بىلتىر «مەكتەپكە جول» اكتسياسى كەزىندە ەلىمىز بويىنشا 328 766 وقۋشىعا 2 ملرد 822 ملن 846 مىڭ تەڭگەنىڭ كومەگى جاسالعان. بۇل كومەك مەكتەپ فورماسى, وقۋ قۇرالدارى تۇرىندە, سونىمەن قاتار قارجىلاي دا بەرىلىپتى. بيىلدان باستاپ اكتسيانىڭ جىل بويى جالعاساتىنىن ەسكەرسەك, جينالاتىن قارجى كولەمى بۇدان دا وسە ءتۇسۋى مۇمكىن ءارى قامتىلاتىن وقۋشىلار سانى دا ارتۋى عاجاپ ەمەس. شىلدەدەن بەرى قايىرىمدىلىق جاساۋ ءۇشىن جىلجىمالى پۋنكتتەر قۇرىلىپ, ءموبيلدى توپتار جۇمىس ىستەۋدە. وقۋ جىلى باستالار تۇستا اكتسيا تىپتەن قارقىن العان جايى بار.
جاقىندا «Samruk-Kazyna Trust» الەۋمەتتىك جوبالاردى دامىتۋ قورى از قامتىلعان جانە كوپ بالالى وتباسىلار, جەتىم بالالار مەن اتا-اناسىنىڭ قامقورلىعىنسىز قالعان بالالار اراسىنان 3 مىڭنان استام وقۋشىنى مەكتەپكە دايىندادى. ءسويتىپ قور وسىنشا وقۋشىعا سومكەلەر مەن كەڭسە تاۋارلارىن ساتىپ الۋعا كومەك كورسەتتى. مۇقتاج وقۋشىلار ءتىزىمىن قورعا نۇر-سۇلتان قالاسىنىڭ اكىمدىگى ۇسىندى. قور وقۋشىلارعا قاجەت قۇرال-جابدىقتاردى ساباق باستالعانعا دەيىن ۇلەستىرىپ بەردى. قور قايىرىمدىلىق شاراسىنىڭ العاشقى كەزەڭىندە «جاس شۋاق» بالالار لاگەرىنىڭ 360 دەمالۋشىسىنا مەكتەپكە قاجەت زاتتار بەرگەن ەدى. بۇل لاگەر 1 شىلدەدەن 9 تامىزعا دەيىن از قامتاماسىز ەتىلگەن جانە كوپ بالالى وتباسىلارىنىڭ بالالارى, اتا-اناسىنىڭ قامقورلىعىنسىز قالعان بالالار ءۇشىن ۇيىمداستىرىلعان بولاتىن. جيىنعا قاتىسقان نۇر-سۇلتان قالاسى ءبىلىم باسقارماسىنىڭ باستىعى ءانۋار جانعوزين قالادا قايىرىمدىلىق شارالارى جالعاسىپ جاتقانىن ايتا كەلە, جالپىعا مىندەتتى ءبىلىم بەرۋ قورى شەڭبەرىندە بىلتىر 1700-دەي بالاعا كومەك كورسەتىلسە, بيىل ارنايى كومەك الاتىن وقۋشىلار سانى 11 مىڭنان اسقانىن تىلگە تيەك ەتتى. «بۇل تىزىمگە كىرمەگەن وقۋشىلار «مەكتەپكە جول» اكتسياسى بويىنشا دەمەۋشىلەردىڭ قولداۋىمەن كەرەك-جاراقتارمەن قامتاماسىز ەتىلەدى. جاڭا وقۋ جىلىندا 14 مىڭنان اسا شاكىرتكە بەلگىلى ءبىر تاراپتاردان وسىنداي كومەك بەرىلەدى», دەدى باسقارما باسشىسى.
