اۋىلدى جەرلەردەگى حالىقتى جاپپاي جۇمىسپەن قامتۋ ماڭىزدى ماسەلە. ال اۋىل تۇرعىندارىن جۇمىستاندىرۋدىڭ ءتيىمدى جولى رەتىندە قوسالقى شارۋاشىلىققا قولداۋ كورسەتىپ, ونى دامىتۋ قاراستىرىلعان. وسى ورايدا اسقار مىرزاحمەتوۆ باستاعان جۇمىسشى توپ وڭىردەگى بارلىق اۋداندار مەن اۋىلدىق ەلدىمەكەندەرگە ارنايى بارىپ, ناتيجەسىندە 138 مىڭ اۋلا تولىق زەردەلەنگەن بولاتىن. تالداۋ ناتيجەسى كورسەتكەندەي, سالىستىرمالى تۇردە ءوڭىر تۇرعىندارى ءتيىستى ۇيىمداستىرۋ جۇمىستارىنىڭ جوقتىعىنان قوسالقى شارۋاشىلىقتى ءتيىمدى تابىس كوزىنە اينالدىرا الماي وتىر.
وسى تۇرعىدا زەردەلەۋ بارىسىندا تۇرعىنداردىڭ ۇسىنىستارىمەن حالىقتىڭ تۇرمىسىن جاقسارتۋ ماقساتىندا 5 باعىت قاراستىرىلعان. ولار ءۇي ىرگەسىندەگى جانە اۋىل سىرتىنداعى (پايلىق) جەرلەردى ءتيىمدى پايدالانۋ, ءۇي اۋلاسىندا مال جانە قۇس ونىمدىلىگىن ارتتىرۋ, قوسالقى شارۋاشىلىقتاردى جەمىستى جۇرگىزۋگە قولبايلاۋ ماسەلەلەردى كووپەراتيۆتەر ارقىلى شەشۋ جانە اۋىلداعى شاعىن جوبالاردى قارجىلاندىرۋ بولىپ وتىر. اتالعان 5 باعىت بويىنشا جالپى قۇنى 46,4 ميلليارد تەڭگە بولاتىن 31 مىڭنان استام جوبانى ىسكە اسىرۋ مۇمكىنشىلىگى انىقتالدى. ناتيجەسىندە 131 مىڭ وتباسى نەمەسە 600 مىڭنان استام ادام ايىنا ورتاشا ەسەپپەن 128 مىڭ تەڭگە كولەمىندە تۇراقتى تابىسپەن قامتىلىپ, 68 مىڭ تۇرعىن ءوزىن-ءوزى جۇمىسپەن قامتىعاندار مەن جۇمىسسىزدار جەكە كاسىپكەرگە اينالادى دەپ كۇتىلۋدە. سول سەكىلدى, اۋىل شارۋاشىلىعىنىڭ جالپى ءونىمى 34 پايىزعا ۇلعايىپ, ءسۇت پەن ەتتى قايتا وڭدەۋ كاسىپورىندارى جۇكتەمەسىنىڭ 30 پايىزعا ارتۋى ەسەپتەلگەن. بۇل الداعى ۋاقىتتاردا جالپى جۇمىستىڭ تۇپكى تابىسىنا اينالادى.
