كونگرەسكە قاتىسۋ ءۇشىن الماتى قالاسىنا 300-دەن استام دەلەگات پەن الىس جانە جاقىن شەتەلدەردەن 95 لەكتور, گاستروەنتەرولوگتار, تەراپەۆتەر, ينفەكتسيونيستەر, جالپى تاجىريبەلىك دارىگەرلەر, پەدياترلار, ونكولوگتار, زەرتحانالىق جانە فۋنكتسيونالدىق دياگنوستيكا سالاسىنداعى ماماندار كەلەدى.
واگا شەڭبەرىندە كاسىبي قاۋىمداستىق وكىلدەرىنىڭ تالقىلاۋى ءتيىس باستى تاقىرىپتاردىڭ ءبىرى – ىشەكتىڭ قابىنۋ اۋرۋلارى (ىقا), ولاردىڭ قاتارىنا ويىق جارالى كوليت (وك) جانە كرون اۋرۋى (كا) جاتادى.
ىقا قازاقستاندا عانا ەمەس, الەمدە دە زاماناۋي گاستروەنتەرولوگيانىڭ ەڭ وزەكتى ماسەلەلەرىنىڭ ءبىرى سانالادى. الەمنىڭ ءار ءتۇرلى ايماقتارىنداعى ىقا بويىنشا ەپيدەميولوگيالىق جاعدايدا اۋىتقۋلار بار. ورتاشا العاندا ويىق جارالى كوليتتىڭ (وك) تارالۋى 100 مىڭ تۇرعىنعا شاققاندا 37-دەن 246-عا دەيىن, كرون اۋرۋى (كا) – 100 مىڭ تۇرعىنعا شاققاندا 29-دان 199-عا دەيىن, ال ىقا سالدارىنان مۇگەدەكتىك 20 پايىزدان 34 پايىزعا دەيىن قۇرايدى. 2018 جىلعى ديسپانسەرلىك ناۋقاستار تىركەلىمىنىڭ دەرەكتەرى بويىنشا قازاقستاندا تىركەلگەن ناۋقاستار سانى 6085 ادامدى قۇراپ, ونىڭ ىشىندە 2497 ادام وك – 1060, كا – 513 دياگنوزدارىمەن ەسەپكە الىنعان.
كونگرەستە ىقا-نىڭ پايدا بولۋ سەبەبى نەدە, قازىرگى تاڭدا الەمدە جانە قازاقستاندا ىقا-نى دياگنوستيكالاۋ مەن ەمدەۋدىڭ قانداي قازىرگى زامانعى ادىستەرى بار, بۇگىنگى كۇنى بيولوگيالىق تەراپيانىڭ قانشالىقتى ءتيىمدى جانە قاۋىپسىز ەكەندىگى جانە قر-دا بيولوگيالىق پرەپاراتتاردىڭ قول جەتىمدىلىك جاعدايى قاي دەڭگەيدە ەكەندىگى تالقىلانادى.
الماتى
