بۇگىندە ولاردىڭ ەرەن ەڭبەگى مەن ەرلىگى جوعارى باعالانىپ وتىر. پرەزيدەنت ق.توقاەۆ Twitter-دەگى پاراقشاسىندا «تۇركىستانداعى قوناقۇيدە بولعان ورتتەن زارداپ شەككەن ءىىم قىزمەتكەرلەرىنىڭ تەز ساۋىعىپ كەتۋىن تىلەيمىن. ولاردىڭ ەرەن ەڭبەكتەرى مەملەكەتتىك ناگرادالارعا لايىق», دەپ جازدى.
الدىن الا بەرىلگەن مالىمەتتەرگە سۇيەنسەك, تۇركىستان قالاسىندا ورنالاسقان «Royal Grand» قوناقۇيىندە ورىن العان ءورت گاز تسيستەرناسىن تولتىرۋ كەزىندە شىققان. گاز تاسيتىن كولىك جۇرگىزۋشىسى ءارى وپەراتور تالعات زۇلفايداروۆتىڭ ايتۋىنشا, قوناقۇيدىڭ تسيستەرناسى ايىنا ءبىر رەت گازبەن تولتىرىلادى. كىنارات ءوزى مەن كولىگىندە ەمەس, قوناقۇي قىزمەتكەرىنەن بولعانىن ايتقان كولىك جۇرگىزۋشىسىنىڭ پايىمداۋىنشا, گاز جينالىپ قالىپ, اسحاناعا جەتكەن. جارىلىس سالدارىنان قوناقۇي ماڭىنداعى ۇيلەردىڭ تەرەزەسى قيراپ, شاتىرلارى ۇشقان. ب ۇلىنگەن نىسانداردىڭ ناقتى سانى انىقتالۋدا. اسىرەسە مەيمانحانا ىرگەسىندە ورنالاسقان 150 ورىندىق بالاباقشا قىزمەتكەرلەرى قاتتى شوشىعان. جارىلىس بالالاردىڭ بارلىعى ۇيلەرىنە قايتىپ كەتكەن سوڭ ورىن العان.
شامامەن 1400 شارشى مەتردى شارپىعان ءورت سالدارىنان بارلىعى 11 ادام زارداپ شەككەن, 6 ءورت ءسوندىرۋ قىزمەتكەرى مەديتسينالىق كومەككە جۇگىنگەن. سونداي-اق 3 پوليتسيا قىزمەتكەرى جانە 2 قالا تۇرعىنىنا مەديتسينالىق جاردەم كورسەتىلگەن. ورتالىق قالالىق اۋرۋحاناعا بەس زارداپ شەگۋشى جەتكىزىلگەن. وقيعا ورنىندا ءوز مىندەتتەرىن ءمىنسىز اتقارعان توتەنشە جاعداي دەپارتامەنتى قىزمەتكەرلەرى مەن پوليتسەيلەر جەدەل ارەكەتتەرى ارقىلى قايعىلى جاعدايعا جەتكىزبەدى. وبلىستىق توتەنشە جاعدايلار جونىندەگى دەپارتامەنت باسشىسى, ازاماتتىق قورعاۋ پولكوۆنيگى نۇرعالي ءجۇنىسوۆ ءتىلسىز جاۋدىڭ ورىن الۋىنا گاز تسيستەرناسىنىڭ جارىلۋى سەبەپ بولعانىن مالىمدەدى. ءورتتى سوندىرۋگە تۇركىستان وبلىسى تجد جەكە قۇرامىنان 70 ادام جانە 14 ءورت ءسوندىرۋ تەحنيكاسى جۇمىلدىرىلعان.
