جاياۋ جۇرگىنشىلەر جولى, بالالار الاڭقايى مەن جارىقتاندىرۋ. بۇل – باۋم توعايىنىڭ باستى پروبلەمالارى. ءدال وسى ولقىلىقتار جاقىن كۇندەرى شەشىمىن تاپپاق. ءتىپتى, ساياباق ايماعىنىڭ سىزباسى دا دايىن. اۋدان بيلىگى قالپىنا كەلتىرۋ جوباسىن, جان-جانۋارلارعا زيان تيگىزبەي جۇزەگە اسىرماق.
سونداي-اق, باقىتجان ساعىنتاەۆ ەكىنشى گاز تاراتۋ ستانساسىنىڭ جۇمىسىمەن تانىستى. تۇرعىندار وسى ۋاقىتقا دەيىن گازدىڭ يسىنە تۇنشىعىپ جاتىرمىز دەپ شاعىمدانعان بولاتىن. قالا اكىمى تەز ارادا ستانسا جۇمىسىن جولعا قويىپ اتالعان ولقىلىقتىڭ ورنىن تولتىرۋدى تاپسىردى. تيىسىنشە, «قازترانسگازايماق» گاز تازارتاتىن قوسىمشا سۇزگى ورناتىپتى. سونىمەن قاتار, گرس-2 قۋاتىن الماتىدان تىس جەرگە كوشىرۋ جانە ستانسانى گاز تاراتۋ پۋنكتىنە اينالدىرۋ دا جوسپارلانۋدا.
اتالعان باستامانى جۇزەگە اسىرۋ بارىسىندا 3750 ءۇيدى گازبەن قامتاماسىز ەتۋگە مۇمكىندىك بەرەدى.
ودان وزگە باقىتجان ساعىنتاەۆ اينابۇلاق ماڭىنداعى سايدا ورنالاسقان جەكەمەنشىك ۇيلەرگە دە نازار اۋداردى. ونداعى قۇرىلىس زاڭ تالاپتارىنا جاۋاپ بەرمەيدى. قالا اكىمى اتالعان پروبلەمانى ءوز باقىلاۋىنا الاتىنىن جەتكىزدى. ودان كەيىن, اكىم ۇلكەن الماتى ارناسىن دا ارالاپ, نىساندى كۇردەلى جوندەۋدەن وتكىزۋ قاجەت دەگەن تاپسىرما جۇكتەدى.
كەلەر جىلدىڭ مامىر ايىنان باستاپ وعان سۋ جىبەرىلمەك.
الماتى
