بۇگىنگى كۇنگە دەيىن دارحان دالانىڭ ۇلىلىعىن دارىپتەگەن جاۋھار جىردىڭ ەكى نۇسقاسى بىزگە بەلگىلى.
«قورقىت اتا كىتابىنىڭ» درەزدەن جانە ۆاتيكان قالالارىندا ساقتالعان ەكى قولجازباسى بار. ءبىرىنشى نۇسقادا 12, ەكىنشىسىندە 6 داستان جازىلعانى بۇرىننان ءمالىم. ەندەشە, يراندىق عالىم ۇسىنىپ وتىرعان تاعى ءبىر نۇسقا سول قۇندى قازىنامىزدىڭ مولايۋىنا سۇبەلى ۇلەسىن قوساتىنى انىق. ۆەلي مۋحاممەد حودجا ۇزاق جىلدان بەرى قۇندى جادىگەرلەر جيناۋمەن اينالىسىپ كەلەدى. وسىنداي ىزگىلىكتىڭ ءىستىڭ ناتيجەسىندە ونىڭ قولىنا قادىم زاماننىڭ قيلى-قيلى بەينەسىن قاز-قالپىندا جەتكىزەتىن جاۋھار جىردىڭ جاڭا نۇسقاسى تۇسكەن. يراندىق كوللەكتسيونەر بۇل قولجازبانى كەزدەيسوق قولىنا تۇسىرگەن. يران استاناسى - تەگەران شاھارىنداعى كىتاپ دۇكەنىنە باس سۇعادى. سول ماڭدا وعان وندا ءبىر ادام اق ماتاعا ورالعان كىتاپتى ساتاتىنىن ايتادى. ول دۇنيەنىڭ قولجازبا كىتاپ ەكەنىن اڭعارعان ۆەلي مۋحاممەد حودجا ساتىپ الادى. كەيىننەن ونى تۇركيالىق عالىمدارعا وقىتتى. «قۇندى دۇنيە «قورقىت اتا كىتابىنىڭ» تاعى ءبىر نۇسقاسى ەكەنى انىقتالدى. مۇنداي تۇجىرىمدى اقش ەلىندەگى عالىمدار دا جاسادى. سودان كەيىن ەلگە جاريا ەتتىم. قولجازبانىڭ كوشىرمە نۇسقاسىن سىر وڭىرىنە الىپ كەلۋگە شەشىم قابىلدادىم», - دەدى ۆەلي مۋحاممەد حودجا.
بۇدان بۇرىن ادەبيەتتانۋ PhD دوكتورى بەكارىس نۇريمان «قورقىت اتا» كىتابىنىڭ تاعى ءبىر ەپوسى تابىلعانىن جەتكىزگەن ەدى. بۇل جاعىمدى جاڭالىقتى تۇركيانىڭ بايبۇرت قالاسىندا وتكەن حالىقارالىق سيمپوزيۋمدا پروفەسسور مەتين ەكيجي بايانداماسىندا بايانداپ بەرگەن.
بەكارىس نۇريماننىڭ ايتۋىنشا, يراندىق كوللەكتسيونەر ايتقان نۇسقا تۇرىك عالىمدارى تاراپىنان ماقۇلدانعان. ول «قورقىت اتا» كىتابىنىڭ ءۇشىنشى نۇسقاسى بولىپ سانالادى.
