ەندى سول جەرگە 400 جۇمىس ورنىن اشقان الىپ «Dostyk mall» دەگەن ساۋدا, ويىن-ساۋىق كەشەنى قۇرىلىسىن اياقتاپ, جۋىردا سالتاناتتى تۇردە اشىلدى. بۇل جوبانى جەرگىلىكتى كاسىپكەر مۇحتار يگىباەۆ 5,5 ملرد تەڭگە قاراجات شىعارىپ, ىسكە اسىرىپ وتىر. قالانىڭ كوركىن اسىرىپ, تۇرعىندارعا كوڭىلدى كۇي سىيلاعان م.يگىباەۆتىڭ ءوزى ۇزاق جىلداردان بەرى كاسىپكەرلىكپەن اينالىسىپ كەلەدى.
ءتورت قاباتتى ساۋدا, ويىن-ساۋىق ورتالىعىنىڭ اۋماعى 30 مىڭ شارشى مەتردى قۇرايدى. استىڭعى قاباتتارى ءتۇرلى سۋپەرماركەتتەر بولعاندا جوعارعى قاباتتارىندا بالالارعا ارنالعان ويىن-ساۋىق الاڭى, كينوتەاتر, ءدامحانالار مەن مەيرامحانالار ورىن العان. بارلىق تۇرپاتى نۇر-سۇلتانداعى «حان-شاتىرعا» ۇقسايتىن عيمارات ەندى قىزىلجارلىقتار يگىلىگىنە اينالارى ءسوزسىز.
ورتالىقتىڭ اشىلۋ سالتاناتىنا قاتىسقان وبلىس اكىمى قۇمار اقساقالوۆ قىزىلجاردا بۇرىن-سوڭدى بولماعان ءزاۋلىم ساۋدا جانە ويىن-ساۋىق ورتالىعى حالىققا قالتقىسىز قىزمەت ەتەتىنىنە سەنىم ءبىلدىردى.
ورتالىقتىڭ سىرتىندا تۇرعىندارعا ىڭعايلى بولۋى ءۇشىن 400 ورىندىق اۆتوتۇراق تا ۇيىمداستىرىلىپتى. ەسىك الدىندا دەمالىپ وتىراتىن شاعىن ساياباق تا بوي كوتەرگەن.
ساۋدا ورنى ءبىرىنشى كۇنى-اق ءتۇرلى تاۋارلارعا بارىنشا باي ەكەنىن كورسەتتى. وعان كەلۋشىلەر كۇنى بويى اعىلىپ, ۇزىلمەدى. بىراق اتالمىش نىساننىڭ اشىلۋ سالتاناتىندا ونەر كورسەتكەن توپتى شارانى ۇيىمداستىرۋشىلاردىڭ وزىمىزدەن شاقىرماي, رەسەيدەن الدىرعانى عانا كوڭىلگە قاياۋ تۇسىرگەندەي بولدى...
پەتروپاۆل
