كەزدەسۋ بارىسىندا مەملەكەتتەر كوشباسشىلارى ەكىجاقتى ىنتىماقتاستىقتىڭ پەرسپەكتيۆالارى, سونىڭ ىشىندە, ەۋروپالىق وداق شەڭبەرىندەگى قارىم-قاتىناس ماسەلەسى تالقىلادى.
قاسىم-جومارت توقاەۆ نيۋ-يوركتەگى بۇۇ باس اسسامبلەياسى سەسسياسىنىڭ اياسىنداعى جوعارى دەڭگەيدەگى قازاقستان-پولشا كەزدەسۋلەرى يگى داستۇرگە اينالعانىن اتاپ ءوتتى. قاسىم-جومارت توقاەۆ اندجەي دۋدانىڭ 2015 جىلى قىركۇيەك ايىندا قازاقستاننىڭ تۇڭعىش پرەزيدەنتى نۇرسۇلتان نازارباەۆپەن تانىسقانىن, سونداي-اق, پولشا كوشباسشىسىنىڭ 2018 جىلدىڭ قاڭتار ايىندا ەلباسىمەن بىرگە بۇۇ قاۋىپسىزدىك كەڭەسىنىڭ تاقىرىپتىق بريفينگىنە قاتىسقانىن مىسالعا كەلتىردى.
مەملەكەت باسشىسى نۇر-سۇلتان مەن ۆارشاۆا اراسىنداعى دوستىق جانە ءوزارا ءتيىمدى قارىم-قاتىناستاردى ودان ءارى نىعايتۋعا دايىن ەكەنىن اتاپ ءوتىپ, قازاقستان مەن پولشا اراسىنداعى بايلانىستاردىڭ بەكي تۇسكەنىن ايتتى.
– 2018 جىلى ەلدەرىمىزدىڭ اراسىنداعى ەكى جاقتى تاۋار اينالىمى 1,2 ملرد دوللاردى قۇرادى. قازاقستاندا پولشانىڭ 100-دەن استام كومپانياسى بەلسەندى جۇمىس ىستەۋدە. ءبىزدىڭ قارىم-قاتىناستارىمىزدىڭ دامۋىنا قازاقستاننىڭ پولشا ازاماتتارى ءۇشىن ۆيزالىق رەجيمدى الىپ تاستاۋى, سونداي-اق, 2017 جىلى نۇر-سۇلتان مەن ۆارشاۆا اراسىندا تىكەلەي اۋە قاتىناسىنىڭ ىسكە قوسىلعانى ەلەۋلى ۇلەس قوستى, – دەدى قاسىم-جومارت توقاەۆ.
سونىمەن قاتار, قاسىم-جومارت توقاەۆ اندجەي دۋداعا قازاقستاندا ۇلتتىق قوعامدىق سەنىم كەڭەسى قۇرىلعانىن ايتتى. ءدال وسىنداي قۇرىلىم پولشا پرەزيدەنتىنىڭ باسشىلىعىمەن بۇل مەملەكەتتە دە جۇمىس ىستەيدى.
