قازاقستان • 11 قىركۇيەك، 2019

د.اباەۆ: مينيسترلىك ماسس-مەديانىڭ ساپاسىن ارتتىراتىن كەز كەلگەن باستامانى قولداۋعا دايىن

78 رەتكورسەتىلدى

بۇل تۋرالى اقپارات جانە قوعامدىق دامۋ ءمينيسترى داۋرەن اباەۆ Astana Media Week ءىس-شاراسىنىڭ اشىلۋىندا ايتتى.

مينيستر د. اباەۆ مەدياپتالىقتىڭ نەگىزگى ماقساتى - ەل تۇرعىندارىنىڭ مەدياساۋاتتىلىعىن ارتتىرۋ، مەديامادەنيەتتى قالىپتاستىرۋ ەكەنىنە توقتالدى.

«مەملەكەتتىك مۇددەنى حالىققا جەتكىزىپ، قوعامداعى وزگەرىستەرگە ساي كوزقاراس قالىپتاستىرۋدا مەديا سالاسىنىڭ اتقارار ماڭىزى زور. وسى ورايدا، ەلىمىزدىڭ اقپاراتتىق قۇرالدارى الدىندا ۇلكەن ماقسات-مىندەتتەر تۇر. ول ەلباسى باستاعان، مەملەكەت باسشىسى قولداپ وتىرعان ساياسي-ەكونوميكالىق جانە رۋحاني جاڭعىرۋ جونىندەگى كەشەندى رەفورمالارعا جۇرتشىلىقتى جۇمىلدىرۋ. Astana Media Week ديالوگ الاڭىنداعى نەگىزگى ماقساتتاردىڭ ءبىرى - سىزدەر ءبىر-بىرلەرىڭىزدى تانىپ، پىكىر الماسادى دەگەن نيەت. وسىلايشا، ەلىمىزدىڭ مەديا سالاسىن ءار تاراپتان ەمەس، ورتاق مۇددە اياسىندا دامىتۋ دەگەن تىلەك بار. بۇل اۋقىمدى شارانىڭ كوزدەگەن تاعى ءبىر ماقساتى - ەل تۇرعىندارىنىڭ مەدياساۋاتتىلىعىن ارتتىرۋ، مەديامادەنيەتتى قالىپتاستىرۋ»، دەدى مينيستر.

سونداي-اق ۆەدومستۆو باسشىسى مينيسترلىكتىڭ ماسس-مەديا ساپاسىن ارتتىراتىن كەز كەلگەن باستامانى قولدايتىنىن اتاپ ءوتتى.

«اقپارات جانە قوعامدىق دامۋ مينيسترلىگى ماسس-مەديانىڭ ساپاسىن ارتتىراتىن كەز كەلگەن باستامانى قولداۋعا ارقاشان دايىن. سىزدەردى پانەلدىك سەسسيالارعا بەلسەنە قاتىسۋعا شاقىرىپ، بۇگىنگى جانە الداعى جيىندارعا تابىس تىلەيمىن. ۇيالى تەلەفوننىڭ تەلەديدارمەن جانە باسىلىمدارمەن باسەكەگە تۇسكەنى بارشامىزعا بەلگىلى. بۇل پروتسەستە تەحنولوگيالىق نەمەسە ماركەتينگتىك قانا ەمەس، ەتيكالىق، دەموگرافيالىق جانە الەۋمەتتىك-ساياسي ەرەكشەلىكتەرى دە بار. مويىنداۋ كەرەك، مەملەكەت ۇلكەن جانە يكەمسىز بيۋروكراتيالىق مەحانيزم رەتىندە بۇل وزگەرىستەرگە ءبىز ويلاعانداي جەدەل جاۋاپ بەرە الماي وتىر. سوندىقتان، ءبىز ءۇشىن، مەملەكەتتىك ورگاندار ءۇشىن قازىرگى وزگەرىستەرگە جاۋاپ بەرۋ ءۇشىن سىزدەردىڭ، كاسىبي مامانداردىڭ پىكىرى مەن كوزقاراسى وتە ماڭىزدى»، - دەدى داۋرەن اباەۆ.

سوڭعى جاڭالىقتار

ۇقساس جاڭالىقتار