ايماقتار • 10 قىركۇيەك، 2019

سۇمبىلەنىڭ «سالقىنى»

29 رەتكورسەتىلدى

كۇزگى اۋا رايى اقمولالىق ديقاندار ءۇشىن تىم قولايسىز بولىپ تۇر. كوكشەتاۋ مەن قورعالجىننىڭ اسپانىن قورعاسىن بۇلت قاپتاعالى ون كۇنگە جۋىق.

ەگىن القاپتارى سۇمبىلەنىڭ سۋىنان ابدەن ەزىلىپ، ءدان ورماق تۇگىلى، قارعا ادىم جەر اتتاۋدىڭ ءوزى مۇڭ بولىپ قالدى. قاپتاي جاۋعان جاۋىن قاپتاعان قيىندىقتاردى الا كەلدى. بيىل وبلىس ديقاندارى 4 384 000 گەكتار القاپقا ءداندى داقىلدار سىڭىرگەن بولاتىن. وبلىستىق اۋىل شارۋاشىلىعى باسقارماسىنىڭ مالىمەتىنە قاراعاندا، ازىرگە 960 مىڭ گەكتار القاپتىڭ استىعى عانا جينالعان. گەكتار بەرەكەسى 10،5 تسەنتنەردەن اينالۋدا. سينوپتيكتەر قىركۇيەك ايىندا كۇن جىلى ءارى اشىق بولادى دەگەن بولجام ايتقان بولاتىن. ول ءۇمىت اقتالمادى. ەندى سارسەنبىدەن كەيىن ءساتى تۇسەدى دەپ ۇمىتتەندىرىپ وتىر. ەل ىشىندە ەگىنگە الاڭداۋشىلىق باسىم.

وبلىستاعى ەڭ كوپ ەگىستىك القابى جارقايىڭ اۋدانىندا. بۇل اۋداندا كۇنى بۇگىنگە دەيىن 97،8 مىڭ گەكتار القاپتىڭ ەگىنى جينالىپ، 84،1 مىڭ توننا استىق باستىرىلدى. اۋداننىڭ اگروونەركاسىپ كەشەنىندە اۋىل شارۋاشىلىعىن جۇرگىزۋدىڭ قازىرگى زامانعى جۇيەسى قۇرىلعان. بيىل اۋدان ديقاندارى 635،9 مىڭ گەكتار القاپتىڭ استىعىن جيناپ الۋدى جوسپارلاعانىمەن، ازىرگە سۇمبىلەنىڭ جاڭبىرى مۇمكىندىك بەرەتىن ەمەس. مەملەكەت تاراپىنان ديقاندارعا ءتاپ-ءتاۋىر كومەك كورسەتىلدى. ونىڭ ىشىندە تۇقىم شارۋاشىلىقتارىنا 13،7 ميلليون تەڭگە سۋبسيديا تولەندى. تەك گەربيتسيد بويىنشا سۋبسيديا تولەۋدە بىرقاتار قيىندىق تۋىنداپ وتىر. قازىر اۋداندا ارپا اۋپىرىمدەپ جينالۋدا. شىعىمى كوڭىل كونشىتەرلىك ەمەس، بار بولعانى 8،6 تسەنتنەردەن اينالۋدا. جاۋاپتى كەزەڭدە كۇن-ءتۇن دەمەي جۇمىلدىرىلاتىن 940 استىق كومباينى قاڭتارىلىپ تۇر.

ديقانداردىڭ ايتۋىنا قاراعاندا، بيىلعى استىقتىڭ شامادان تىس ىلعالدى بولۋى كوپ قيىندىق تۋدىرماق. اسىرەسە، شاعىن شارۋاشىلىقتاردىڭ شىعىنى شاش ەتەكتەن. ويتكەنى، استىق قابىلداۋ كاسىپورىندارى ءونىمدى كەپتىرۋ ءۇشىن قىرۋار قارجى سۇرايدى. ال، ىلعالدى ءداندى ساقتاۋ دا قيىن. جاتىپ قالسا، ءشىرىپ كەتەدى.

سۇمبىلە باستالعالى ون كۇن بويى وبلىس ديقاندارى قاڭتارىلىپ تۇر. ەندىگى ارادا استىق كەپتىرەتىن قۇرىلعىلاردى كوبەيتۋ كەرەك. ونسىز از عانا استىقتىڭ ءوزىن ساقتاي الماي قالۋىمىز ابدەن مۇمكىن. 

 

اقمولا وبلىسى

سوڭعى جاڭالىقتار

ەگەمەندىكتەر ەلگە شىقتى

قازاقستان • بۇگىن، 11:19

ەلوردا ورتالىعىندا اۆتوكولىك ورتەندى

قازاقستان • 15 قاراشا، 2019

ءباسپاسوز ءرولى – باستى ماسەلە

ادەبيەت • 15 قاراشا، 2019

قازاقستانعا شەتەلدىك بانكتەر كەلەدى

ەكونوميكا • 15 قاراشا، 2019

قوستاناي فيلارمونياسىنا 75 جىل تولدى

رۋحانيات • 15 قاراشا، 2019

ۇقساس جاڭالىقتار