جيىندا الەمدىك جانە جەرگىلىكتى ەكونوميكالىق كورسەتكىشتەردەگى ايەلدەردىڭ ءرولى تۋرالى پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا ءتورايىمى گۇلشارا ابدىقالىقوۆا بايانداما جاسادى. گ.ابدىقالىقوۆا دۇنيەجۇزىلىك بانكتىڭ مالىمەتى بويىنشا, ايەلدەردىڭ الەۋەتىن تولىق پايدالانباۋ سالدارىنان الەم جىلىنا 30 ترلن اقش دوللارى شاماسىندا قارجىدان قاعىلىپ وتىرعانىن نازارعا الىپ, پروگرەسسيۆتى قوعام ايەلدەردىڭ ساياساتتا, ەكونوميكادا جانە الەۋمەتتىك سالادا ماڭىزدى ءرول اتقارۋىنا مۇددەلى ەكەنىن ايتتى.
– ايەلدەردىڭ مۇمكىندىك اياسىن كەڭەيتۋ ءۇشىن پرەزيدەنت جارلىعىمەن قازاقستان رەسپۋبليكاسىنداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسى بەكىتىلدى, – دەدى گ.ابدىقالىقوۆا.
ۇكپ تورالقا توراعاسى تيمۋر قۇلىباەۆتىڭ كونگرەسس دەلەگاتتارىنا جەتكىزىلگەن ۇندەۋىندە بەس جىل ىشىندە كەڭەس بارلىق وڭىرلەر بويىنشا ىسكەر ايەلدەردىڭ الەۋەتىن شوعىرلاندىرۋعا قول جەتكىزگەنى ايتىلدى.
– قازاقستان حالىق بانكى جانە ونىڭ جەتەكشىسى ءۇمىت شاياحمەتوۆا ايەلدەر كاسىپكەرلىگىن جىلدىق 5-7%-بەن جەڭىلدىكپەن نەسيەلەۋ بويىنشا ءبىرىنشى بولىپ باستاما كوتەردى. وسى شاراعا 3 ملرد تەڭگە ءبولىنىپ, 340-تان استام بيزنەس-جوبا جۇزەگە استى. ەكىنشى دەڭگەيلى بانكتەر مەن ميكروقارجى ۇيىمدارى قىزمەتتەرىندە ارنايى مەحانيزم ازىرلەۋ ماڭىزدى. بۇل شارا بيزنەس-يدەيانى جۇزەگە اسىرۋعا قارجى ءبولۋ ءۇشىن كەرەك, – دەدى ت.ق ۇلىباەۆ.
«اتامەكەن» ۇكپ ىسكەر ايەلدەر كەڭەسىنىڭ ءتورايىمى ءلاززات رامازانوۆانىڭ ايتۋىنشا, سوڭعى 5 جىلدا كەڭەس مۇشەلەرى 1500 ءىس-شارا وتكىزىپ, وعان 10 000-نان استام ايەل قاتىستى. بىلتىر ىسكەر ايەلدەر كەڭەسىنىڭ IV كونگرەسى شەڭبەرىندە وڭىرلىك كەڭەستەردىڭ جەتەكشىلەرى ايەلدەر كاسىپكەرلىگىن قولداۋ قورىن قۇردى. قور قۇرۋ بارلىق كاسىپكەرلەرگە ورتاق – ميكروقارجى مەحانيزمى ارقىلى قارجىلاندىرۋ ماسەلەسىن شەشەدى. «قازاقستان حالىق بانكى» اق-پەن ءتيىستى مەموراندۋمعا قول قويىلدى جانە كاسىپكەر ايەلدەردى جەڭىلدىكپەن نەسيەلەۋدىڭ العاشقى باعدارلاماسى ىسكە قوسىلدى. قازاقستاندا العاشقى «ALTYN OIMAQ» كيىم ديزاينەرلەرىنىڭ ۇلتتىق بايقاۋى جانە ەلوردادا جۋىردا وتەتىن جەڭىل ونەركاسىبىنىڭ العاشقى فورۋمىن ۇيىمداستىرۋ – كوپشىلىك تاراپىنان قولداۋ تاۋىپ وتىر.
