ن. نىعماتۋلين الدىمەن ەكى كۇن بۇرىن مەملەكەت باسشىسى قاسىم-جومارت كەمەل ۇلى توقاەۆتىڭ كەزەكتى سەسسيانى اشىپ, پارلامەنت قابىرعاسىندا ءوزىنىڭ تۇڭعىش جولداۋىن جاريالاعانىنا نازار اۋداردى. پالاتا سپيكەرى:
- مەملەكەت باسشىسى قاسىم-جومارت كەمەل ۇلى توقاەۆ ءوز جولداۋىندا ەلباسىمىز نۇرسۇلتان ءابىش ۇلى نازارباەۆتىڭ ساياساتىن جالعاستىرا وتىرىپ, قازاقستانىمىزدى ودان ءارى دامىتۋدىڭ نەگىزگى ماقساتتارىن بەلگىلەپ بەردى. ولاردىڭ بارلىعىن زاڭ جاعىنان قولداۋ ءۇشىن دەپۋتاتتىق كورپۋستىڭ الدىندا دا جاۋاپتى مىندەتتەر تۇر. سول ءۇشىن سەسسيا بارىسىندا, ءبىز, ءوز ۋاقىتىندا, حالىققا قاجەتتى, ساپالى زاڭدار قابىلدايتىن بولامىز,-دەدى.
وسى جاۋاپتى مىندەتتى ابىرويمەن اتقارۋ ءۇشىن بۇگىننەن باستاپ بەلسەنە ىسكە كىرىسۋ قاجەتتىگىن ەسكە سالعان ءماجىلىس توراعاسى اسىرەسە, ەكونوميكانى جاڭعىرتۋعا الەۋمەتتىك احۋالدى كۇشەيتۋگە, بيۋدجەت جانە سالىق جۇيەسىن جەتىلدىرۋگە, ازاماتتاردىڭ قۇقىقتارى مەن بوستاندىقتارىن قورعاۋعا, شاعىن جانە ورتا بيزنەستى قولداۋعا, ەكولوگيالىق ماسەلەلەرگە باسقا دا سۇراقتارعا ەرەكشە كوڭىل بولىنەتىنىن اتاپ ءوتتى.
ودان ءارى دەپۋتاتتار نازارىنا ارمەنيامەن ازاماتتىق قورعانىس, توتەنشە جاعدايلاردىڭ الدىن الۋ جانە ولاردى جويۋ سالاسىنداعى ىنتىماقتاستىق تۋرالى ۇكىمەتارالىق كەلىسىمدى راتيفيكاتسيالاۋ تۋرالى زاڭ جوباسى ۇسىنىلدى.
2018 جىلعى 12 قىركۇيەكتە الماتىدا جاسالعان بۇل كەلىسىم ازاماتتىق قورعانىس, توتەنشە جاعدايلاردىڭ الدىن الۋ جانە ولاردى جويۋ سالاسىندا قازاقستان مەن ارمەنيا ۇكىمەتتەرىنىڭ قۇزىرەتتى ورگاندارى ىنتىماقتاستىعىنىڭ قۇقىقتىق نەگىزدەرىن بەلگىلەۋگە باعىتتالعان.
سونىمەن قاتار, وسى كۇنى بىرقاتار ماڭىزدى قۇجاتتار جۇمىسقا الىندى. ولاردىڭ قاتارىندا «استانا» حالىقارالىق قارجى ورتالىعى تۋرالى» كونستيتۋتسيالىق زاڭعا تۇزەتۋلەر ەنگىزۋگە قاتىستى كونستيتۋتسيالىق زاڭ جوباسى, ۇلتتىق قوردان 2020 – 2022 جىلدارعا ارنالعان كەپىلدەندىرىلگەن ترانسفەرت تۋرالى, رەسپۋبليكالىق جانە وبلىستىق بيۋدجەتتەر, رەسپۋبليكالىق ماڭىزى بار قالالار, استانا بيۋدجەتتەرى اراسىنداعى 2020 – 2022 جىلدارعا ارنالعان جالپى سيپاتتاعى ترانسفەرتتەردىڭ كولەمى تۋرالى, 2020 – 2022 جىلدارعا ارنالعان رەسپۋبليكالىق بيۋدجەت تۋرالى زاڭ جوبالارى بار.
