الاتاۋدىڭ باۋرايىندا قۇلپىرىپ جاتقان اسەم الماتىنىڭ تۋعان كۇنىنە وراي وتكىزىلەتىن Almafest فەستيۆالى – بەرەكە مەن ىزگىلىكتىڭ, ونەر مەن قۇرمەتتىڭ مەرەكەسى. ەلىمىزدىڭ تانىمال تۇلعالارى ومىرگە كەلگەن, ءاربىر قازاقستاندىق تاعدىرىن بايلانىستىرعان التىن زەرلى ارۋ الماتى جانعا جايلى قالا عانا ەمەس, ءبىر كورگەن جاننىڭ جۇرەگىنىڭ تورىنەن ورىن الاتىن قاسيەتتى مەكەن. الەمگە ايگىلى, ءدامى ءتىل ۇيىرەر ءتاتتى الماسىنا ارنايى قۇرمەت كورسەتىپ, اتىن يەلەنىپ, اپورتىمەن الەمگە تانىلعان شۇعىلالى شاھار جىل سايىن مەنشىكتى مەرەكەسىنىڭ شەڭبەرىنە بىرنەشە ماڭىزدى شارالاردى لايىقتى توپتاستىرا الادى.
كوركىنە كورىك قوسىپ, گۇلدەنە تۇسكەن الماتىنىڭ تابىستى قالاعا اينالۋى جولىندا اتسالىسىپ كەلە جاتقانى ءۇشىن الماتى قالاسىنىڭ اكىمى باقىتجان ساعىنتاەۆ العىس ايتىپ, شاھار جۇرتىن قالا كۇنىمەن قۇتتىقتادى.
«جىل وتكەن سايىن دامىپ كەلە جاتقان مەگاپوليس بيزنەس باستامالار ءۇشىن كەلەشەگى مول ينۆەستيتسيالىق الاڭ بولىپ قالا بەرەدى. بولجامعا سەنسەك, الداعى جيىرما جىلدا الماتى حالقىنىڭ سانى 3 000 000-عا جەتەتىنى جورامالدانىپ وتىر.
الماتى بۇدان دا ادەمى, قاۋىپسىز, ەكولوگيالىق تازا, ءومىر سۇرۋگە قولايلى قالا بولعانىن ءبارىمىز دە قالايمىز. الەمدەگى ءومىر ءسۇرۋ ساپاسى جوعارى قالالاردىڭ بىرىنە اينالۋى ءۇشىن ەلباسى تاپسىرماسىنا سايكەس, ءبىز بيىل مەگاپوليستىڭ تاريحىنداعى ەڭ ءىرى جوبا – قالالىق ورتانى جاڭارتۋ وزگەرىسىن قولعا الدىق. الماتى – جاستىقتىڭ, تالانتتاردىڭ, سۇلۋلىقتىڭ, مەيىرىمنىڭ قالاسى. ارماننىڭ ورىندالاتىن جەرى دە – الماتى. سوندىقتان الماتىنىڭ بولاشاعى زور. مۇنىڭ بارلىعى تۇرعىنداردىڭ بەرەكە-بىرلىگى مەن تابىستى تىرلىگىنىڭ, سەنىم مەن قولداۋدىڭ ارقاسىندا دەپ بىلەمىن» دەدى قالا اكىمى ءوز سوزىندە.
Almafest-ءتىڭ كوڭىل تولقىتار ساتتەرىنىڭ ءبىرى – الماتى قالاسىنىڭ دامۋى ءۇشىن ەرەكشە ەڭبەگى ءسىڭىپ, سان ءتۇرلى سالادا جەتىستىككە جەتكەن بىرەگەي تۇلعالاردىڭ «الماتى قالاسىنىڭ قۇرمەتتى ازاماتى» اتاعىمەن ماراپاتتالۋى. بۇل مارتەبەلى اتاق بۇرىن تەك ءۇش ادامعا عانا بەرىلىپ كەلسە, قالا اكىمى مەن ءماسليحات شەشىمىنە سايكەس شىعارىلعان بيىلعى جىلدىڭ جاڭالىعى, ءبىرىنشى رەت جەتى بىردەي ازاماتقا تابىستالدى.
