فورۋم «ALMA – Apple» قالالىق قوعامدىق باستاماسى اياسىندا وتۋدە. ونىڭ يدەياسى – الما قالاسىنا, الماعا جانە الما اعاشىنا ارنالعان بۇكىل قالالىق ءىس-شارالار مەن جوبالاردى بىرىڭعاي باعدارلاما جانە بىرىڭعاي اقپاراتتىق كەڭىستىك اياسىندا بىرىكتىرۋ.
ء«بىزدىڭ قالامىز ءاردايىم المامەن بايلانىستىرىلىپ كەلدى. فورۋم الماتىنىڭ الما قالاسى رەتىندەگى بۇرىنعى داڭقىن دارىپتەپ, قايتا جانداندىرۋ ماقساتىندا وتكىزىلىپ جاتىر. فورۋمدا ءبىز جۇرتشىلىقتىڭ نازارىن اۋدارىپ قانا قويماي, عىلىم مەن وندىرىسشىلەردى ءبىر كەڭىستىك اياسىندا بىرىكتىرۋدى كوزدەيمىز», دەپ اتاپ ءوتتى اجار جاندوسوۆا.
باستاما اياسىندا الماتىلىقتارعا الما قالانىڭ داڭقىن قايتا جانداندىرۋعا بەلسەندى تۇردە قاتىسۋ ۇسىنىلىپ وتىر.
ء«اربىر ادام ءوز تاراپىنان المانى دارىپتەي الادى. ادامداردا ءارتۇرلى باستامالار پايدا بولىپ جاتىر, ءبىر ادامدار الما باعىن وتىرعىزعىسى كەلسە, كەيبىرەۋلەر المامەن بي وتكىزۋگە دايىن. ءبىز الماتىدا تۇراتىن جانە الماتىعا كەلەتىن ادامدار المانىڭ ءدامىن سەزىنىپ كورسە ەكەن دەيمىز. ياعني المادان جاسالعان تاعامدى دايىندايتىن ءاربىر مەيرامحانانىڭ ورنىن كورسەتەتىن جانە قالا قوناقتارىنا ونىڭ ءدامىن تاتىپ كورۋگە مۇمكىندىك بەرەتىن المالى ورىندار كارتاسىن جاساپ شىعارۋ تۋرالى يدەيا تۋىندادى. نەگىزىندە الما تاۋسىلماس تاقىرىپتاردىڭ ءبىرى ەكەنى ءسوزسىز», دەپ ءبولىستى فورۋم ۇيىمداستىرۋشىسى.
فورۋم اياسىندا عالىمدار, بيزنەسمەندەر, قوعامدىق جانە مادەني قايراتكەرلەر سيۆەرس الماسىنان باستاپ, قازاقستانداعى جانە الەمدەگى الما شارۋاشىلىعىنىڭ دامۋ بەتالىسى سىندى كەڭ ماسەلەلەر شەڭبەرى اياسىندا ءسوز سويلەدى. فورۋمعا ۇشتاستىرىلعان كورمەدە قالاعان ادام المانىڭ جەرگىلىكتى سۇرىپتارىنىڭ, سونىڭ ىشىندە اتاقتى اپورتتىڭ ءدامىن تاتىپ كورە الادى. سونداي-اق, ءىس-شارا اياسىندا پلاكاتتار كورمەسى ءوتتى. سونىمەن قاتار, ءىس-شارا قاتىسۋشىلارى الدىندا «الما مانيفەستى» وقىلىپ, ونىڭ اياسىندا فورۋم قاتىسۋشىلارى بۇكىل الەم بويىنشا المانى جانە الما اعاشتارىن ساقتاپ, كەڭىنەن تاراتۋعا ۇندەدى. مانيفەست ماقساتى – جەر بەتىندەگى ءاربىر ادامعا شاققاندا ءبىر-ءبىر جەمىس اعاشىن, ياعني بۇكىل الەم بويىنشا 8 ميلليارد جەمىس اعاشىن وتىرعىزۋعا ۇندەۋ.
الماتى
