33 جاستاعى ۋكراينا بوكسشىسى قازاق جانكۇيەرلەرىنە جاقسى تانىس. دۇنيەجۇزىلىك بوكس سەرياسىنىڭ (WSB) العاشقى ماۋسىمىندا (2010-2011 جىلدارى) يتاليانىڭ «Milano Thunders» كلۋبى ساپىندا ونەر كورسەتىپ, سول جارىستىڭ ەڭ ۇزدىك بوكسشىسىنا تيەسىلى ارنايى سىيلىقتى يەلەندى. 2012-2014 جىلدارى «استانا ارلاندارىنىڭ» نامىسىن ابىرويمەن قورعاپ, قازاقستاندىق كوماندامەن بىرگە چەمپيوندىق ءتاجدى يەلەندى. WSB دوداسىندا بارلىعى 24 كەزدەسۋ وتكىزگەن سەرگەي دەرەۆيانچەنكو ءبىر عانا باسەكەدە جەڭىلدى. قالعان 23 جەكپە-جەكتى ءوز پايداسىنا شەشتى. كەزىندە ونىڭ قازاقتىڭ ۇلى قانات يسلامدى جەڭگەنى دە جانكۇيەرلەردىڭ جادىندا.
2014 جىلى ايتۋلى بوكسشى كاسىپقويلار اراسىندا كۇش سىناسۋعا بەل بۋدى. وسى كۇنگە دەيىن 14 مارتە رينگكە كوتەرىلىپ,
13 رەت جەڭىسكە جەتتى. 10 قارسىلاسىن ەسىنەن تاندىردى. بىلتىرعى جىلدىڭ قازان ايىندا دەرەۆيانچەنكو امەريكالىق دانيەل دجەيكوبستەن جەڭىلدى.
ءوزىنىڭ سوڭعى جەكپە-جەگىن ۋكراينالىق ورەن بيىلعى جىلدىڭ ءساۋىر ايىندا گەرمانيالىق دجەك كۋلكايعا قارسى وتكىزىپ, ۇپاي سانىمەن ۇتتى.
«مەديسون سكۆەر گاردەندەگى» ايقاسقا سەرگەي دەرەۆيانچەنكونىڭ تاس-ءتۇيىن دايارلىقپەن كەلگەنى بىردەن بايقالدى. ول اتاعى جەر جارعان گەننادي گولوۆكينمەن ەش قايمىقپاي ايقاستى. ءبىرىنشى راۋندتا اشىق ايقاسقا بارعان ۋكراينانىڭ مىقتىسى اۋىر سوققى جىبەرىپ الىپ, نوكداۋنعا ءتۇستى. ونىڭ ۇستىنە جەرلەسىمىز ونىڭ قاباعىن جاردى.
دەسەك تە سەرگەيدىڭ ساعى سىنعان جوق. ول ۇنەمى شابۋىلداپ, ءبىزدىڭ بوكسشىنى شارشاتىپ, دىڭكەلەتكىسى كەلدى. بىراق گەنا دا نامىستى قولدان بەرگەن جوق. ول دا ءجيى-ءجيى سوققىلارىن جۇمساپ, قارسىلاسىنىڭ دامىلداۋىنا ەش مۇمكىندىك بەرگەن جوق.
جوعارى قارقىندا وتكەن باسەكەنىڭ ەكىنشى جارتىسىندا قوس ساڭلاق تا شارشاي باستادى. ءبىر-بىرىنە كوپتەگەن سوققى جۇمساعانىمەن, ولار كوبىنە قيىس كەتىپ جاتتى نەمەسە العاشقى راۋندتارداعىداي قۋاتتى بولمادى. 10-راۋندتا دەرەۆيانچەنكونىڭ سىلتەگەن جۇدىرىعى گولوۆكينگە ءدال ءتيىپ, تالتىرەكتەپ قالدى. بىراق ابىروي بولعاندا اياعىندا تۇردى. ودان كەيىن دە «جان الىسىپ, جان بەرىسكەن» ايقاس جالعاستى. ەكەۋى دە جانكەشتىلىكتىڭ شىنايى ۇلگىسىن كورسەتتى. باسەكە اياقتالعاننان كەيىن ءۇش تورەشىنىڭ بارلىعى دا GGG-ءدىڭ مىقتىلىعىن ءبىراۋىزدان مويىندادى – 115-112, 115-112, 114-113.
Compubox سايتى ۇسىنعان ستاتيستيكالىق مالىمەتكە جۇگىنسەك,
وسى ايقاس بارىسىندا گولوۆكين 720 سوققى جۇمساپ, سونىڭ 243-ءى قارسىلاسىنا ءدال ءتيدى. بۇل – 33,8 پايىزدىق كورسەتكىش! دەرەۆيانچەنكو 738 رەت جۇدىرىعىن سىلتەگەن ەكەن. سونىڭ 230-ى ناتيجەلى بولدى. بۇل – 31,2 پايىزدىق كورسەتكىش!
وسىلايشا, 37 جاستاعى گەننادي گولۆكين IBF جانە IBو نۇسقالارى بويىنشا الەم چەمپيونى اتاندى. بۇل – ونىڭ كاسىپقوي رينگتەگى 40-شى جەڭىسى. 35 باسەكەنى GGG نوكاۋتپەن اياقتادى. ءبىر رەت ۇتىلىپ, تاعى ءبىر جەكپە-جەكتە تەڭ ەسەپ تىركەلدى.
وسى بوكس كەشىندە جۇدىرىقتاسقان تاعى ءبىر جەرلەسىمىز ءالي احمەدوۆ امەريكالىق ەندريۋ ەرناندەستى 44 سەكۋندتا ۇرىپ قۇلاتىپ, ەكىنشى ورتا سالماقتاعى WBC International Silver نۇسقاسى بويىنشا التىن بەلبەۋىن ساقتاپ قالدى.
