ءسىم-ءنىڭ باسقارۋشىلىق قۇرامىمەن كەزدەسۋدە ۇكىمەت باسشىسى ب. اتامقۇلوۆقا قر سىرتقى ىستەر ءمينيسترى قىزمەتىندەگى جۇمىسى ءۇشىن العىس ايتىپ, وعان يدم باسشىسى رەتىندەگى قىزمەتىنە تابىس, ال ونىڭ ءىزىن باسقان م. تىلەۋبەردىگە سىرتقى ىستەر ءمينيسترى قىزمەتىندە جەمىستى جۇمىس تىلەدى.
اسقار مامين ب. اتامقۇلوۆتى يدم ۇجىمىنا تانىستىرىپ, تاعايىندالعان ءمينيستردىڭ ۇلكەن تاجىريبەسى مەن قۇزىرەتىن اتاپ ءوتتى.
تىلەۋبەردى مۇحتار بەسكەن ۇلى 1968 جىلى 30 ماۋسىمدا شىمكەنت وبلىسىنىڭ اقسۋ اۋىلىندا تۋعان. 1990 جىلى س.م. كيروۆ اتىنداعى قازاق مەملەكەتتىك ۋنيۆەرسيتەتىن ء(ال-فارابي اتىنداعى قازاق ۇلتتىق ۋنيۆەرسيتەتىن) فيلوسوف ماماندىعى بويىنشا بىتىرگەن. ەڭبەك جولىن م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتى جانىنداعى ازيا جانە افريكا ينستيتۋتىندا (ماسكەۋ قالاسى, رەسەي) جانە ەنسە ۋنيۆەرسيتەتى (سەۋل قالاسى, وڭتۇستىك كورەيا) جانىنداعى تىلدەر ينستيتۋتىندا تالىمگەر رەتىندە باستاعان. 1993 جىلدان بەرى قر ءسىم جۇيەسىندە جۇمىس ىستەيدى, مالايزيا, يندونەزيا رەسپۋبليكاسى, برۋنەي دارۋسسالام جانە فيليپپين رەسپۋبليكاسى, شۆەيتساري, ليحتەنشتەين كنيازدىعى, ۆاتيكان مەملەكەتى ەلدەرىندە توتەنشە جانە وكىلەتتى ەلشى قىزمەتىن اتقاردى.
2016 جىلدىڭ ناۋرىز ايىنان باستاپ – قازاقستان رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى.
اتامقۇلوۆ بەيبىت باكىر ۇلى 1964 جىلى 19 مامىردا الماتى وبلىسىنىڭ ۇزىناعاش اۋىلىندا دۇنيەگە كەلگەن. 1986 جىلى ۆ. ي. لەنين اتىنداعى قازاق پوليتەحنيكالىق ينستيتۋتىنىڭ مەتاللۋرگيا فاكۋلتەتىن اياقتادى. 2006 جىلدان باستاپ ديپلوماتيالىق قىزمەتتە بولدى. قر-نىڭ گەرمانياداعى باس كونسۋلى, قر مالايزياداعى توتەنشە جانە وكىلەتتى ەلشىسى بولدى. وڭتۇستىك قازاقستان وبلىسىنىڭ اكىمى بولىپ قىزمەت ەتتى, قر يندۋستريا جانە جاڭا تەحنولوگيالار مينيسترلىگى مەن ينۆەستيتسيالار جانە دامۋ مينيسترلىگىنىڭ جاۋاپتى حاتشىسى بولدى. 2016 جىلدىڭ قازان ايىنان باستاپ - قر قورعانىس جانە اەروعارىش ونەركاسىبى ءمينيسترى, 2018 جىلدىڭ 26 جەلتوقسانىنان باستاپ قازىرگە دەيىن قر سىرتقى ىستەر ءمينيسترى لاۋازىمىن اتقاردى.
