«Bolashaq» قاۋىمداستىعى ۇيىمداستىرعان باسقوسۋدىڭ ورتاسىنان قالا اكىمى ەرلان ايتاحانوۆ تا تابىلىپ جاستار ۇيىمدارىنىڭ جەتەكشىلەرىمەن, بەلسەندى ستۋدەنتتەرمەن سۇحباتتاستى. ول پرەزيدەنت قاسىم-جومارت توقاەۆتىڭ جولداۋىندا كورسەتىلگەن ازاماتتىق سەكتوردىڭ بەلسەندىلىگىن ارتتىرۋ باعىتىنا توقتالىپ, تىڭ يدەياسى بار جاستاردى قولداۋ ماڭىزدى ەكەنىن ايتتى.
– ءبىزدىڭ جاستار – بيزنەسكە بەيىم. قاي سالادا دا بىلىممەن قوسا تاربيە ماسەلەسىنە دە ءمان بەرۋ كەرەك. جالىندى جاستار قوعامدىق جۇمىسقا, ازاماتتىق سەكتورعا بىلەك سىبانا اتسالىسسا, مەملەكەتتىك باسەكەگە قابىلەتتى بولۋىنا ۇلەس قوسادى. سوندىقتان مەن جاستاردان ناقتى ۇسىنىستار كۇتەمىن, – دەدى شاھار باسشىسى.
جاڭا فورماتتاعى جوبادا «Bolashaq» قاۋىمداستىعىنىڭ اتقارۋشى ديرەكتورى لاۋرا دەمەسىنوۆامەن كەزدەسكەن جاستار ءبىلىم, عىلىم سالاسى بويىنشا وزدەرىن تولعاندىرىپ جۇرگەن سۇراقتارعا جاۋاپ الا ءبىلدى.
سونىمەن قاتار تاعىلىمدى كەزدەسۋدە جاستار جۇمىسشىلار قاۋىمداستىعى كەڭەسىنىڭ توراعاسى نۇرلىباي ناۋرىزباەۆ, ستراتەگيالىق دامۋ جونىندەگى ديرەكتور جانە «Salem Coffee & Tea» نەگىزىن قالاۋشى, جاس كاسىپكەر ايات ازيموۆ, GR-كەڭەسشىسى, «بولاشاق» باعدارلاماسىنىڭ تۇلەگى نۇرلان وتەشەۆ, «ارناۋ» دامۋ ورتالىعى» قوعامدىق بىرلەستىگىنىڭ توراعاسى, بايلانىس مامانى, بلوگەر ۇلان ابىشەۆ وزدەرىنىڭ تاجىريبەلەرىمەن ءبولىسىپ, ىسكەرلىك ساباعىن وتكىزدى.
جاستارمەن جۇمىس ىستەيتىن ۇكىمەتتىك ەمەس ۇيىمداردىڭ, جاستار رەسۋرستىق ورتالىقتارىنىڭ جۇمىسىن جاقسارتۋدى كوزدەگەن ءىس-شارادا جينالعان قاۋىمعا الەۋمەتتىك تاپسىرىستارمەن جۇمىس ىستەۋدىڭ ءجونى ءتۇسىندىرىلدى.
ءوز كەزەگىندە نۇرلان وتەشوۆ جاستاردى كاسىپكەرلىككە قالاي باۋلۋ كەرەكتىگى جونىندە كەڭەس بەرسە, «بولاشاق» باعدارلاماسىنىڭ تۇلەگى ەراسىل تولەباەۆ شىمكەنتتە بولاشاقتىقتاردىڭ فيليالىن اشساق دەگەن ۇسىنىسىن ءبىلدىردى. ال «جەتىگەن» مەكتەبىنىڭ ديرەكتورى كاميلا ەسقاراەۆا ءال-ءفارابيدىڭ 1150 جىلدىعىنا وراي ءال-كانۋن اسپابىندا عۇلاما عالىمنىڭ تۋىندىلارىن جاڭعىرتىپ جاتقانىن مارقايا جەتكىزدى.
بۇعان قوسا قالانىڭ قوعامدىق كەڭەسىنە مەملەكەتتىك ەمەس ۇيىمدار مۇشەلەرىن دە قاتىستىرۋ, نۇر-سۇلتان مەن الماتىداعىداي جاستاردىڭ اۋقىمدى كوۆوركينگ ورتالىعىن قۇرۋ, رەسپۋبليكالىق دەڭگەيدە اقىنداردىڭ پوەتيكالىق دۋەلى مەن «اقىن مەن ءانشى» جوباسىن قايتا جانداندىرۋ, پىكىرسايىس كلۋبى اشۋ سياقتى ۇسىنىستار ايتىلدى.
ەرلان ايتاحانوۆ بارلىق وي-پىكىردى مۇقيات تىڭداپ, قولدايتىنىن ايتتى. الداعى جىلى اباي قۇنانباي ۇلىنىڭ 175 جىلدىق جانە ءال-ءفارابيدىڭ 1150 جىلدىق مەرەيتويلارىندا اتقارىلار شارالاردا جاستاردى بەلسەندى بولۋعا شاقىردى. سونداي-اق قالا باسشىسى جاستاردى ماسىلدىق پسيحولوگيادان ارىلىپ, ەڭبەكقور بولۋعا, ەلدىڭ دامۋىنا ءوز ۇلەسىن قوسىپ, بەلگىلى ءبىر ىسپەن اينالىسۋعا ۇندەدى.
شىمكەنت
