بۇگىنگى تاڭدا الەۋمەتتىك ماسەلەلەر كوپشىلىكتى قاتتى تولعاندىرۋدا. ەل پرەزيدەنتى قاسىم-جومارت توقاەۆتىڭ حالىققا ارناعان جولداۋىنان كەيىن قانداي جاڭالىق بار ەكەن, الەۋمەتتىك جاعىنان از قامتىلعان وتباسىلارعا جەڭىلدىكتەر بار ما, كىمدەردىڭ نەسيەسى كەشىرىلەدى دەگەن سانداعان ساۋالدىڭ تۋى زاڭدى. سوندىقتان دا كوپتەگەن ادامداردىڭ وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ سايتىنا توپىرلاپ كىرىپ جاتاتىنى بار. تاياۋدا ءبىز دە كىردىك. ءبىز تۇسىنبەيتىن جاي بىردەن باستالدى. «قۇرمەتتى كىرىپ-شىعۋشىلار!» دەپ جازىلعان ەكەن. كىرگەنىمىز سول ەدى مىنا جازۋدى وقىعان سوڭ تەزىرەك شىعىپ كەتكىمىز كەلگەنى. اجەم جارىقتىق, «كورشى ءۇيدىڭ حال-جاعدايىن ءبىلىپ كىرىپ-شىعۋىم كەرەك ەدى» دەپ وتىراتىن. سويتسەك, بۇل «دوروگيە پوسەتيتەلي!» دەگەننىڭ اۋدارماسى ەكەن عوي. ءبىر عاجابى بۇل جازبا باسقارما باسشىسى دينا احمەتجانوۆانىڭ اتىنان بەرىلگەن باستى بەتتە تايعا تاڭبا باسقانداي ەتىپ جازىلىپ تۇر.
بۇل سايتتىڭ اماندىعىن بىلگەن سوڭ باسقا قىرۋار مەكەمەلەردىڭ سايتىنا «كىرىپ-شىقتىق». كوپشىلىگىندە «قازاق ءتىلى» دەگەن ءسوز «كاز» دەپ قىسقارتىلىپ الىنعان. ەندى قايتسىن تورتكۇل دۇنيە تەگىس ۇنەمدەۋگە كوشكەندە, «قازاق» دەگەن بەس ارىپتەن تۇراتىن ءسوزدىڭ ەكى ءارپىن جازباي ىقشامداعان تۇرلەرى. بىراق «ق»-نى «ك» دەپ جازعان. وزگەنى ايتاسىز, ءدال وسىنداي قاتەلىك وبلىستىق ءبىلىم باسقارماسىنىڭ سايتىندا دا كەكەشتەنە سويلەپ تۇر. ال «كىرىپ-شىعۋ» تۋرالى كەسىمدى پىكىر ايتساق, انىعىندا بۇل «سايتتى پايدالانۋشىلار» بولسا كەرەك.
مەملەكەتتىك تىلدە ەشبىر دەرەك-دايەگى جوق سايتتاردان كوز سۇرىنەدى. ءبىزدىڭ وڭىردە قازاق ءتىلىنىڭ كىرپىگى عانا قيمىلداپ جاتىر. سايتتاعى سوراقىلىق مىناۋ! ال جينالىس اتاۋلى اۋەلى قازاق تىلىندە باستالىپ, ءبىر-ەكى اۋىز ءسوز ايتقان سوڭ جەرگىلىكتى جۇرتقا وسى دا جارايدى دەگەندەي, ورداڭداعان ورىسشاعا كوشەدى. بۇعان ەتىمىز ابدەن ۇيرەنگەن. قازىر تازا قازاقشا سويلەيتىن ادام كورسەك, جاتىرقاپ تۇراتىن جاعدايعا جەتتىك. وبلىستىق دەنە شىنىقتىرۋ جانە سپورت باسقارماسىنىڭ سايتىن اشىپ جىبەرسەڭىز, «قۇرمەتتى حانىمدار مەن مىرزالار!» دەپ باستالادى. جانىڭا جىلى تيەتىن وسى ءسوزدى وقىعاندا اينالىپ كەتەيىندەر-اي دەپ جىلاپ جىبەرگىڭ كەلەدى. بىراق ءارى قاراي ساۋاتسىزدىقتىڭ سامساپ تۇرعانىن كورگەندە, جىگەرىڭ قۇم بولىپ, سىلەڭ قاتادى. وقي المايسىڭ. وقىعانمەن, تۇسىنە المايسىڭ.
قالاي بولعان كۇندە دە يلەگەنىمىز ءبىر تەرىنىڭ پۇشپاعى – ەل يگىلىگى جولىنداعى ەڭبەك بولعان سوڭ مەملەكەتتىك تىلگە دەگەن قۇرمەت ەستەن شىقپاۋى كەرەك. ويتكەنى ول ۇلتتىڭ تۇعىرى مەن رۋحى ەمەس پە؟!
