بايقاۋعا قاتىسۋ ءۇشىن 32 ەلدەن 140 ءوتىنىم بەرىلدى. حالىقارالىق بايقاۋ ەكى كەزەڭنەن تۇرادى: ىرىكتەۋ تۋرى بيىلعى جىلدىڭ ناۋرىز ايىندا بۋداپەشتە باستالىپ, 30 شىلدەدە اياقتالدى. بۇل كەزەڭ قاتىسۋشىلاردىڭ ونەرى مەن كاسىبي تۇيىندەمەسىن نەگىزگە الدى. ال الماتىدا باستالعان حالىقارالىق بايقاۋدا سول ىرىكتەۋدەن وتكەن قازاقستان, فينليانديا, اۆستريا, رەسەي, سولتۇستىك كورەيا, اقش, جاپونيا, پورتۋگاليا, قىتاي, يتاليا, يسپانيا, وزبەكستان, فرانتسيا, سينگاپۋر ەلدەرىنىڭ ديريجەرلەرى باق سىنايدى. اپتاعا جۋىق ۋاقىت سىنعا تۇسەتىن ۇمىتكەر مۋزىكانتتاردىڭ ونەرىن يتاليادان كەلگەن ۆيتتوريو پاريزي, دجۋزەپپە اكۆاۆيۆا, ۆەنگريالىق ديورد رات, بولگاريادان شاقىرىلعان ديان چوبانوۆ, قازاقستاندىق سەريك سىرلىباەۆ سەكىلدى الەمدىك تانىمالدىلىققا يە ساڭلاق ديريجەرلەر ساراپقا سالادى. ەۋروپانىڭ بۇگىنگى تاڭداعى ەڭ بەلگىلى ديريجەرلەرىن قۇرامىنا توپتاستىرعان بايقاۋ قازىلارىنىڭ توراعاسى – قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى الان بورىباەۆ.
سيمفونيالىق وركەستردىڭ سۇيەمەلدەۋىمەن ونەر جارىستىراتىن ديريجەرلەر سىنى ءتورت كەزەڭنەن تۇرادى. بايقاۋدىڭ ءبىرىنشى تۋرىنا 56 قاتىسۋشى جىبەرىلدى. ەكىنشى تۋرعا 16 قاتىسۋشى جىبەرىلەدى. ال بايقاۋدىڭ جارتىلاي مارەسىنە 8 قاتىسۋشى جىبەرىلسە, اقتىق مارە سىنىندا 4 قاتىسۋشى عانا توپ جارۋى كەرەك. بايقاۋ جەڭىمپازدارى 15 قىركۇيەكتەگى گالا-كونتسەرتتە ونەر كورسەتەدى.
الماتى