جامبىل وبلىسى اكىمدىگىنىڭ مالىمەتىنشە, اۋەلى پيلوتتىق جوبانىڭ جەمىستىلىگىنە كوز جەتكىزۋ ءۇشىن ءارى جۇمىستىڭ ۇلگى-باستاۋى رەتىندە وبلىستىڭ ون اۋىلدىق وكرۋگى تاڭدالىپ الىنعان. ول – جوسپارلى جۇمىستىڭ العاشقى كەزەڭى بولماق. بۇل رەتتە اسقار مىرزاحمەتوۆ ۇكىمەت باسشىسى اسقار مامينگە العاشقى كەزەڭدە اتقارىلار جۇمىستار جونىندە جان-جاقتى اقپارات بەردى. تاڭدالىپ الىنعان ون اۋىلدىق وكرۋگ بويىنشا 7 مىڭنان استام اۋلا قامتىلادى دەسەك, وندا 1117 گەكتار ءۇي ىرگەسىندەگى جەرلەر بار. شارا بارىسىندا سول جەرلەردى ۇتىمدى ۇقساتۋدىڭ جولدارى دا ناقتى جۇزەگە اسادى. وڭىردەگى باۋ-باقشالىقتىڭ تيىمدىلىگىن ەسەلەۋدە جىلىجايلاردىڭ, مال شارۋاشىلىعىن كوتەرۋدە كووپەراتيۆتەردىڭ ماڭىزدىلىعى ەسكەرىلگەن. سونداي-اق, ول ءۇشىن ساپالى تۇقىم, كوشەت, تىڭايتقىشتاردى تاۋىپ, جەتكىزىپ بەرۋ, ءتىپتى, تاپشى تەحنيكا مەن قاجەتتى ماماندارمەن قامتۋ ماسەلەسى دە وڭىنان شەشىمىن تابادى. سونىمەن قاتار, زەردەلەۋ بارىسىندا مۇنداعى ءار اۋىلدىق وكرۋگتىڭ تابيعاتى, ياعني جەر مەن سۋ جاعدايلارى دا ەسكەرىلگەن. ناقتى ناتيجەدە ونىمدىلىكتىڭ 2-4 ەسە وسىمىنە قول جەتكىزۋ جوسپارلانعان. بۇگىندە پيلوتتىق اۋىلدىق وكرۋگتەردە قوسالقى شارۋاشىلىقتان بولەك 137 شاعىن جوبالاردىڭ ءتىزىمى جاساقتالىپ, ولاردى جۇزەگە اسىرۋدىڭ جول-جوباسى بەكىتىلگەن.
اسقار مىرزاحمەتوۆ جوبانى قارجىلاندىرۋ شاراسى اكىمدىككە كرەديت بەرۋ جۇيەسىمەن «ەڭبەك» باعدارلاماسى اياسىندا ىسكە اسىرۋ ۇسىنىلاتىنىن ايتىپ, اكىمدىك, ارى قاراي سەنىم اگەنتى ارقىلى 2,5 پايىزدىق نەسيە رەتىندە تۇرعىنداردى, كووپەراتيۆتەردى قارجىلاندىراتىنىن جەتكىزدى. بۇگىندە نەسيە الۋشىلاردىڭ العاشقى بازاسى ءتۇزىلىپ تە ۇلگەرگەن. جالپى, ون اۋىلدىق وكرۋگ بويىنشا جوبالاردىڭ ىسكە اسۋىمەن 7 مىڭ وتباسى نەمەسە 35 مىڭ ادام كەلەسى جىلدىڭ قورىتىندىسى بويىنشا ايىنا كەمىندە 104 مىڭ تەڭگە ء(وسىم 2,5 ەسە) تابىسپەن قامتاماسىز ەتىلەدى دەپ كۇتىلۋدە. ال, 2229 تۇرعىن ءوزىن-ءوزى جۇمىسپەن قامتىعاندار مەن جۇمىسسىزدار مىندەتتى زەينەتاقى, سالىق جانە باسقا دا تولەمدەردى تولەيتىن كاسىپكەرلەرگە اينالاتىن بولادى.
ء«بىز جوبانى ىسكە اسىرۋعا دايىنبىز. اكىمدىككە قاتىستى بارلىق ۇيىمداستىرۋ پىسىقتالعان. سونىڭ ىشىندە بيۋدجەتتىك اكىمشى بولاتىن اۋىل شارۋاشىلىعى باسقارماسىنىڭ شتاتتىق سانى 18 قىزمەتكەرگە كوبەيتىلدى. اۋدان, اۋىل اكىمدەرىنىڭ ارنايى جۇمىس الگوريتمى بەكىتىلدى, ءتيىستى جۇمىس توپتارى قۇرىلدى جانە جاۋاپتى ماماندار وقىتىلدى. پيلوتتىق اۋىل وكرۋگتەرىندە بىرنەشە كەزدەسۋلەر وتكىزىلىپ, كووپەراتيۆ توراعالارى انىقتالدى», دەدى ءوز سوزىندە اسقار مىرزاحمەتوۆ.
پرەمەر-مينيستر اسقار مامين بۇل جوبانىڭ ماڭىزدىلىعىن اتاپ ءوتىپ, قولدايتىنىن ءبىلدىرىپ, ءتيىستى شەشىمدەردىڭ دەر كەزىندە راسىمدەلۋىن نازارعا الاتىنىن جەتكىزدى. جاۋاپتى تۇلعالارعا پيلوتتىق جوبانىڭ مەحانيزمىن ۇيىمداستىرۋدى تاپسىردى.