سونىمەن, «الماتى قالاسىنىڭ قۇرمەتتى ازاماتى» اتاعى قازاقستاننىڭ حالىق ءارتىسى, مەملەكەتتىك «الماتىنىڭ جاس بالەتى» كلاسسيكالىق بي ءانسابلىنىڭ نەگىزىن قالاعان ايگىلى بالەت ءبيشىسى, حورەوگراف بولات ايۋحانوۆقا, الماتى قالاسىنىڭ دامۋىنا ايىرىقشا ەڭبەك سىڭىرگەن Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەككە, قازاقستاننىڭ ەڭبەك سىڭىرگەن قايراتكەرى, دارىگەر ءمۇسىلىم دايىربەكوۆكە, ۇلتتىق عىلىم اكادەمياسىنىڭ اكادەميگى امانجول قوشانوۆقا, بەلگىلى جازۋشى, مەملەكەتتىك سىيلىقتىڭ لاۋرەاتى ءابدىجامىل نۇرپەيىسوۆكە, بەلگىلى اقىن, مەملەكەتتىك سىيلىقتىڭ لاۋرەاتى ولجاس سۇلەيمەنوۆكە جانە 75 جىل ءومىرىن تەاتر مەن كينوعا ارناپ, 300-دەن اسا ءرول ويناعان قازاقستاننىڭ حالىق ءارتىسى يۋري پومەرانتسەۆكە بەرىلدى.
«بۇل مارتەبەلى اتاقتى بۇرىن دا الۋىما بولاتىن ەدى. بىراق «ەشتەن كەش جاقسى» دەگەن, بىردە ماسكەۋدەن ءىسساپاردان ورالسام, مەنىڭ اتىما حات كەلىپتى. حاتتى سول كەزدەگى پاۆلودار وبلىسىنىڭ اكىمى باقىتجان ساعىنتاەۆ جولداعان ەكەن. حاتتا اكىم مەنىڭ جاس كۇنىمدە جازعان شىعارمالارىمنان باستاپ, باسپادان شىققان ءاربىر جاڭا كىتابىمدى قاداعالاپ ءجۇرىپ وقيتىن وقىرمانىم ەكەنىن بايانداپتى. سوندىقتان بۇل قۇرمەتتى اتاقتى كەش بولسا دا, مەنىڭ شىعارماشىلىعىمدى جوعارى باعالاپ, ارنايىلاپ حات جازىپ, كوڭىلىمدى وسىرگەن بايىرعى وقىرمانىم باقىتجان ساعىنتاەۆتىڭ قولىنان العانىما قۋانىشتىمىن» دەدى قارت قالامگەر ءابدىجامىل نۇرپەيىسوۆ.
سونداي-اق بيىل العاش رەت الماتى قالاسىنىڭ اكىمى ب.ساعىنتاەۆتىڭ شەشىمىمەن تاعايىندالىپ وتىرعان «ەڭبەگى ءۇشىن» توسبەلگىسىن قالانىڭ وركەندەۋى جولىندا ەڭبەك ءسىڭىرىپ كەلە جاتقان بىرقاتار ازاماتتار يەلەندى. ولاردىڭ اراسىندا «تۇران» مەملەكەتتىك ۋنيۆەرسيتەتىنىڭ رەكتورى راحمان الشانوۆ, فيلوسوفيا, ساياساتتانۋ جانە ءدىنتانۋ ينستيتۋتىنىڭ ديرەكتورى اقان بيجانوۆ, الماتى قالاسى ارداگەرلەر ۇيىمىنىڭ توراعاسى, اكادەميك ەرەنعايىپ شايحۋتدينوۆ, مەديتسينا عىلىمدارىنىڭ دوكتورى, پروفەسسور مىرزاكارىم الشىنباەۆ, الماتى قالاسى تىلدەردى دامىتۋ جانە لاتىن گرافيكاسىنا كوشۋ ورتالىعىنىڭ باسشىسى مىندەتىن اتقارۋشى ماماي احەتوۆ, الماتى قالاسى مەنەدجمەنت جانە سەرۆيس كوللەدجىنىڭ ديرەكتورى روزا باداەۆا جانە تاعى باسقا ەل ءومىرى ءۇشىن يگىلىكتى سالالاردا وزىق ىسىمەن كورىنگەن دارالار ماراپاتتالدى.
قالا كۇنى مەرەكەسى اياسىندا اشىق اسپان استىندا ءارتۇرلى شارالار قاتار ۇيىمداستىرىلىپ, «Alma Art», «Alma Bazar», «Alma Master», «Alma Auen», Alma Drive» الاڭدارى جۇمىس ىستەدى. مەرەكەدە المانىڭ جيىرمادان استام ءتۇرى تومەندەتىلگەن باعامەن ساتىلىمعا شىعارىلدى. قالالىقتار مەن قالا قوناقتارى پرەزيدەنت ساياباعىنىڭ ورتالىق الاڭىندا «مۋزارت», «جىگىتتەر» توبى, نۇرلان ابدۋللين, كەنتال, باسقا دا بەلگىلى ەسترادا انشىلەرىنىڭ, بي ۇجىمدارىنىڭ اۋقىمدى كونتسەرتتىك باعدارلاماسىن تاماشالادى.
الماتى
