اۋەلى شىمكەنتتىڭ جاڭا قالاشىعىنا اينالعان اكىمشىلىك ىسكەرلىك ورتالىعىنداعى تۇرعىن ۇيلەردىڭ قۇرىلىس الاڭىن ارالاعان شاھار باسشىسى مەردىگەر مەكەمەنىڭ باسشىسىنا جۇمىستى جانداندىرىپ, نىساندى مەرزىمىندە اياقتاۋ قاجەتتىگىن ايتتى. سونداي-اق جاۋاپتى سالا باسشىلارىنا ينفراقۇرىلىم ماسەلەسىن تەز ءارى وڭتايلى شەشۋدى تاپسىردى.
ودان سوڭ س.بايتەرەكوۆ كوشەسىندە ورنالاسقان «Tamerlan Residence» تۇرعىن ءۇي كەشەنىنىڭ قۇرىلىسىنا باردى. اتالعان نىساندى «BI Group» جشس قۇرىلىستى كەلەسى جىلدىڭ تامىز ايىندا اياقتاۋدى جوسپارلاپ وتىر. مۇندا 16 جانە 12 قاباتتى 7 تۇرعىن ءۇي بوي كوتەرەتىن بولادى.
بۇدان ءارى قالا اكىمى «اقجايىق» جانە «كوكجايلاۋ» تۇرعىن ءۇي كەشەندەرىنىڭ قۇرىلىسىن كوردى. نىسانداردى سالىپ جاتقان مەردىگەر مەكەمەلەردىڭ وكىلدەرىمەن كەزدەسۋ بارىسىندا تۇرعىن ۇيلەردىڭ قاسبەتىنە باسا كوڭىل اۋدارىپ, قالانىڭ كوركىن اشاتىنداي ەتىپ سالۋ ايتىلدى.
ءوز كەزەگىندە «تۇران» ىقشام اۋدانىنداعى 1200 ورىندىق مەكتەپتىڭ قۇرىلىسىنا بارعان قالا باسشىسى مۇنداعى شەشىلمەي جاتقان تۇيتكىلدى كوممۋنالدىق ماسەلەلەرمەن قاتار, بالالاردىڭ ءبىلىم الۋىنا قولايلى جاعداي جاسالۋى كەرەكتىگىن قاداپ ايتتى.
سونىمەن قاتار ە.ايتاحانوۆ اتالعان تۇرعىن ۇيلەردىڭ قۇرىلىسىن جۇرگىزىپ جاتقان بارلىق مەردىگەرلەرگە بىرنەشە سىن-ەسكەرتپەلەر جاسادى. «مۇنداي تۇرعىن ۇيلەردى سالاردا ەڭ الدىمەن ينفراقۇرىلىم ماسەلەسىن شەشكەن ءجون. سونداي-اق مۇمكىندىگى شەكتەۋلى جاندارعا ارنالعان پاندۋستار بولۋى شارت. سالىنىپ جاتقان تۇرعىن ۇيلەردىڭ قاسبەتى زامان تالاپتارىنا ساي ءارى اسەم بولۋى كەرەك. شىمكەنت – مەگاپوليس قالا. دەمەك, ءبىز جاڭاشا ويلاپ, قالامىزدىڭ كوركەيۋىنە بارشامىز ات سالىسۋىمىز قاجەت», دەدى ەرلان قۋانىش ۇلى.
قازىرگى تاڭدا قالادا مەملەكەتتىك باعدارلاما ارقىلى سالىنىپ جاتقان تۇرعىن ۇيلەردىڭ قۇرىلىسى اياقتالۋعا جاقىن. ناقتىراق ايتار بولساق, «نۇرلى جەر» باعدارلاماسى اياسىندا 26 تۇرعىن ءۇي پايدالانۋعا بەرىلەدى. بۇل ۇيلەردى «7-20-25» باعدارلاماسى ارقىلى دا الۋعا بولادى. جىل سوڭىندا لەنتاسى قيىلاتىن 26 تۇرعىن ۇيدە بارلىعى 1164 پاتەر ورنالاسقان.
