قازاقستاننىڭ بيولوگيالىق قاۋىپسىزدىگىن قامتاماسىز ەتۋ ورتالىعىنا 70 جىل

ايماقتار • 02 قازان، 2019

قازاقستاننىڭ بيولوگيالىق قاۋىپسىزدىگىن قامتاماسىز ەتۋ ورتالىعىنا 70 جىل

بۇگىن الماتىداعى ۇلتتىق عىلىم اكادەمياسىندا دەنساۋلىق ساقتاۋ مينيسترلىگىنىڭ ماسعۇت ايقىمباەۆ اتىنداعى قازاق كارانتيندىك جانە زوونوزدىق ينفەكتسيالار عىلىمي ورتالىعى» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنى «قاۋىپتى ينفەكتسيالار: «جاڭا سىن-تەگەۋرىندەر – بولاشاققا كوزقاراس» اتتى حالىقارالىق عىلىمي كونفەرەنتسياسىن باستادى.

ايناش ەسالي

2019 جىلدىڭ 1 قاڭتارىندا ماسعۇت ايقىمباەۆ اتىنداعى قازاق كارانتيندىك جانە زوونوزدىق ينفەكتسيالار عىلىمي ورتالىعىنىڭ (بۇدان ءارى – ورتالىق)، بۇرىنعى ورتا ازيالىق وباعا قارسى عىلىمي-زەرتتەۋ ينستيتۋتىنىڭ قۇرىلعانىنا 70 جىل تولدى. وسى جىلدار ىشىندە ورتالىق بيولوگيالىق قاۋىپسىزدىك جانە ينفەكتسيالىق اۋرۋلار ماسەلەلەرى جونىندەگى ءىرى عىلىمي-زەرتتەۋ جانە ۇيىمداستىرۋ-ادىستەمەلىك ورتالىعىنا اينالدى. عىلىمي ورتالىقتا جوعارى بىلىكتى ماماندار، عالىمدار،ميكروبيولوگتار، ەپيدەميولوگتار، بيولوگتار، ۆيرۋسولوگتار جۇمىس ىستەدى جانە دە جۇمىس ىستەۋدى جالعاستىرۋدا.

ورتالىق – كوپ جىلدار بويى اسا قاۋىپتى ينفەكتسيالاردىڭ الدىن الۋ ماسەلەلەرىمەن كاسىبي اينالىساتىن جانە بيولوگيالىق قاۋىپ-قاتەرلەرگە دەن قويۋدىڭ ۇلتتىق جۇيەسىن ۇيىمداستىراتىن قازاقستانداعى جالعىز عىلىمي ۇيىم بولىپ تابىلادى. بۇگىندە ورتالىق – يننوۆاتسيالىق دياگنوستيكالىق، اقپاراتتىق جانە وندىرىستىك تەحنولوگيالاردى پايدالاناتىن بىرەگەي مەكەمە.

ورتالىقتىڭ قۇرىلىمدىق بولىمشەسى 2017 جىلى سالىنعان جانە قازاقستان – اقش قاۋىپتەرىن ازايتۋدىڭ حالىقارالىق باعدارلاماسى شەڭبەرىندە ونەركاسىپتىك پايدالانۋعا ەنگىزىلگەن بىرەگەي ورتالىق رەفەرەنتتىك زەرتحانا (ورز) بولىپ تابىلادى. ورتالىق رەفەرەنتتىك زەرتحانانىڭ دياگنوستيكالىق مۇمكىندىكتەرى پراكتيكالىق تۇرعىدا شەكسىز. ويتكەنى ورتالىق ماماندارىمىزعا اسا قاۋىپتى ينفەكتسيالاردى قوزدىرۋشى – وبا، ەبولا، لاسسا، ماربۋرگ بەزگەكتەرى، SARS، جوعارى پاتوگەندى تۇماۋ جانە ت.ب. جۇمىس ىستەۋگە مۇمكىندىك بەرەتىن بيوقاۋىپسىزدىكتىڭ 2 جانە 3 دەڭگەيىندەگى زەرتحانالىق مودۋلدەرگە يە. اسا قاۋىپتى ينفەكتسيالار سالاسىنداعى سەنىمدى جانە ساپالى زەرتتەۋلەردى جۇرگىزۋ ورتالىق زەرتحانالارىنىڭ مۇمكىندىكتەرى، ءبىزدىڭ مامانداردىڭ بىلىكتىلىگى مەن كاسىپقويلىعى ISO 9001-2015 حالىقارالىق ساپا ستاندارتىمەن كوميسسيالىق تۇرعىدا راستالعان. ناقتى ايتقاندا، ءبىزدىڭ ورتالىق نەگىزىندە وتكىزىلەتىن جوسپارلى، عىلىمي، اربيتراجدى زەرتحانالىق زەرتتەۋلەر بارلىق حالىقارالىق ۇيىمدارمەن مويىندالادى.

ورتالىقتا سەنىمدى زاماناۋي عىلىمي گەنەتيكالىق زەرتتەۋلەر جۇرگىزۋگە قاجەتتى SPF-ساناتىنداعى زەرتحانالىق جانۋارلاردىڭ گەنەتيكالىق تازا جەلىسىن شىعارۋعا ارنالعان زاماناۋي ۆيۆاري بار. ورتالىقتا 1954 جىلدان باستاپ جوعارى ءبىلىمى (دارىگەرلەر، بيولوگتار) جانە ورتا ءبىلىمى بار (لابورانتتار) مامانداردى وقىتاتىن اككرەديتتەلگەن زاماناۋي وقىتۋ حالىقارالىق ءبىلىم ورتالىعى قىزمەت جاساپ، دامىپ كەلەدى. ورتالىقتا وقىتۋ پروتسەسسىن زاماناۋي دەڭگەيدە جۇرگىزۋگە ارنالعان بارلىق قاجەتتى ماتەريالدىق-تەحنيكالىق جانە كادرلىق رەسۋرستار بار.