قالالىق موبيلدىلىك باسقارمانىڭ مالىمەتى بويىنشا, بيىل الدىڭعى جىلدارمەن سالىستىرعاندا 4 ەسە كوپ جول سالىنادى. جاڭا الماتىدا العاش رەت جاڭا جولداردىڭ باسىم بولىگى پايدا بولادى. الاتاۋ اۋدانىنىڭ 13 ىقشام اۋدانىندا جانە تۇركسىب اۋدانىنىڭ ءبىر ىقشام اۋدانىندا 469 كوشەگە ۇزىندىعى 121 كم جول سالىنادى. مۇندا 143,5 مىڭنان استام تۇرعىن تۇرادى.
بۇل جولدار «سايالى», «العاباس-ازتم», «اقبۇلاق», «ۇلجان-2», «قاراسۋ», «كوكقاينار», «ايگەرىم-1», «ايگەرىم-2», «شاڭىراق-1», «ۇلجان-1», «ترۋدوۆيك», «دارحان-بايبەسىك», «شاڭىراق-2» جانە «جاس قانات» ىقشامدارىنا تيەسىلى.
ناتيجەسىندە بيىل الماتى جولدارىنىڭ ۇزىندىعى 4%-عا ارتادى.
بۇلاردان وزگە 149 كوشەدە ۇزىندىعى 139 كم بولاتىن جولداردى جوندەۋ جۇمىستارى اياقتالدى.
سونىمەن قاتار, ءسۇيىنباي داڭعىلىن شولوحوۆ كوشەسىنەن ب. حمەلنيتسكي كوشەسىنە دەيىن رەكونسترۋكتسيالاۋ اياقتالدى. مۇندا شولوحوۆ كوشەسىنەن سولعا قاراي بۇرىلىپ كىرەتىن 1,1 كم جول سالىندى.
جولدىڭ قوزعالىس بولىگىنە اسفالت توسەلىپ, سولعا قاراي بۇرىلىس, تروتۋارلار, ارىقتار جوندەلدى, جارىق ورناتىلدى, ينجەنەرلىك جەلىلەر اۋىستىرىلدى جانە كوگالداندىرىلدى. جول جوندەۋ جۇمىستارى تولىعىمەن اياقتالدى.
الماتى
