ەلىمىز ۇزدىك حالىقارالىق تاجىريبەنى ەسكەرە وتىرىپ, مەديتسينالىق ساقتاندىرۋدىڭ ارالاس مودەلىن تاڭدادى. ونىڭ ەرەكشەلىگى – الەۋمەتتىك از قامتىلعان توپتاردى مەملەكەت ءوز قامقورلىعىنا الىپ, ولار ءۇشىن جارنا تولەيدى.
جاڭا جىلدان باستاپ ازاماتتارعا ەكى مەديتسينالىق كومەك پاكەتى ۇسىنىلادى. تەگىن مەديتسينالىق كومەكتىڭ كەپىلدىك بەرىلگەن كولەمىنىڭ جاڭا ۇلگىسى, ياعني شۇعىل جانە كەزەك كۇتتىرمەتىن جاعدايلاردا ءاربىر ادامعا كومەك كورسەتىلەدى. ەكىنشىسى – مىندەتتى الەۋمەتتىك مەديتسينالىق ساقتاندىرۋ پاكەتى. بۇل ساقتاندىرىلعان ءاربىر ادامنىڭ ءومىر ساپاسىن جاقسارتاتىن مەديتسينالىق كومەك.
پرەزيدەنت ماڭىزدى قۇجاتتا: «ۇكىمەت الەۋمەتتىك مەديتسينالىق ساقتاندىرۋ جۇيەسىنىڭ بەدەلىنە تاعى دا نۇقسان كەلتىرمەۋ ءۇشىن ونى جۇزەگە اسىرۋ ماسەلەسىنە زور جاۋاپكەرشىلىكپەن قاراۋى قاجەت. ءبىزدىڭ قاتەلەسۋگە قۇقىمىز جوق», دەپ اتاپ كورسەتتى. قازىر اتىراۋ وبلىسىندا جەكە ادامدار, ۇجىمدار, ءىرى كاسىپورىندار جاڭا جۇيەگە قىزىعۋشىلىق تانىتىپ, بەلسەندىلىكتەرىن كورسەتۋدە. 2017 جىلدىڭ 1 شىلدەسىنەن 2019 جىلدىڭ 31 شىلدەسىنە دەيىنگى ارالىقتا وبلىس بويىنشا جالپى سوماسى 12 ملرد 508 ملن تەڭگە جارنا جينالدى. ونىڭ 96,4%-ى جۇمىس بەرۋشىلەردىڭ اۋدارىمدارى بولسا, قالعانى جەكە كاسىپكەرلەر مەن ازاماتتىق-قۇقىقتىق كەلىسىمشارت نەگىزىندە ەڭبەك ەتەتىن تۇلعالارعا تيەسىلى.
ءمامس – حالىق مۇددەسىن الەۋمەتتىك تۇرعىدا قورعايتىن مەملەكەتتىك جۇيە. بولاشاق ۇرپاق دەنساۋلىعىنىڭ ىرگەتاسى.
بايتوللا عازيزوۆ,
«الەۋمەتتىك مەديتسينالىق ساقتاندىرۋ قورى» كەاق اتىراۋ وبلىسى بويىنشا فيليالىنىڭ ديرەكتورى
