ءدال قازىر ەسىل ءوڭىرىنىڭ ديقاندارى ءاربىر قولايلى كۇندى ۇتىمدى پايدالانىپ قالۋعا تىرىسىپ, جانتالاسىپ جاتىر. بىراق جارىقتىق كۇن دە قاباعىن اشپاي, كۇزدىڭ كوڭىلسىز جاۋىن-شاشىنى ۇزىلمەي تۇر. كەيدە ءتىپتى نوسەرلەتىپ, ءبىر-ەكى كۇن بويى ۇزىلمەي تۇرىپ الادى. ەگىس الاڭىنا شىقپاق تۇگىلى, جەر ەزىلىپ كەتكەندە قاتىناس ءۇزىلىپ قالادى. سوندىقتان كەيبىر فەرمەرلەر, پىسىق شارۋالار كۇن جاۋىن-شاشىنسىز بولعاندا وراقتى ۇزبەي سالىپ, ەكى اۋىسىممەن جۇمىس ىستەيدى, كومبايندار تۇنىمەن توقتامايدى.
بيىل وبلىستا بارلىعى
2 ملن 861مىڭ گەكتار جەرگە – ءداندى داقىل, 970 مىڭ گەكتار جەرگە – مايلى داقىل, 34 مىڭ گەكتار كارتوپ, 6,2 مىڭ گەكتارعا – كوكونىس تۇقىمدارى سىڭىرىلگەن. اس اتاسى القاپقا ەگىلگەن كولەم اقمولا مەن قوستاناي وبلىسىنان كەيىنگى ءۇشىنشى ورىندا.
سوڭعى مالىمەت بويىنشا وڭىردەگى بارلىق ءداندى داقىلدىڭ 70 پايىزى ورىلىپ, دەستەگە ءتۇسىپ, سونىڭ 63,8 پايىزى باستىرىلدى. جينالعان استىق كولەمى 39,4 مىڭ توننا. گەكتار بەرەكەلىگىنىڭ ورتاشا كورسەتكىشى – 15 تسەنتنەر.
قىزىلجار, مامليۋت, اققايىڭ, ءۋاليحانوۆ اۋداندارىندا استىق ءتۇسىمى بۇدان الدەقايدا جوعارى. كوش باستاۋشى قىزىلجار اۋدانى ورتا ەسەپپەن گەكتارىنان 18,3 تسەنتنەردەن استىق جينالۋدا, ال كەيبىر جەكە شارۋاشىلىقتاردا ءتىپتى 25-27 تسەنتنەردەن اينالۋدا.
وسى كورسەتكىش بويىنشا سولتۇستىك قازاقستان كورشىلەس استىقتى وبلىستاردان الدا كەلەدى. 26 قىركۇيەكتەگى مالىمەت بويىنشا گەكتارىنا ورتاشا ءتۇسىم اقمولا وبلىسىندا − 10,3, ال قوستانايدا – 6,3 تسەنتنەردەن ەكەن. الايدا بۇل وڭىرلەردە استىق باستىرۋ قارقىنى جوعارى. ناقتى ايتاتىن بولساق, قوستاناي بارلىق استىعىنىڭ 74 پايىزىن, اقمولا 68,4 پايىزىن باستىرىپ ۇلگەرىپتى.
سولتۇستىك قازاقستانداعى استىقتى اۋدانداردىڭ ىشىندەگى ەگىس كولەمى ەڭ ۇلكەنى – عابيت مۇسىرەپوۆ اۋدانى. بۇگىندە اۋداننىڭ ديقاندارى 490,6 مىڭ گەكتار القاپتىڭ 64,4%-ىن باستىرىپ ۇلگەردى. الايدا گەكتار بەرەكەلىگى وبلىستىڭ ورتاشا كورسەتكىشىنەن تومەندەۋ – 13,6 تسەنتنەر عانا. استىق باستىرۋدان وبلىس بويىنشا الدا كەلە جاتقان – ءۋاليحانوۆ اۋدانى. اۋدانداعى القاپتاردىڭ 71,4 پايىزى باستىرىلعان. گەكتار بەرەكەلىگى 16,4 تسەنتنەردەن اينالۋدا. ال كوش سوڭىندا قالىپ, جاۋىن-شاشىننىڭ كەسىرىنەن قۇلاشىن جازا الماي كەلە جاتقان اۋدان – مامليۋت. جەرگىلىكتى ديقاندار دەستەگە تۇسكەن استىقتىڭ 57,7 پايىزىن عانا باستىردى.
سينوپتيكتەردىڭ بولجامىنا قاراعاندا, الدىمىزداعى ون كۇن كولەمىندە اۋا رايى جادىراپ كەتە قويمايدى. وبلىس اسپانىن الا بۇلت باسىپ, كەي جەرلەردە جاۋىن-شاشىن كۇشەيۋى مۇمكىن. سوندىقتان ديقاندار استىق باستىرۋدى الدىمىزداعى ونكۇندىكتە دە اياقتاي قويۋى نەعايبىل.
اۋا رايىنىڭ قولايسىزدىعى ءداندى داقىلدار عانا ەمەس, مايلى داقىلدار مەن كوكونىستى دە تولىق جيناپ الۋعا مۇرسات بەرمەي وتىر. وبلىس بويىنشا پىسكەن مايلى داقىلداردىڭ 55,5%-ى ورىلىپ, ونىڭ ۇشتەن ءبىرى عانا باستىرىلدى. بارلىعى 265,7 مىڭ توننا مايلى داقىل قامباعا ءتۇستى. ءونىمدى جيناۋدا الدا كەلە جاتقان – ايىرتاۋ اۋدانىنىڭ ەڭبەككەرلەرى. ولار ەگىستىڭ 45,4 پايىزىن قامباعا ءتۇسىرىپ ۇلگەردى. كوش سوڭىندا قالىپ كەلە جاتقان تيميريازەۆ اۋدانىنىڭ ديقاندارى ەگىس كولەمىنىڭ تەك 22,8%-ىن عانا باستىردى.
وبلىس بويىنشا كارتوپتىڭ 95 پايىزى جينالدى. بۇل ىستە عابيت مۇسىرەپوۆ اۋدانىنىڭ ەڭبەككەرلەرى الدا كەلەدى, ولار وزدەرىندەگى كارتوپ تۇقىمى سىڭىرىلگەن اۋماقتى تولىق جيناعان. الايدا ونىمدىلىك تومەندەۋ. وبلىستاعى ورتاشا كورسەتكىش 130,7 تسەنتنەر بولسا, مۇسىرەپوۆ اۋدانىندا گەكتارىنان تەك 111,4 تسەنتنەردەن جينالعان. ال ەڭ جوعارى ءونىم قىزىلجار اۋدانىندا, ولار گەكتارىنان 150 تسەنتنەردەن ءونىم الۋدا.
وبلىس كارتوپتان باسقا كوكونىستەردى جيناۋدى دا ءالى تولىق اياقتاي الماي وتىر. سوڭعى دەرەككە قاراعاندا, ءونىمنىڭ ءالى سەگىز پايىزى القاپتا جاتىر. بارىنە كەدەرگى بولىپ تۇرعان اۋا رايىنىڭ قولايسىزدىعى. بەس-التى كۇن شايداي اشىق بولسا, قىزىلجارلىقتار وراق ناۋقانىن ەڭسەرىپ تاستار ەدى. ديقانشى قاۋىمنىڭ بار تىلەگى دە سول.
سولتۇستىك قازاقستان وبلىسى
