Smart city (اقىلدى قالا) – بۇل ازاماتتار ءۇشىن قولايلى جاعداي جاساۋ ماقساتىندا يننوۆاتسيالىق شەشىمدەردى ەنگىزۋ ەسەبىنەن قالالىق رەسۋرستار مەن قىزمەتتەردى باسقارۋدىڭ تيىمدىلىگىن ارتتىرۋ جانە ينفراقۇرىلىمدى جەتىلدىرۋ جونىندەگى باستاما. يگى باستاما الداعى جىلدارى ەلىمىزدىڭ بىرقاتار قالالارىندا جۇزەگە اسىرىلماق.
بۇعان دەيىن پرەمەر-مينيستر اسقار مامينگە ارىس قالاسىن تسيفرلى تانسفورماتسيالاۋ مۇمكىندىگى تانىستىرىلعان بولاتىن. ەندى اتالعان ءۇش قالانىڭ قوعامدىق جانە جول بەينەباقىلاۋى, ورتالىقتارداعى اشىق
wi-fi, تالشىقتى-وپتيكالىق بايلانىس جانە «LPWAN» جەلىسى كوبەيتىلەدى. سونىمەن قاتار ەكولوگيالىق مونيتورينگ جۇرگىزۋ مەن جەدەل جاردەمنىڭ ديسپەتچەرلىك قىزمەتىن اۆتوماتتاندىرۋ جوسپارلانعان. بۇدان بولەك, مەموراندۋمعا سايكەس تسيفرلى دامۋ جانە «Big data» ەنگىزۋ مۇمكىندىگىن قاراستىرۋ ماسەلەلەرى بويىنشا تاراپتار اراسىندا ءوزارا ءىس-قيمىل جۇرگىزۋ كوزدەلگەن. بۇل رەتتە «Big data» وپتيمالدى شەشىم قابىلداۋعا سەپتىگىن تيگىزەدى.
كونفەرەنتسيا بارىسىندا ينفراقۇرىلىمدى وپەراتور تاراپىنان كاسىپورىنداردا تسيفرلى ترانسفورماتسيالاۋدىڭ جاڭا باعىتتارىن دامىتۋ تۋرالى ۇسىنىستار ايتىلدى. كومپانيا سپيكەرلەرى دايىن تەحنولوگيالىق بازا مەن تەلەكوم-وپەراتور ۇسىناتىن مۇمكىندىكتەر تۋرالى مالىمەتتەرمەن ءبولىستى. قازاقستانداعى بىرقاتار يندۋستريالىق جوبالار جينالعاندار اراسىندا تالقىلاندى.
ال جۇزەگە اسىرىلعان تسيفرلى ترانسفورماتسيالاۋ جوبالارىنىڭ مىسالى رەتىندە Smart Aqkol تاجىريبەلەرى ەسكەرىلەتىن بولادى.
«Smart Aqkol جوباسىنىڭ نەگىزگى ماقساتى قالاداعى ءتۇرلى قىزمەتتىڭ جۇمىس ناتيجەسىن باقىلاۋ ءۇشىن اقپاراتتىق اعىنداردى وڭدەۋ بازاسىندا «اقىلدى قالا» مودەلىن قۇرۋ. «Smart Aqkol» تۇجىرىمداماسىنا ينفراقۇرىلىم, بىرىكتىرىلگەن جۇيەلەر جانە سيگنالدار بەرۋ مەن دەرەكتەردى باقىلاۋ جانە ونى تالداۋ ەلەمەنتتەرىنىڭ جەلىسى كىرەدى. بارلىق دەرەكتەر جاعدايات ورتالىعىنا – ديسپەتچەر زالى بار, مونيتورينگ جاساۋعا ارنالعان بەينە-قابىرعامەن, بەينەكونفەرەنتسيا بايلانىسى جۇيەسىمەن, كولل-ورتالىعىمەن جابدىقتالعان وبەكتىگە تۇسەدى», دەدى «قازاقتەلەكوم» اق كورپوراتيۆتىك بيزنەس ديۆيزيونىنىڭ دەپارتامەنت ديرەكتورى سامات يمباەۆ.
ونىڭ ايتۋىنشا, يندۋستريا 4.0 جوبالارىن جۇزەگە اسىرۋ اياسىندا كومپانيا كاسىپورىنداردا سىمسىز تەحنولوگيا تۇرىندە دايىن ينفراقۇرىلىمدى ۇسىنىپ وتىر. بۇل – LORA بازالىق ستانساسى, «اقىلدى كاسكالار», ءتۇتىن بەلگىسىن بەرۋ قۇرالدارى, رادياتسيالىق سيگنالداردى مونيتورينگىلەۋ جانە ولشەۋ. سونىمەن بىرگە تەلەكوم-وپەراتوردىڭ سەرىكتەستەرمەن بىرگە جۇك كولىكتەرىنىڭ جۇمىسىن باقىلاۋعا ارنالعان ءموبيلدى اتس قۇرۋ جوبالارىن جۇزەگە اسىرۋ مۇمكىندىگى بار. كومپانيا ساراپشىلارىنىڭ پىكىرىنشە, «اقىلدى كولىكتىڭ» ءرولى وتە ماڭىزدى, سەبەبى كوپتەگەن كاسىپورىن مەن مەملەكەتتىك مەكەمەدە ونسىز جۇمىس جۇرگىزۋ مۇمكىن ەمەس.
اقكول قازاقستانداعى كوممۋنالدىق قىزمەتتەردىڭ بارلىق تۇتىنۋشىلارى تولىعىمەن تسيفرلاندىرىلعان ءبىرىنشى قالا. Smart Aqkol جوباسىنىڭ تۇجىرىمداماسى قاۋىپسىزدىكتەن ەكولوگياعا دەيىن 11 باعىتتان تۇراتىن «اقىلدى» قالالاردى دامىتۋدىڭ بىرىڭعاي ستاندارتىنا كىرەدى. ەگەر اقتاۋ, تۇركىستان جانە ارىس قالالارىندا Smart City قىزمەتى تولىق ەنگىزىلسە, ەلىمىزدەگى «اقىلدى قالالار» سانى كوبەيە تۇسپەك. بۇل ءوز كەزەگىندە تۇرعىنداردىڭ جايلى تۇرمىس كەشۋىنە پايداسىن تيگىزۋگە ءتيىس.
