلار 5 مىڭ اقش دوللارىن قالتاعا باسسا, كۇمىس جانە قولا جۇلدەگەرلەر $3,5 مىڭ جانە $2 مىڭدى ەنشىلەيدى. سپورتتىق بي جانە جۇپتىق باسەكەدە جەڭىس تۇعىرىنا كوتەرىلگەن ورەندەر $7 مىڭ, $5 مىڭ جانە $3 مىڭعا يەلىك ەتەدى. سونىمەن قاتار, جاستار بۋىنى اراسىنداعى جارىستا دارالانعاندار دا ەلدەرىنە قۇرالاقان قايتپايدى.
قىسقا عانا عۇمىرىندا كوپتەگەن بيىك بەلەستەردى باعىندىرىپ, تالاي يگى ىستەردىڭ باسى-قاسىندا جۇرگەن دەنيس بىلتىرعى جىلدىڭ جازىندا الماتى قالاسىندا قاندىقول قاراقشىلاردىڭ قولىنان قازا تاپتى. ول نەبارى 25 جاستا ەدى...
