مەموراندۋم اياسىندا سىبايلاس جەمقورلىققا قارسى ءىس-قيمىل سالاسىندا قابىلداناتىن شارالاردىڭ تيىمدىلىگىن ارتتىرۋعا, ەلىمىزدىڭ وقۋ ورىندارىندا سىبايلاس جەمقورلىقتى, قۇقىق بۇزۋشىلىقتاردى جاساۋعا ىقپال ەتەتىن سەبەپتەر مەن جاعدايلاردى جويۋعا, جاتاقحانالاردىڭ جاعدايىنا مونيتورينگ جاساۋعا جانە Nur Otan پارتياسىنىڭ «تازا سەسسيا» اكتسياسىن وتكىزۋگە جول اشادى.
«قىركۇيەكتىڭ سوڭىنا دەيىن Jas Otan جق ەلىمىزدىڭ ۇلتتىق جانە مەملەكەتتىك ۋنيۆەرسيتەتتەرىندە «تازا سەسسيا» اكتسياسىن وتكىزەدى. ماقساتىمىز جاستار اراسىندا سىبايلاس جەمقورلىققا «نولدىك» توزبەۋشىلىك مادەنيەتىن قالىپتاستىرۋ, جەمقورلىققا قارسى مىنەز-ق ۇلىق ۇلگىسىن ودان ءارى دامىتۋ, ەلىمىزدەگى وقۋ ورىندارىندا سىبايلاس جەمقورلىق جاعدايىن انىقتاۋ, ولاردى بولدىرماۋ ءۇشىن تەتىكتەردى قاراستىرۋ. اكتسيا ناتيجەسى جوو-داعى سىبايلاس جەمقورلىقتىڭ قازىرگى جاي-كۇيىن كورسەتىپ, وقۋ ۇردىسىندە سىبايلاس جەمقورلىق ارەكەتتەرىنىڭ تۋىنداۋىنا سەبەپ بولاتىن نەگىزگى ماسەلەلەردى انىقتايدى», دەدى Jas Otan جق توراعاسى داۋلەت كارىبەك.
«ادالدىق الاڭى» جوباسى اياسىندا جاسالعان بۇل مەموراندۋم جەمقورلىقتى جويۋعا, ازاماتتار جانە بيزنەس ءۇشىن كەدەرگىسىز جانە قولايلى جاعدايلار جاساۋعا, اۋقىمدى قوعامدىق باقىلاۋ جۇرگىزۋگە, تۇرمىستىق سىبايلاس جەمقورلىقتى جويۋعا باعىتتالعان.
مەموراندۋم ءوزارا ءىس-قيمىل, اقپارات الماسۋ جانە بىرلەسكەن جوبالاردى, اكتسيالاردى, سەمينارلاردى ىسكە اسىرۋ ارقىلى جۇزەگە اسىرىلادى.
كەزدەسۋ قورىتىندىسى بويىنشا ەكى تاراپ سىبايلاس جەمقورلىققا قارسى ساياساتتى ءتيىمدى ىسكە اسىرۋعا باعىتتالعان شارالاردى قابىلداۋعا مۇمكىندىك بەرە وتىرىپ, ءوزارا ءىس-قيمىلعا قۋاتتى سەرپىن بەرەتىنىنە سەنىم ءبىلدىردى.
«ەگەمەن-اقپارات»