شىمكەنت قالاسىنىڭ قۇرىلىس باسقارماسى تاراتقان مالىمەتكە سۇيەنسەك, اتالعان تۇرعىن ۇيلەردى سالۋ ءۇشىن باعدارلامانىڭ وپەراتورى – «باسپانا» اق-نان 10 ملرد تەڭگە جانە جەكە ينۆەستورلاردان 2,7 ملرد تەڭگە بولىنگەن. قازىرگى تاڭدا تۇرعىن ۇيلەردىڭ قۇرىلىسى قارقىندى جۇرگىزىلىپ جاتىر.
«جىل سوڭىنا دەيىن, دالىرەگى جەلتوقسان ايىندا نىساندار پايدالانۋعا بەرىلەدى دەپ جوسپارلانىپ وتىر. جەكە ينۆەستورلار وزدەرىنىڭ قۇرىلىسقا قۇيعان قارجىسىنىڭ ۇلەستىك پاتەرىن الادى. ءسويتىپ, حابارلاندىرۋ بەرىپ ەكىنشى دەڭگەيلى بانكتەر ارقىلى ونى «7-20-25» باعدارلاماسىمەن وتكىزەدى. «باسپانا» اق-نىڭ ۇلەسىندەگى پاتەرلەر دە سول باعدارلامامەن ۇلەستىرىلەدى. بىراق مۇندا تۇرعىن ءۇي كەزەگىندە تۇرعاندارعا, كوپ بالالى وتباسىلارعا باسىمدىق بەرىلەدى», دەيدى «Shymkent» اكك» اق باسشىسى ابىلسەيىت راباەۆ.
«Shymkent» اكك» اق-مەن «7-20-25» باعدارلاماسى اياسىندا جۇرگىزىلىپ جاتقان تۇرعىن ۇيلەردىڭ جالپى اۋدانى 73 مىڭ شارشى مەتردەن اسادى.
بۇل تۇرعىن ۇيلەر قايدا سالىنىپ جاتقانىنا توقتالساق. باعدارلاما اياسىندا قۇرىلىسى جۇرگىزىلىپ جاتقان ۇيلەر 2 كەزەڭگە بولىنگەن. 1-كەزەڭدە» تۇران» شاعىن اۋدانىنداعى 9 قاباتتى 2 تۇرعىن ءۇيدى جانە «قاراتاۋ» اۋدانى 192 ورامداعى 5 قاباتتى 6 ءۇيدى تاپسىرۋ جوسپارلانعان.قۇرىلىسىن«بەكستروي سەرۆيس» جشس جۇرگىزەدى. جالپى اۋدانى 8960,28 شارشى مەتردى قۇرايتىن بۇل ۇيلەردە 1, 2 جانە 3 بولمەلى, بارلىعى 126 پاتەر بولادى.
بۇدان بولەك كوپقاباتتى تۇرعىن ۇيلەرگە جاپسارلاسىپ, الەۋمەتتىك, تۇرمىستىق, ساۋدا-ساتتىق جانە ويىن-ساۋىق ورتالىقتارى دا سالىنادى. بۇل تۇرعىن ۇيلەر «ەكى جۇلدىز» تويحاناسىنىڭ قارسى بەتىندە ورنالاسادى.
ال, «قاراتاۋ» اۋدانى 192 كۆارتالداعى 5 قاباتتى 6 ءۇيدىڭ سمەتالىق قۇنى قۇرىلىسىن «ارحپروەكت-1» جشس قولىنا العان. جالپى اۋدانى 16000,8 شارشى مەتر قۇرايتىن ۇيدە 240 پاتەر بولماق. قۇرىلىس جۇمىستارىنىڭ 2 كەزەڭىندە «تۇران» شاعىن اۋدانىندا تاعى دا 6 كوپقاباتتى تۇرعىن ءۇي بوي كوتەرەدى. بۇل تۇرعىن ۇيلەردىڭ قۇرىلىسى اياقتالعاندا 350 پاتەر ءوز يەسىن تابادى.
