ەسكە سالا كەتەيىك, بۇعان دەيىن پرەزيدەنت قاسىم-جومارت توقاەۆ مەملەكەتتىك ورگاندارعا كاسىپكەرلەرمەن اشىق ديالوگ جۇرگىزۋدى تاپسىرعان بولاتىن. وندا وڭىرلەردەگى بيزنەس-قوعامداستىقتاردىڭ الدىندا باقىلاۋ-قاداعالاۋ ورگاندارىنىڭ ەسەبى بىرىڭعاي كۇنىن جۇرگىزۋ تاجىريبەسىن ەنگىزۋ قاجەتتىگى, بۇل زاڭناماداعى جاڭاشىلدىقتار تۇسىندىرىلەتىن, مەملەكەتتىك ورگاندار جۇمىسىنىڭ باسىمدىقتارى ايتىلاتىن اشىق ديالوگ الاڭى بولاتىنى ايتىلدى.
«تاۋەلسىز سوت — بۇل ينۆەستورلار مەن كاسىپكەرلەر تاراپىنان ەلدىڭ بيزنەس احۋالىنا سەنىمنىڭ ىرگەلى سەنىمى. كاسىپكەرلەر مەن مەملەكەتتىك ورگاندار اراسىنداعى سوت داۋلارىندا تاراپتاردىڭ تەڭدىگىن قامتاماسىز ەتۋ قاجەت» دەگەن پرەزيدەنت جۇيەلى شارا «كاسىپكەردىڭ ادالدىق پرەزۋمپتسياسى» بولۋى تيىستىگىنە نازار اۋدارىپ, بيزنەس جۇرگىزۋ رەيتينگىن تومەندەتكەن اكىمگە شارا قولدانىلاتىنىن, بيزنەس-ومبۋدسمەنگە جۇمىستى جانداندىرۋعا, بيزنەس-قوعامداستىقتا تانىمال ءارى قاجەتتى بولۋعا كەڭەس بەرۋگە, سونىمەن قاتار وڭىرلىك بيزنەس-ومبۋدسمەندەر ەنگىزۋ ماسەلەسىن قاراستىرۋ قاجەتتىگىن ايتقان ەدى.
ءىس-شارا اياسىندا «اشىق ەسىك كۇنى» ۇيىمداستىرىلعان بولاتىن. كاسىپكەرلەردىڭ سۇراقتارىنا باقىلاۋشى, قاداعالاۋشى جانە باسقا دا ۋاكىلەتتى ورگاندارىنىڭ وكىلدەرى جاۋاپ بەردى. ءىس-شاراعا قاتىسۋشىلاردىڭ باسىم بولىگى شاعىن جانە ورتا بيزنەس سۋبەكتىلەرى بولدى.
ماڭعىستاۋ وبلىسى ەكولوگيا دەپارتامەنتى مەملەكەتتىك ەكولوگيالىق باقىلاۋ ءبولىمىنىڭ باسشىسى ەرجان جۇماشەۆ ۆەدومستۆانىڭ نەگىزگى قىزمەتى, اسىرەسە, قورشاعان ورتانى قورعاۋ جانە تۇرعىنداردىڭ ەكولوگيالىق قاۋىپسىزدىگىن قامتاماسىز ەتۋ باعىتىندا جاسالىپ جاتقان جۇمىستار تۋرالى ايتىپ ءوتتى.
دەپارتامەنت تاراپىنان ءتۇرلى جيىندار, وتىرىستار, قوعامدىق كەڭەستەردە وڭىردەگى تابيعات قورعاۋ اياسىندا كوپتەگەن ۇسىنىس بەرىلگەن بولاتىن. سونداي-اق قر ەكولوگيالىق ساياسات, تابيعات پايدالانۋشىلارعا مەملەكەتتىك ەكولوگيالىق باقىلاۋ جانە تابيعات پايدالانۋدى رەتتەۋ اياسىنداعى مىندەتتەر تۋرالى دا ايتىپ ءوتتى. جالپى كاسىپكەرلەر تاراپىنان قويىلعان بارلىق سۇراقتارعا تۇشىمدى جاۋاپتار قايتارىلدى.
ايتا كەتۋ كەرەك, ايماقتىق دەپارتامەنت ديالوگقا جانە بارلىق مۇددەلى تاراپتارمەن جۇمىس جاساۋعا نيەتتى. بۇدان بولەك, دەپارتامەنت وڭىردە جۇزەگە اسىرىلاتىن كەز كەلگەن بيزنەس باستامانى قولداۋعا دايىن.
ماڭعىستاۋ وبلىسى
