وسى سپورتتىق شاراعا وراي كەشە InterContinental Almaty قوناق ۇيىندە ءباسپاسوز ءماسليحاتى ۇيىمداستىرىلدى. كوپشىلىك الدىندا ءسوز العان قانات يسلام: «الاتاۋ باۋرايىندا وتەتىن وسىنداي كەرەمەت جارىس قارساڭىندا باس قوسىپ, جاعىمدى جاڭالىقتارىمىزبەن ءبولىسۋدى قۇپ كورىپ وتىرمىز. ءبىزدىڭ العا قويعان ءبىر عانا ماقساتىمىز بار – ءوز جەرىمىزدە وسىنداي جوعارى دەڭگەيدەگى جەكپە-جەكتەر ۇيىمداستىرۋ ارقىلى قازاقستاننىڭ كاسىپقوي بوكسىنىڭ دەڭگەيىن كوتەرۋ. وسى باعىتتا ءبىراز شارۋا اتقاردىق. بۇل رەتتە بىزگە «Qazaq Promotions» كومپانياسىنىڭ باس ديرەكتورى دارحان مۇقتاربەك كوپ قولداۋ كورسەتۋدە. ءسوز ورايى كەلگەندە, ايتۋلى ازاماتقا زور العىس بىلدىرەمىز. قازاق جاستارى اراسىندا دارىندى بىلعارى قولعاپ شەبەرلەرى جەتەرلىك. وعان كوزىمىز الدەقاشان جەتكەن. بىراق ءار سالماقتا ءبىر عانا بوكسشىنىڭ وليمپياداعا باراتىنى بەلگىلى. ال سوندا قالعاندارى نە ىستەۋ كەرەك؟ «بۇلاق كورسەڭ, كوزىن اش» دەپ اتالارىمىز تەگىن ايتپاعان. ءبىزدىڭ دە كوزدەگەنىمىز سول. دارىندى جاس ورەندەردىڭ كولەڭكەدە قالىپ قويماۋ ءۇشىن ءبىز ءوز ەلىمىزدە بوكس كەشتەرىن ءجيى وتكىزۋىمىز كەرەك. سوندا جاستاردىڭ دەڭگەيى وسەدى, قازاقستاننىڭ كاسىپقوي بوكس وركەندەيدى».
35 جاستاعى قانات يسلامنىڭ ءجۇرىپ وتكەن جولى جانكۇيەرلەردىڭ كوز الدىندا. وسى كۇنگە دەيىن كاسىپقوي رينگتە 26 كەزدەسۋ وتكىزگەن قانداسىمىز بارلىعىندا جەڭىسكە جەتىپ, 21 باسەكەنى نوكاۋتپەن اياقتادى. ول بىرنەشە نۇسقا بويىنشا التىن بەلبەۋدىڭ يەگەرى. ال ونىڭ قارسىلاسى جايىندا نە بىلەمىز؟ ۋولتەر كاۋتوندوكۆا دا 1984 جىلى دۇنيەگە كەلگەن. ول ناميبيادا تۋىپ-وسكەنمەن, بۇل كۇندەرى اقش-تىڭ تۋى استىندا ونەر كورسەتۋدە. تۇساۋكەسەر كەزدەسۋىن كاۋتوندوكۆا 2013 جىلدىڭ قىركۇيەك ايىندا وتكىزدى. بارلىعى 19 مارتە رينگكە كوتەرىلىپ, 18 رەت باسىمدىق تانىتتى. 17 قارسىلاسىن ەسىنەن تاندىردى. ءوزىنىڭ سپورتتىق كارەراسىندا ول تەك ءبىر رەت جەڭىلىستىڭ كەرمەك ءدامىن تاتتى. اتاپ ايتساق, بىلتىرعى جىلدىڭ قازان ايىندا بىرنەشە بەلدى نۇسقا بويىنشا الەم چەمپيونى اتانىپ وتىرعان اتاقتى امەريكالىق اندرادە دەمەتريۋستان ۇپاي سانىمەن عانا ۇتىلدى. قازىرگى كەزدە ۋولتەر كاۋتوندوكۆا WBO نۇسقاسى بويىنشا «توپ-10» بوكسشىنىڭ تىزىمىندە 9 ورىندا تۇر.
ءباسپاسوز ءماسليحاتىندا «Qazaq Promotions» كومپانياسىنىڭ باس ديرەكتورى دارحان مۇقتاربەك الداعى جەكپە-جەكتىڭ ماڭىزدىلىعىنا توقتالا كەلە, بۇگىنگى تاڭدا قازاقستاندا كاسىپقوي بوكستى دامىتۋ ماقساتىندا قانداي اۋقىمدى جۇمىستار اتقارىلىپ جاتقانى جايىندا كەڭىنەن باياندادى.
الماتىدا وتەتىن بوكس كەشىندە بارلىعى 10 جەكپە-جەك وتكىزىلىپ, بۇل باسەكەلەردە قازاقستاننىڭ ورەندەرىنەن بولەك, اقش, قىتاي جانە ەۋروپا ەلدەرىنەن كەلەتىن تانىمال بوكسشىلار كۇش سىناسادى. اتالعان سپورتتىق شارانى قازاقستانداعى العاشقى QP TV ستريمينگتىك پلاتفورما 150 مەملەكەتكە تىكەلەي ەفير تاراتادى.
