الماتى قالاسى الەۋمەتتىك ءال-اۋقات باسقارماسى باسشىسىنىڭ مىندەتىن اتقارۋشى دانيار الكەباي ۇلىنىڭ ايتۋىنشا, 10 مىڭنان استام وتباسى اتاۋلى الەۋمەتتىك كومەك الاتىندار تىزىمىندە. بۇل تولەمدەر از قامتىلعان جانە كوپ بالالى وتباسىلارعا ماڭىزدى كومەك بولدى. مەملەكەتتىك قولداۋ ارقىلى ءزارۋ وتباسىلاردىڭ جاعدايى ءبىرشاما تۇراقتانعان.
اتاۋلى الەۋمەتتىك كومەك الاتىنداردىڭ ەڭبەككە جارامدىسى «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسىنا وراي جۇمىسپەن قامتۋ شارالارىن پايدالانۋعا مۇمكىندىگى بار. ناتيجەسىندە تۇراقتى جانە ۋاقىتشا جۇمىس ورىندارىنا جۇمىسقا ورنالاسۋعا, ەڭبەك نارىعىندا سۇرانىسقا يە ماماندىقتار بويىنشا قىسقا مەرزىمدى كاسىبي كۋرستاردان ءوتىپ, بيزنەس جوبالارىن ىسكە اسىرۋ مۇمكىندىكتەرى قاراستىرىلعان. وسى باعىتتاعى جوبالار ءۇشىن 200 اەك – 505 مىڭ تەڭگە كولەمىندە گرانت بەرىلەدى.
الماتىلىق جالعىز باستى انا زاۋرەش ءجۇسىپوۆا مەملەكەتتىك قولداۋعا يە بولعاندار قاتارىندا. «شەبەر» ورتالىعىندا تىگىنشى ماماندىعىن يگەرگەن زاۋرەشكە دە الەۋمەتتىك كومەك تاعايىندالعان. تىگىنشىلىكتى قاجەتتى كاسىپ دەپ سانايتىن زاۋرەش ەندىگى كەزەكتە بيزنەس جوسپارىن جاساپ, جەكە كاسىبىن اشۋدى جوسپارلاپ وتىر. ال ءۇش بالانىڭ اناسى انار قىلىشەۆا وتباسىنىڭ جالعىز اسىراۋشىسى. باقىلاۋشى-كاسسير قىسقا مەرزىمدى كۋرسىنان وتكەن انارعا 77 186 تەڭگە كولەمىندە الەۋمەتتىك كومەك تاعايىندالىپ, قازىرگى كەزدە وتباسى مەكتەپتىڭ قاجەتتىلىكتەرىن الىپ, جاعدايىن ءبىرشاما جەڭىلدەتتى.
مەملەكەتتىك باعدارلامانى ءتيىمدى پايدالانىپ, تۋريزم اگەنتتىگىندە ءتالىم العان البينا امرەنوۆا دا كاسىپكەرلىكپەن اينالىسۋدى ماقسات ەتەدى. ونىڭ ايتۋىنشا, جۇمىسپەن قامتۋ ورتالىعىنان بەرىلگەن ناقتى كومەك جاڭا ماماندىق الىپ, زاماناۋي اقپاراتتاردى يگەرىپ, ءوزىن ءوزى دامىتۋعا زور مۇمكىندىك بەرىپ وتىر.
سونىمەن قاتار 2 جاس پەن 17 جاس ارالىعىنداعى بالاسى بار كوپ بالالى انا سىمبات اباتوۆاعا دا الەۋمەتتىك كومەك تاعايىندالىپتى. وتاعاسىنىڭ جۇمىس ىستەگەنىنە قاراماستان, كەلەتىن تابىس جەتكىلىكتى بولماعاندىقتان وتباسىنا كومەك رەتىندە بەرىلگەن 67 604 تەڭگەنىڭ پايداسى اجەپتاۋىر. ال سىمبات جۇمىس بەرۋ ورتالىعىنا تىركەلىپ, اسپازشى ماماندىعى بويىنشا قىسقا مەرزىمدى كۋرستان وتكەن. قازىرگى كەزدە الماتى مەملەكەتتىك بيزنەس كوللەدجىنەن سەرتيفيكات الىپ, ءوز كاسىبىن اشۋ ءۇشىن بيزنەس جوسپارىن جاساۋدا. سونىمەن قاتار جۇمىس بەرۋ ورتالىعىندا تىركەلىپ, كەيىننەن «اگروپرومەنەرگوسناب-1» جشس جۇمىسقا ورنالاسقان. مەكتەپكە دەيىنگى 1, مەكتەپ جاسىنداعى 3 بالاسى بار كوپ بالالى انا ۆيكتوريا فيلليپوۆيچ اعىمداعى جىلدىڭ مامىر ايىنان باستاپ الەۋمەتتىك كومەك الا باستاعان.
ال سوڭعى كەزدەرى مەملەكەتتەن بەرىلەتىن الەۋمەتتىك كومەككە ءزارۋ وتباسىلارمەن قاتار ءوز تابىسىن جاسىرعان, جاعدايى بار ازاماتتاردىڭ الىپ جاتقاندىعى جايىنداعى دەرەكتەر انىقتالۋدا. مۇنداي كەرەعار ارەكەتتەر قوعامدى الاڭداتۋىمەن قاتار, جالعان دەرەكتەرمەن قۇجات وتكىزىپ كەلگەن ازاماتتاردىڭ وتباسىنداعى احۋالعا دا اسەر ەتەدى دەپ سانايدى الەۋمەتتىك سالا ماماندارى. سوندىقتان دا ازاماتتاردىڭ جالعان اقپارات بەرۋگە بەيىم پيعىلدارى, جوقتى جەلەۋ ەتىپ كەلەڭسىزدىكتەرگە سانالى تۇردە جول بەرۋى بۇگىندە قوعام بولىپ كۇرەسۋدى قاجەت ەتەتىن كوكەيكەستى ماسەلە.
الماتى