«قاراتاۋ» اۋدانى, «اسار-2» شاعىناۋدانى №3196 ا, 3196 جەر تەلىمدەرىندە 5 قاباتتى 10 تۇرعىن ءۇي بوي كوتەرەدى. ناتيجەسىندە 300 پاتەر پايدالانۋعا بەرىلەدى. بۇدان بولەك, «قاراتاۋ» اۋدانى, 178 كۆارتال, №36 جەر تەلىمىندە 9 قاباتتى 2 تۇرعىن ءۇيدىڭ قۇرىلىسى باستالعان. پاتەر اۋدانى – 15225 شارشى مەتردى قۇرايتىن بۇل ءۇي 192 پاتەرلى بولادى.
تاپسىرىسقا جىل سوڭىندا بەرىلەتىن بۇل پاتەرلەردىڭ 1 شارشى مەترى 190 000 – 210 000 تەڭگە ارالىعىندا بولادى. تاڭداعان پاتەر قۇنىنىڭ 20 پايىزى بولسا, قالعان قارجىنى بانك ارقىلى «7-20-25» باعدارلاماسىمەن 7 پايىزعا, 25 جىلعا دەيىن راسىمدەۋگە بولادى.
«باسپانا» اق نەمەسە جەكە ينۆەستورلاردىڭ قارجىسىنا سالىنعان پاتەرلەردىڭ باعاسىندا ەشقانداي ايىرماشىلىق بولمايدى. «7-20-25» باعدارلاماسىنىڭ ەرەجەسىنە سايكەس, تاڭداعان ءۇيدىڭ قۇنى 25 ملن تەڭگەدەن اسپاۋى كەرەك. ودان ارزاندارى قۇپتالادى.
سونداي-اق شىمكەنت قالالىق قۇرىلىس باسقارماسىنىڭ بەرگەن مالىمەتىنە سۇيەنسەك, جوعارىدا اتالعان 26 تۇرعىن ۇيدەن بولەك, بيىل جەكە ينۆەستورلاردىڭ ەسەبىنەن تاعى 49 تۇرعىن ءۇيدىڭ قۇرىلىسى جۇرگىزىلىپ جاتىر ەكەن. جالپى اۋدانى 190 مىڭ شارشى مەتردەن اساتىن ۇيلەردە 1919 پاتەر بار.
اتالعان تۇرعىن ۇيلەر جەكە سالۋشىلار تاراپىنان سالىنىپ جاتىر. بۇل ۇيلەر دە «باسپانا» يپوتەكالىق كومپانياسىنىڭ «7-20-25» باعدارلاماسى, «تۇرعىن-ۇيقۇرىلىسجيناقبانكى» اق تاعى باسقا دا مەحانيزمدەر ارقىلى ساتىلىمعا شىعارىلادى.
قالادا قۇرىلىسى جۇرگىزىلىپ جاتقان باسپانالاردىڭ جاعدايىمەن تولىق تانىسقان شاھار باسشىسى ەرلان قۋانىش ۇلى جاۋاپتى سالا باسشىلارىنا ارحيتەكتۋرالىق قالا قۇرىلىسى كەڭەسىندە جوعارىدا اتالعان بارلىق ماسەلەلەردى كوتەرىپ, ءتيىستى شەشىم شىعارۋدى تاپسىردى.
ايتا كەتەيىك, بۇگىنگى تاڭدا قالا بويىنشا تۇرعىن ءۇي قۇرىلىسىنا جالپى مەملەكەت تاراپىنان 34,6 ملرد تەڭگە (قۇرىلىس باسقارماسى - 20,3 ملرد, «SHYMKENT» اكك» اق - 10 ملرد, تۇرعىن ءۇي جانە تۇرعىن ءۇي ينسپەكتسياسى باسقارماسى جاستارعا جالدامالى پاتەردى ساتىپ الۋى ءۇشىن 4,3 ملرد) جۇمىلدىرىلعان.
شىمكەنت