سونداي-اق «پەداگوگ مارتەبەسى تۋرالى» جانە وعان ىلەسپە زاڭ جوباسى, ەڭبەك, تۋريستىك قىزمەت ماسەلەلەرىنە قاتىستى تۇزەتۋلەرگە ارنالعان زاڭ جوبالارى بويىنشا جانە قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل ماسەلەلەرى بويىنشا تۇزەتۋلەرگە قاتىستى قورىتىندى ازىرلەۋ مەرزىمى بەلگىلەندى.
وسى كۇنى دەپۋتاتتار بىرقاتار راتيفيكاتسيالىق زاڭ جوبالارىن دا جۇمىسقا الدى. اتاپ ايتساق, ولار: برازيليامەن قىلمىستىق ىستەر بويىنشا ءوزارا قۇقىقتىق كومەك تۋرالى, موڭعوليامەن سوتتالعان ادامداردى بەرۋ تۋرالى شارتتاردى, وزبەكستانمەن زاڭسىز كوشى-قونعا قارسى كۇرەستەگى ىنتىماقتاستىق تۋرالى, تۇركيامەن اسكەري ىنتىماقتاستىق تۋرالى كەلىسىمدەردى راتيفيكاتسيالاۋ تۋرالى, سونداي-اق شانحاي ىنتىماقتاستىق ۇيىمىنىڭ ەكسترەميزمگە قارسى ءىس-قيمىل جونىندەگى كونۆەنتسياسىن, 2014 جىلعى 29 مامىرداعى ەەو شارتقا قىرعىز رەسپۋبليكاسىنىڭ قوسىلۋىنا بايلانىستى قىرعىز رەسپۋبليكاسىنىڭ 2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتتى, ەۋرازيالىق ەكونوميكالىق وداقتىڭ قۇقىعىنا كىرەتىن جەكەلەگەن حالىقارالىق شارتتاردى جانە ەۋرازيالىق ەكونوميكالىق وداق ورگاندارىنىڭ اكتىلەرىن قولدانۋى جونىندەگى جاعدايلار مەن وتپەلى ەرەجەلەر تۋرالى 2015 جىلعى 8 مامىردا قول قويىلعان حاتتاماعا وزگەرىس ەنگىزۋ تۋرالى حاتتامانى راتيفيكاتسيالاۋ تۋرالى, رەسەيمەن «بايقوڭىر» كەشەنىن جالعا بەرۋ شارتىنا وزگەرىس ەنگىزۋ تۋرالى ۇكىمەتارالىق حاتتامانى جانە «بايقوڭىر» كەشەنىن گازبەن جابدىقتاۋ تۋرالى كەلىسىمدى, ارمەنيامەن ازاماتتىق قورعانىس, توتەنشە جاعدايلاردىڭ الدىن الۋ جانە ولاردى جويۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى زاڭ جوبالارى.
جالپى وتىرىستا ءماجىلىس دەپۋتاتتارى باقتيار ماكەننىڭ, گۇلنار يكسانوۆانىڭ وكىلەتتىگىن مەرزىمىنەن بۇرىن توقتاتۋ تۋرالى قاۋلى قابىلدانىپ, پارتيالىق تىزىممەن «نۇر وتان» پارتياسىنىڭ اتىنان جاڭادان سايلانعان دەپۋتاتتار گۇلشارا ابدىقالىقوۆانىڭ, نۇرجان اشىمبەتوۆتىڭ جانە جۇلدىز وماربەكوۆانىڭ انت بەرۋ ءراسىمى ءوتتى.
ايتا كەتەيىك, گۇلشارا ابدىقالىقوۆا ءماجىلىس توراعاسىنىڭ ۇسىنىسىمەن الەۋمەتتىك - مادەني دامۋ كوميتەتىنىڭ ءتورايىمى بولىپ سايلاندى.
ال, نۇرجان اشىمبەتوۆ اگرارلىق ماسەلەلەر كوميتەتىنىڭ, جۇلدىز وماربەكوۆا زاڭناما جانە سوت - قۇقىقتىق رەفورما كوميتەتىنىڭ قۇرامىنا سايلاندى.
