كوپتەن بەرى كورىنىس بەرمەگەن قىزىقتى شارانى وبلىستىق ىشكى ساياسات باسقارماسى ۇيىمداستىردى. بايقاۋدىڭ شىمىلدىعىن وبلىس اكىمىنىڭ ورىنباسارى اينا ءمىسىرالىموۆا اشىپ, تەرمەشىلەرگە ساتتىلىك تىلەدى.
– قانى قازاق, جانى قازاق ادامنىڭ تەرمە تىڭداماۋى مۇمكىن ەمەس, سوندىقتان قازاقستاندىقتاردىڭ تىلدىك مادەنيەتىن جەتىلدىرۋگە باعىتتالعان وسىنداي شارالار ارقىلى تاعىلىمعا تولى تاربيە بەرەتىن تەرمە جانرىن وڭىرىمىزدە دامىتىپ, جاس تەرمەشىلەردى ناسيحاتتاماقپىز, – دەدى اينا ءمىسىرالىموۆا.
وبلىستىق بايقاۋعا 15 پەن 35 جاس ارالىعىنداعى 14 ونەرپاز قاتىستى. ۇمىتكەرلەر 2019 جىل جاستار جىلى دەپ جاريالانۋىنا جانە سۇگىر جىراۋ بەگەندىك ۇلىنىڭ 125 جىلدىق مەرەيتويىنا وراي تاقىرىپتىق باعىتتاعى شىعارمالاردى ورىندادى.
استراحان اۋدانىنان كەلگەن حانات زاماناي 13-14 جاسىنان تەرمە مەن ءداستۇرلى ءان ونەرىنە جاقىن بولىپ وسكەن ەكەن. ونەرىنىڭ ءورىسىن ايقىن بايقاتتى.
– جىلدان-جىلعا ءبىزدىڭ وسى ۇلتتىق ونەرگە دەگەن قۇلشىنىسىمىز ارتىپ كەلەدى. قازىر ءىس-شارالار كوپ ۇيىمداستىرىلۋدا. تەرمە ونەرىنىڭ دە جانداناتىنىنا بەك سەنىمدىمىز,– دەيدى حانات زاماناي.
بايقاۋ سوڭىندا قاتىسۋشىلار العىس حاتپەن جانە ەسكەرتكىش سىيلىقتارمەن ماراپاتتالدى. كوكشەتاۋ قالاسىنىڭ نامىسىن قورعاعان تاڭنۇر ءالبوسىن ءبىرىنشى ورىندى يەلەنىپ, قىزىلوردا قالاسىندا وتەتىن رەسپۋبليكالىق بايقاۋعا جولداما الدى. ەكىنشى ورىن تسەلينوگراد اۋدانىنىڭ وكىلى داۋرەن ىسقاققا بۇيىرسا, ءۇشىنشى ورىندى ازامات قايىروۆ ەسىمدى اقكول اۋدانىنىڭ تۋماسى قاناعات تۇتتى.
كوكشەتاۋ
