«تۇلعاتانۋ» دەپ اتالاتىن اۋقىمدى ۇعىمدى جۋرناليستيكانىڭ تۇتاس ءبىر تارماعىنا اينالدىرىپ, ونەر مەن مادەنيەت تاقىرىبىنا ۇزدىكسىز قالام تەربەپ, ويى مەن تانىمىن رۋحاني مۇراتتىڭ ورىندالۋى جولىندا جەلبىرەتىپ كەلە جاتقان قالي سارسەنبايدىڭ ەسىمى قازاق وقىرمانىنا كەڭىنەن تانىمال. جۋىردا عانا «KAZGOR» جوبالاۋ اكادەمياسى قالامگەردى ۇجىم ورتاسىنا ارنايى شاقىرىپ, قىزىقتى كەزدەسۋ وتكىزىپ, 60 جىلدىق مەرەيتويىمەن قۇتتىقتاپ, اكادەميك اتاعىن بەرگەن ەدى. ەندى, مىنە, سول قۋانىش سوڭىنان تاعى دا اقجولتاي حابار سۇيىنشىلەنىپ وتىر. رەسەي جاراتىلىستانۋ عىلىم اكادەمياسى پرەزيديۋمىنىڭ 2019 جىلعى قىركۇيەكتەگى №292 شەشىمىمەن قالي سارسەنباي ي.ا.بۋنين اتىنداعى كۇمىس مەدالمەن ماراپاتتالدى. عىلىم, ءبىلىم جانە مادەنيەتتى دامىتۋعا قىزمەت ەتكەن عالىمدار مەن ىزگى جۇرەكتى قايراتكەرلەردىڭ عىلىمي شىعارماشىلىق قاۋىمداستىعى رەتىندە تانىلعان رەسەي جاراتىلىستانۋ عىلىم اكادەمياسى قازاقتىڭ بەلگىلى ءسوز زەرگەرىنىڭ كوپ قىرلى جەمىستى ەڭبەگىن لايىقتى باعالاعانى – ۇلت رۋحانياتىنا كورسەتىلگەن قۇرمەت.
الماتى
