فورۋم اياسىنداعى دوڭگەلەك ۇستەلدە باس قوسقان قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى جانسەيىت تۇيمەباەۆ, الماتى قالاسىنىڭ اكىمى باقىتجان ساعىنتاەۆ, پارلامەنت دەپۋتاتتارى, اسسامبلەيا كەڭەسىنىڭ, قوعامدىق كەلىسىم كەڭەستەرىنىڭ, قحا عىلىمي-ساراپشىلىق كەڭەسىنىڭ مۇشەلەرى, مەملەكەتتىك ورگاندار مەن ەتنومادەني بىرلەستىكتەر وكىلدەرى حالىق تۇرمىسىنىڭ ساپاسىن جاقسارتۋ جونىندەگى ماسەلەلەردى تالقىلاپ, قوعامدىق كەلىسىم كەڭەستەرىنىڭ ءرولىن ارتتىرۋ, جالپىمەملەكەتتىك مىندەتتەردى شەشۋ جولدارىن ساراپقا سالدى.
فورۋم تاقىرىبىنا تۇزدىق بولعان كۇن ءتارتىبى پرەزيدەنت جولداۋىندا ماڭىزدىلىعىنا ءمان بەرىلگەن ماسەلەلەر مەن تاپسىرىلعان مىندەتتەردى جۇزەگە اسىرۋ ماقساتىنان تۋىندايدى. پرەزيدەنت قاسىم-جومارت توقاەۆ ەلدىڭ تۇراقتىلىعى مەن دامۋى ءۇشىن قوعامدىق ديالوگ الاڭدارىنىڭ جۇمىسىن جانداندىرىپ, وزەكتىلىگى مەن بەلسەندىلىگىن ارتتىرۋدى تاپسىرعان بولاتىن. فورۋم بارىسىندا ءسوز العان قابىلداۋشى تاراپ, الماتى قالاسىنىڭ اكىمى, قالالىق قازاقستان حالقى اسسامبلەياسىنىڭ توراعاسى باقىتجان ساعىنتاەۆ وسى ماقساتتا الماتى قالاسىندا اتقارىلىپ جاتقان جۇمىستاردى تانىستىرىپ ءوتتى. سونداي-اق قوعامدىق كەلىسىم كەڭەستەرىنىڭ ايماقتا اتقارىپ وتىرعان جۇمىسىنا وڭ باعا بەردى.
«پرەزيدەنت ءوز جولداۋىندا قوعام نازارىن ءار ادامدى الاڭداتاتىن ماڭىزدى ماسەلەلەرگە اۋدارتىپ قانا قويماي, ونى شەشۋ جولدارىن دا ۇسىندى. بۇل قازاقستان ازاماتتارىنىڭ زاڭدى مۇددەلەرى مەن قۇقىعىن قامتاماسىز ەتۋ جولىنداعى باتىل قادام بولدى. پرەزيدەنت جولداۋى ەكونوميكالىق جانە الەۋمەتتىك تەڭسىزدىكتى جويىپ, الەۋمەتتىك ادىلەتتىلىك پرينتسيپتەرىن ۇستەم ەتۋگە جانە ەڭ باستىسى, ەڭبەككە ىنتالاندىرۋعا جاعداي تۋعىزۋعا باعىتتالعان», – دەگەن قازاقستان حالقى اسسامبلەياسى توراعاسىنىڭ ورىنباسارى ج.تۇيمەباەۆ, جولداۋدان تۋىندايتىن ءتۇيىن, ازاماتتاردىڭ ءوز ماسەلەسىن ءوزى شەشۋ مۇمكىندىكتەرىن ارتتىرۋعا جاعداي جاساۋ كەرەك دەدى.
«بۇگىندە اسسامبلەيا الدىندا قازاقستان رەسپۋبليكاسى پرەزيدەنتىنىڭ جولداۋىنان تۋىنداعان اۋقىمدى مىندەتتەر مەن ماقساتتار تۇر. سونىڭ ءبىرى, جالپىۇلتتىق قوعامدىق ديالوگتى جولعا قويۋ – اسسامبلەيا جانىنداعى قوعامدىق كەلىسىم كەڭەستەرىنىڭ باستى ماقساتى بولماق», دەگەن جانسەيىت قانسەيىت ۇلى قوعامدىق كەلىسىم كەڭەستەرىنىڭ اۋقىمىن كەڭەيتۋ ارقىلى, وعان حالىقتىڭ باسىم بولىگىنىڭ قاتىستىرىلۋىن قامتاماسىز ەتۋ كەرەك, بۇل حالىق ىشىنەن مۇقتاج جانداردى تاۋىپ, ولارمەن تىكەلەي جۇمىس ىستەۋگە مۇمكىندىك بەرەدى دەپ اتاپ كورسەتتى.
ساندى ساراپتاساق, بۇگىندە ەل ىشىندە اسسامبلەيانىڭ 23 مىڭنان استام ادام توپتاسقان 2786 قوعامدىق كەلىسىم كەڭەسى جۇمىس ىستەۋدە. ونىڭ ىشىندە 14-ءى وبلىس ورتالىقتارىندا, 3-ەۋى نۇر-سۇلتان, الماتى, شىمكەنت قالالارىندا, 42-ءسى قالالاردا, 167-ءسى – اۋدانداردا, 2426-سى – اۋىلدىق جەرلەردە, سونداي-اق 134-ءى مەكەمە-كاسىپورىنداردا قۇرىلعان. جانسەيىت قانسەيىت ۇلى قوعامدىق كەلىسىم كەڭەستەرىنىڭ بۇل الەۋەتىن الەۋمەتتىڭ ءال-اۋقاتىن كوتەرۋگە جۇمساۋ كەرەك دەيدى.
فورۋم اياسىندا قاتىسۋشىلارعا «قازاقستان حالقى اسسامبلەياسىنىڭ قوعامدىق كەلىسىم كەڭەستەرىنىڭ جۇمىسى» كورمەسى تانىستىرىلدى. مۇندا قاتىسۋشىلاردىڭ نازارىنا ەلدىڭ ءار ايماعىنداعى قوعامدىق كەلىسىم كەڭەستەرىنىڭ اتقارىپ وتىرعان جۇمىستارى تۋرالى اقپارات ۇسىنىلدى. جانە اسسامبلەيانىڭ ءبىر شاڭىراعىنا بىرىكتىرىلگەن بارلىق ەتنوس وكىلدەرى وزدەرىنىڭ سالت-ءداستۇرى مەن مادەنيەتىنەن ماعلۇمات بەرەتىن تاريح جادىگەرلەرى مەن قولونەر بۇيىمدارىن ۇسىندى.
سونداي-اق فورۋم بارىسىندا «قوعامدىق كەلىسىم كەڭەسىنىڭ جۇمىسىندا مەدياتيۆتى تەحنولوگيالاردى پايدالانۋ» ترەنينگى ۇيىمداستىرىلدى.
«ەگەمەن-اقپارات»