ءورت كەزىندە پاترۋلدىك پوليتسيا باتالون كومانديرىنىڭ ورىنباسارى, پوليتسيا مايورى قانات راقىشەۆ پەن تۇركىستان قالالىق توتەنشە جاعدايلار باسقارماسىنىڭ ازاماتتىق قورعاۋ مايورى بولات تۇيمەنوۆ ادام شىعىنىن بولدىرماۋ ءۇشىن بارلىق بولمەلەردى تەكسەرىپ, ءورت شارپىعان عيماراتتان 4 جاسار قىزدى جانە تۇركيانىڭ ەكى ازاماتىن قۇتقارعان. ءورتتى اۋىزدىقتاۋ بارىسىندا تۇركىستان وبلىسى تجق-ءنىڭ 4 قىزمەتكەرى جاراقاتتانىپ, ءتۇرلى دارەجەدەگى كۇيىكتەرىمەن ورتالىق اۋرۋحاناعا جاتقىزىلعان. ولاردىڭ اراسىندا جانساقتاۋ بولىمىندە جاتقان تۇركىستان وبلىسى تجق قب باستىعىنىڭ ورىنباسارى, ازاماتتىق قورعاۋ پودپولكوۆنيگى باقىتجان ابدۋعاپپاروۆ بار. وسى ارادا ايتا كەتەلىك, ب.ابدۋعاپپاروۆ ارىس قالاسىنداعى جارىلىس كەزىندە دە ءمىنسىز قىزمەتىمەن تۇرعىنداردىڭ العىسىنا بولەنگەن بولاتىن. سول كەزدەگى ەرلىگى مەن ەڭبەگى جوعارى باعالانعان ازاماتتىق قورعاۋ پودپولكوۆنيگى «ەرلىگى ءۇشىن» مەدالىمەن ماراپاتتالدى. كەشەگى ءتىلسىز جاۋمەن كۇرەستە دە ب.ابدۋعاپپاروۆ الدىڭعى شەپتەن تابىلدى.
وزگەلەردىڭ قاۋىپسىزدىگىن ءبىرىنشى كەزەككە قويعان ازاماتتاردىڭ جاعدايىن بىلۋگە ىشكى ىستەر ءمينيسترى ەرلان تۇرعىمباەۆ پەن دەنساۋلىق ساقتاۋ ءمينيسترى ەلجان ءبىرتانوۆ تۇركىستان قالالىق اۋرۋحاناسىنا باردى. مينيسترلەر اۋرۋحانادا كۇيىك شالىپ جاتقان توتەنشە جاعداي قىزمەتكەرلەرىنىڭ ءحالىن سۇراپ, بارلىق قاجەتتى كومەك كورسەتىلەتىنىن ايتتى. قالالىق ورتالىق اۋرۋحانا باس دارىگەرىنىڭ ورىنباسارى ءامىرحان ساندىباەۆتىڭ ايتۋىنشا, باقىتجان ابدۋعاپپاروۆتىڭ قازىرگى جاعدايى ورتاشا دارەجەدە. «ونى تراۆماتولوگيا بولىمىنە اۋىستىرۋ جوسپارلانۋدا. قالعان ءۇش ءورت ءسوندىرۋشى دە تراۆماتولوگيا بولىمىندە جاتىر. ولاردىڭ ەكەۋىن كۇيىك شالعان, ال بىرەۋىنىڭ بۇعاناسى سىنعان. قازىر ولار قاجەتتى ەم شارالارىن الۋدا. جاعدايلارى ورتاشا دارەجەدە. ومىرلەرىنە ەشقانداي قاۋىپ جوق», دەيدى دارىگەر.
«Royal Grand» قوناقۇيىنە قونىستانعاندار اراسىندا تۇركىستان قالاسىنا عىلىمي كونفەرەنتسياعا كەلگەن شەتەلدىك ازاماتتار دا بار. بۇگىندە ولار ءورت كەزىندە ومىرلەرىن امان الىپ قالعان پوليتسيا قىزمەتكەرلەرىنە العىس ايتۋدا. تۇركيا ازاماتتارى پروفەسسور حاشيم وزۋدوعرۋ مەن ونىڭ ارىپتەسى پروفەسسور نۇريتدين پارىلتىنىڭ ايتۋىنشا, ءورت شىققاندا ولار ءۇشىنشى قاباتتا بولعان. سودان كەيىن وتقا ورانىپ جاتقان تومەنگى قاباتقا قاراي تۇسۋگە جۇرەكسىنىپ تۇرعان ساتتە قوناقۇيدە قالعان ادامداردى ىزدەگەن پوليتسيا قىزمەتكەرى بايقاپ قالادى. ءسويتىپ تۇركىستان وبلىسى پد جپق پاترۋلدىك پوليتسيا باتالونى كومانديرىنىڭ ورىنباسارى, پوليتسيا مايورى قانات راقىشەۆ تۇركيا ازاماتتارىن قاۋىپسىز جەرگە ءدىن امان الىپ شىعادى.
قازىرگى ۋاقىتتا وسى وقيعاعا قاتىستى تۇركىستان قالالىق پوليتسيا باسقارماسىنىڭ تەرگەۋشىلەرى قىلمىستىق كودەكستىڭ 292-بابى ء«ورت قاۋiپسiزدiگi تالاپتارىن بۇزۋ» بويىنشا سوتقا دەيىنگى تەرگەپ-تەكسەرۋ امالدارى جۇرگىزىلۋدە. ساراپتامالار تاعايىندالعان.
تۇركىستان وبلىسى
