اتاقتى ۆوكاليستىڭ داۋىسى وراسان زور دياپازوندى قامتىعان ءارى كەرەمەت يكەمدىلىگى مەن تەحنيكالىق جاعىنان ەرەكشەلەنگەن, بۇل وعان سوپرانولىق تا, كونترالتتىك تە پارتيالاردى ورىنداۋعا مۇمكىندىك بەرگەن. تۋا بىتكەن تەمبرىنىڭ ارقاسىندا بىلىكتى ماماندار ءانشىنى بىرەگەي قۇبىلىس دەپ تانىپ, بوستونداعى مۋزىكا فەستيۆالىندە ءباسپاسوز وكىلدەرى ەرىك قۇرمانعاليەۆتى فەنومەن دەپ اتاعان.
ەرىك قۇرمانعاليەۆ كوپتەگەن گاسترولدىك ساپارلارعا شىعىپ, الەمنىڭ ۇزدىك ساحنالارىندا وپەرالىق جانە جەكە باعدارلامالاردى ورىنداعان. ونىڭ كەڭ اۋقىمدى رەپەرتۋارىندا ك.ۆ.گليۋك, ك.مونتەۆەردي, گ.ف.گەندەل, ي.س.باح, ا.ۆيۆالدي, دج.روسسيني, گ.پيورسەلل, ۆ.ا.موتسارت, ا.سترادەللا, ك.سەن-سانس, ي.گايدن, ۆ.بەلليني, دج.پۋچچيني, دج.مەيەربەر, س.فرانك, ل.كەرۋبيني, ل.ليۋتستسي, ج.بيزە, دج.ۆەردي, دج.كاچچيني, ف.شۋبەرت, ي.شتراۋس, م.گلينكا, پ.چايكوۆسكي, س.راحمانينوۆ, ن.ريمسكي-كورساكوۆ, د.بورتنيانسكيدىڭ ۆوكالدىق تۋىندىلارى مەن وپەرالارىنان باستى پارتيالار بولعان. ول العاشقىلاردىڭ ءبىرى بولىپ ا.شنيتكەنىڭ №2 جانە №4 سيمفونيالارى مەن «دارىگەر يوگانن فاۋستتىڭ وقيعاسى» كانتاتاسىنداعى كونترتەنور پارتياسىن ورىندادى. امەريكالىق دراماتۋرگ د.گ.حۆاننىڭ اتتاس پەساسى بويىنشا رەجيسسەر ر.ۆيكتيۋكتىڭ «م.باتتەرفلياي» سپەكتاكلىندە باستى ءرولدى ورىنداۋى ارقاسىندا ايتارلىقتاي تانىمالدىلىققا يە بولدى. بەينەنى تاماشا جەتكىزە العانى ءۇشىن جىلدىڭ ۇزدىك اكتەرى رەتىندە تانىلعان. ايگىلى روزا جامانوۆا, بيبىگۇل تولەگەنوۆا جانە اراكسيا داۆتيانمەن بىرگە ر.حامداموۆتىڭ «ۆوكالدىق پاراللەلدەر» فيلمىنە تۇسكەن.
كەش قوناقتارى – ەلوردادا العاش رەت ونەر كورسەتەتىن رەسەيلىك ارتىستەر, ەرىك قۇرمانعاليەۆتىڭ دوستارى – رەسەيدىڭ ەڭبەك سىڭىرگەن ءارتىسى لاريسا رۋداكوۆا (سوپرانو), رۋستام ياۆاەۆ (كونترتەنور), ولەگ ريابەتس (كونترتەنور), الەكساندر كوتوۆششيكوۆ (فورتەپيانو).
ولارمەن بىرگە كامەرالىق زال ساحناسىنا بەلگىلى قازاقستاندىق ۆوكاليستەر: «استانا وپەرا» جەتەكشى ءسوليسى, قازاقستاننىڭ ەڭبەك سىڭىرگەن قايراتكەرى جۇپار عابدۋللينا (سوپرانو), قازاقستاننىڭ ەڭبەك سىڭىرگەن ءارتىسى شاحيماردان ءابىلوۆ (باريتون), باتىرجان سماقوۆ (كونترتەنور), اسپاپشى مۋزىكانتتار: قازاقستاننىڭ ەڭبەك سىڭىرگەن ءارتىسى ماقپال بەكماعامبەتوۆا (سكريپكا), اسقار مۇقانوۆ (ۆيولونچەل), گۋمير سايدالين (فلەيتا), راۋشان بەسكەمبيروۆا (فورتەپيانو) شىعادى.
ورىنداۋشىلار ەرىك قۇرمانعاليەۆتىڭ رەپەرتۋارىنان تۋىندىلاردى, سونىڭ ىشىندە الەمدىك وپەرالىق جانە ۆوكالدىق كلاسسيكا جاۋھارلارىن, سونداي-اق وتاندىق اۆتورلاردىڭ شىعارمالارىن ۇسىنادى.
«ەگەمەن-اقپارات»
