سونىمەن قاتار, نۇرسۇلتان نازارباەۆقا وسى ۋاقىتقا دەيىن وتكىزىلگەن جانە جىل سوڭىنا دەيىن جوسپارلانعان اۋقىمدى جاتتىعۋلار تۋرالى اقپارات بەرىلدى.
كەزدەسۋدە باسشىلىق لاۋازىمداردىڭ سانىن قىسقارتۋ جانە باسقارۋ قۇرىلىمىن وڭتايلاندىرۋ بويىنشا جۇمىس ناتيجەلەرىنە ەرەكشە نازار اۋدارىلدى.
قازاقستاننىڭ تۇڭعىش پرەزيدەنتى كەلەسى جىلى ەلوردادا ۇلى وتان سوعىسىنداعى جەڭىستىڭ 75 جىلدىعى جانە وتان قورعاۋشى كۇنىنە ارالاعان اسكەري پارادتىڭ ساپالى وتكىزىلۋىن قامتاماسىز ەتۋدى تاپسىردى.
سونداي-اق, نۇرسۇلتان نازارباەۆ وتاندىق قورعانىس ونەركاسىبىنىڭ قورعانىس مينيسترلىگىنىڭ مۇددەسىنە ساي ساپالى جۇمىسىن قامتاماسىز ەتۋدىڭ ماڭىزدىلىعىن اتاپ ءوتتى.
ءوز كەزەگىندە نۇرلان ەرمەكباەۆ قازاقستان ارمياسىنىڭ قۇرىلىس جانە دامۋ باعدارلامالارىنىڭ ورىندالۋى تۋرالى باياندادى. قورعانىس ءمينيسترىنىڭ اقپاراتى بويىنشا قازىرگى ۋاقىتتا اسكەري تەحنيكانىڭ زاماناۋي ۇلگىلەرى جانە جۇيەلەرىمەن جابدىقتاۋ جالعاسۋدا, قارۋلى كۇشتەردى جان-جاقتى قامتاماسىز ەتۋ جۇيەسى جەتىلدىرىلۋدە, وق-دارىلەردى قاۋىپسىز ساقتاۋ بويىنشا شارالار قابىلدانۋدا.
