قوعام • 20 قىركۇيەك، 2019

قازاقستاننىڭ تۇرعىن ءۇي قۇرىلىس جيناق بانكى جۇيەسى ارقىلى 18 مىڭ وتباسى جاڭا پاتەر كىلتتەرىن الدى

59 رەتكورسەتىلدى

ۇكىمەت ءۇيىنىڭ ءباسپاسوز ورتالىعىندا وتكەن ءباسپاسوز كونفەرەنتسياسىندا «قازاقستاننىڭ تۇرعىن ءۇي قۇرىلىس جيناق بانكى» اق باسقارما ءتورايىمى ءلاززات يبراگيموۆا «نۇرلى جەر» مەملەكەتتىك باعدارلاماسى بويىنشا تۇرعىن ءۇي بەرۋ تۋرالى ايتىپ بەردى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.

تۇڭعىش پرەزيدەنت – ەلباسى ن. نازارباەۆتىڭ تاپسىرماسى بويىنشا بيىل «قازاقستاننىڭ تۇرعىن ءۇي قۇرىلىس جيناق بانكى» اق تابىسى تومەن وتباسىلار ءۇشىن «باقىتتى وتباسى» جەڭىلدەتىلگەن نەسيە بەرۋ باعدارلاماسىن ىسكە قوستى. بۇل باعدارلامادا العاش رەت الەۋمەتتىك ادىلەتتىلىك قاعيداسى قولدانىلدى. باعدارلاماعا سوڭعى جارتى جىلدا وتباسىنىڭ ءاربىر مۇشەسىنە شاققانداعى كىرىسى 42 500 تەڭگەدەن اسپايتىن وتباسىلار قاتىسا الادى.

«بۇگىن بىزگە وسىنداي وتباسىلاردان 5 مىڭ ءوتىنىش كەلىپ ءتۇستى. ولاردىڭ 2،5 مىڭى ماقۇلداندى. ولار قازىر پاتەر ىزدەپ، قۇجاتتارىن جيناپ جاتىر. 455 وتباسى جاڭا ۇيلەرىنە كوشتى»، — دەدى ل. يبراگيموۆا.

ل. يبراگيموۆا سونىمەن قاتار، ەگەر «باقىتتى وتباسى» باعدارلاماسى بويىنشا باسپانا الۋعا رۇقسات العان ادامداردا باستاپقى جارنا ءۇشىن تولەيتىن قاراجاتتارى جەتىسپەسە، ولار اكىمدىكتەردىڭ تۇرعىن ءۇي سەرتيفيكاتتارىنا سەنىم ارتا الاتىنىن ايتتى. بۇگىنگى تاڭدا اقتوبە، نۇر-سۇلتان قالالارىنىڭ اكىمدىكتەرى 1 ميلليون تەڭگەگە دەيىن تۇرعىن ءۇي سەرتيفيكاتتارىن ءبولدى.

«كوش باستاپ تۇرعان ءۇش ءوڭىردى اتاپ وتكىم كەلەدى. بىزگە نۇر-سۇلتان قالاسىنىڭ تۇرعىندارىنان 800-دەن استام، الماتىدان – 650، اقتوبە مەن اقتوبە وبلىسىنان 542 ءوتىنىم كەلىپ ءتۇستى»، — دەدى ل. يبراگيموۆا.

قتقجب دەرەكتەرىنە سايكەس، جىل سوڭىنا دەيىن 5 مىڭ قازاقستاندىق وتباسى ءوز پاتەرلەرىنىڭ كىلتتەرىن الادى.

2020 جىلى مەملەكەت باسشىسىنىڭ تاپسىرماسىمەن «نۇرلى جەر» باعدارلاماسى اياسىندا جوسپارلانعان مەملەكەتتىك كومەك كولەمى ۇلعايتىلادى. ەندى 10 مىڭ قازاقستاندىق وتباسى «باقىتتى وتباسى» باعدارلاماسى بويىنشا باسپانا ساتىپ الۋ ءۇشىن جىلدىق 2%-بەن جەڭىلدەتىلگەن نەسيە الادى. العاشقى جارنا 10% قۇرايدى.

جالپى، «نۇرلى جەر» باعدارلاماسىن جۇزەگە اسىرۋدىڭ 2،5 جىلىندا قازاقستاننىڭ تۇرعىن ءۇي قۇرىلىس جيناق بانكى جۇيەسى ارقىلى 18 235 وتباسى جاڭا پاتەر كىلتتەرىنە يە بولدى.

«جىل سوڭىنا دەيىن «باقىتتى وتباسى» مەن اكىمدىكتەردەن بەرىلەتىن پاتەرلەردى ەسكەرە وتىرىپ، 25 مىڭ قازاقستاندىق وتباسى قونىس تويىن تويلايدى دەپ ويلايمىز. وتباسىنىڭ ورتاشا كوەففيتسيەنتى 3،8 بولعان كەزدە 100 مىڭعا جۋىق قازاقستاندىق 2،5 جىلدا جاڭادان قونىستانۋشىلار بولدى»، — دەدى قازاقستاننىڭ تۇرعىن ءۇي قۇرىلىس جيناق بانكىنىڭ باسقارما ءتورايىمى.

قازىرگى تاڭدا قازاقستاننىڭ تۇرعىن ءۇي قۇرىلىس جيناق بانكى جۇيەسىندە 1 416 000 سالىمشى تىركەلگەن. اعىمداعى جىلدىڭ 8 ايىندا 210 مىڭنان استام جاڭا دەپوزيت اشىلدى.

سوڭعى جاڭالىقتار

ەسىك نەگە «تەسىك»؟

قوعام • كەشە

ۇقساس جاڭالىقتار