اۋىلدىق جەرلەردە ايەلدەردى وقىتۋى ماسەلەسى دە وتە ماڭىزدى. «اتامەكەن» بيىل ازيا دامۋ بانكىمەن بىرلەسىپ, قازاقستاننىڭ 8 وڭىرىندە ترەنينگتەر وتكىزگەنىن ايتا كەتۋ كەرەك.
كونگرەسكە شەت مەملەكەتتەردەن دە قادىرلى مەيماندار شاقىرىلىپتى. تۇركيانىڭ كايسەري قالاسىنان كەلگەن كاسىپكەرلىك وداقتىڭ ءتورايىمى يلجۋ تۋگباحان باۋىرلاس ەلدە ايەلدەرگە جاڭا تەحنولوگيالاردى يگەرۋگە, سونىمەن قاتار ەكونوميكالىق ساۋاتىن جەتىلدىرۋگە قانداي كومەك جاسالاتىنى تۋرالى ايتتى. قازىرگى تاڭدا وداق قۇرامىندا 7 مىڭ تۇرىك ايەلى – ءوز سالاسىنىڭ ۇزدىكتەرى, كاسىپكەرلىك سالاسىنداعى عالىمدار, ازاماتتىق قوعام مۇشەلەرى بار.
– ءبىزدىڭ وداق كاسىپكەر ايەلدەردىڭ ەلىمىزدە ساپا ءارى سان جاعىنان ءوسۋىن قامتاماسىز ەتۋ جانە ولارعا جان-جاقتى قولداۋ كورسەتۋ ساياساتىن ازىرلەۋ ميسسياسىن قولعا الدى. ءبىز ەكونوميكالىق ساياسي جانە الەۋمەتتىك ماسەلەلەرمەن جۇمىس ىستەيمىز. سەرىكتەستەرىمىز بىرلەسىپ ازىرلەپ جاتقان «مەنىڭ اپكەم» جوباسى شەڭبەرىندە 9 300 ايەلدى تسيفرلى ساۋاتتىلىق, اقپاراتتىق قاۋىپسىزدىك, قارجىلىق ساۋات جانە قولدانبالى قارجى بويىنشا وقىتتىق. 2018 جىلى «اتامەكەن» ۇكپ جانە تۇركيانىڭ ىسكەر ايەلدەر كەڭەسى كەزدەسۋ ۇيىمداستىرىپ, بىرلەسكەن ەكونوميكالىق مۇددەلەردى ىلگەرىلەتۋ جونىندە كەلىسىمگە قول قويدى, – دەدى يلجۋ تۋگباحان.
جيىندا بىرىككەن اراب امىرلىكتەرى ىسكەر ايەلدەر كەڭەسىنىڭ پرەزيدەنتى فاريدا ال-اۋادي اراب ايەلدەرى دامۋ جولىندا كوپتەگەن قيىندىقتارعا تاپ بولاتىنىن ايتتى.
– ءبىز اراب ايەلىمەن ءاردايىم ماقتانامىز. ولار بارلىق قيىندىققا قاراماستان, ءتۇرلى كەدەرگىلەردەن ءوتىپ, وزىنە جول تابا ءبىلدى. اراب ايەلى – شەشىم قابىلداۋعا مۇمكىندىگى بولعان كەزدە تابىسقا جەتە الادى. بىزدەگى ىسكەر ايەلدەر قاۋىمىنىڭ 200-دەن استامى الەمدە ايتۋلى جەتىستىككە جەتتى – دەدى فاريدا ال-اۋادي.
كونگرەسس بارىسىندا كاسىپكەرلىك سالادا وزىندىك ورنى قالىپتاسقان نازىك جاندىلار ءوزارا تاجىريبە الماسىپ, الداعى ۋاقىتتا بىرلەسىپ جۇمىستار اتقارۋعا نيەتتى ەكەندەرىن ءبىلدىردى.
