كەشىكپەي جەتكەن جەدەل توپ ءمايىتتىڭ ۇزاق ۋاقىت جاتىپ قالعانىن كورەدى. تەز جاسالعان سوت-مەديتسينالىق ساراپتاما ءمايىتتىڭ كىسى قولىنان قازا تاپقان ادامدىكى ەكەنىن جانە ونى بولشەكتەگەن قىلمىسكەردىڭ ءىسى ەكەنىن دە انىقتاعان. الايدا ونىڭ ىزىنە تۇسەتىن ەشقانداي ايعاق جوق, ونىڭ ۇستىنە بىرنەشە تاۋلىكتەن بەرى جاۋعان جاڭبىر بارلىق ءىزدى شايىپ كەتكەن. ءمايىتتىڭ كىمدىكى ەكەنى دە بەلگىسىز. قىلمىستىق وقيعانى كوردىم دەگەن كۋاگەر دە تابىلمادى. بۇل ءۇيدىڭ ءوزى كوپتەن بەرى بوس تۇرعان, يەسىز بولاتىن.
الايدا كاسىبي شەبەرلىك ءوزىنىڭ جەتىستىگىن كورسەتتى. پوليتسيا دەپارتامەنتى جەدەل-كريميناليستيكالىق باسقارماسىنىڭ اعا كريميناليسى, پوليتسيا مايورى جاقسىلىق ۋاليەۆ الاقاننىڭ ءبىر بولىگىنەن «پاپيلون» اۆتوماتتاندىرىلعان داكتيلوسكوپيالىق اقپاراتتىق جۇيەسىنىڭ دەرەكتەر بازاسى ارقىلى ءمايىتتىڭ كىمدىكى ەكەنىن انىقتادى. ول 1983 جىلى تۋعان, سوڭعى كەزدەرى ىشكىلىككە سالىنىپ كەتكەن قالا تۇرعىنى بولىپ شىقتى.
جەدەل توپ ونىڭ بۇرىن كىمدەرمەن جۇرگەنىن, كىمدەرمەن قوسىلىپ اراق ىشكەنىن انىقتاي كەلە اقىرى كۇدىك ءبىر ادامعا تۇسەدى. سوڭىنا قۋعىن تۇسكەنىن سەزگەن اناۋ بوتەلكەلەسىن ولتىرگەندە وزىمەن بىرگە بولعان كۋاگەردىڭ دە كوزىن جويىپ, كورشىلەس وبلىسقا كەتىپ, ءىزىن جاسىرماق بولعان. جەدەل ىزدەستىرۋ شارالارىنىڭ ناتيجەسىندە ەكى بىردەي ادامنىڭ ءومىرىن قيعان كۇدىكتى ۇستالىپ, قازىر قاماقتا وتىر. ونى ۇستاۋدا جەدەل ۋاكىلدەر, ۋچاسكەلىك ينسپەكتورلار ناتيجەلى جۇمىس ىستەدى. بارلىق زاتتىق ايعاقتار مەن قولىنىڭ تاڭباسى كۇدىكتىنىڭ قىلمىس جاساعانىن بۇلتپارتپاي دالەلدەدى. قازىر ءىس قىلمىستىق كودەكستىڭ «ادام ءولتىرۋ» بابى بويىنشا راسىمدەلىپ, سوتقا جىبەرىلۋگە دايىندالىپ جاتىر.
جەدەل-كريميناليستيكالىق باسقارمانىڭ باستىعى, پوليتسيا پولكوۆنيگى يگور سەميونوۆتىڭ ايتۋىنا قاراعاندا, جىل باسىنان بەرى كريميناليستەر 10 مىڭنان استام جەدەل-ىزدەستىرۋ شارالارى مەن تەرگەۋ ارەكەتتەرىنە قاتىسىپ, 4500 كريميناليستيكالىق زەرتتەۋ جۇرگىزگەن. سونىڭ ىشىندە 350-ءى قىلمىسكەردىڭ جەكە تۇلعاسىن انىقتاۋعا جانە قىلمىستاردى اشۋعا سەپتىگىن تيگىزگەن. ايتا كەتەتىن بولساق, 2018 جىلدىڭ قورىتىندىسى بويىنشا بۇلار ءىىم كريميناليستيكالىق بولىنىستەرى اراسىندا «ۇزدىك» دەگەن اتاقتى يەلەنىپتى.
سولتۇستىك قازاقستان وبلىسى
