ەل ەسىندە ساقتالعان دەرەكتەردى ەكشەگەندە ءالىپتوماردىڭ قىزىلجار ءوڭىرىنىڭ تۋماسى ەكەندىگى ايتىلادى. بوساعاسىنا بەرەكە بايلانعان, مىڭدى ايداعان جىلقىلى باي بولسا كەرەك-ءتى. جاي عانا مىڭعىرعان مالىنا, كۇپسىگەن بايلىعىنا ماستانعان جان ەمەس, رۋحاني بايلىقتى دا ەسىنەن شىعارماعان زەرەك جان ەكەن. سىپا بويىن عانا ەمەس, رۋحاني جان دۇنيەسىنىڭ دە كىرشىكسىز بولۋىن ارمانداپ وتكەن ءالىپتومار بارىنشا تاقۋا ادام بولعان دەسەدى. مۇسىلماننىڭ ءبىر پارىزىن وتەمەك بولىپ, جانىنا ۇلكەن ۇلىن ەرتىپ قاجىلىق ساپارعا اتتانعان. بىراق بۇل دۇنيەدەگى پەندەنىڭ ويىنا العان وڭدى ءىسى وڭىنان وڭعارىلا بەرگەن بە؟ ۇلى ساپاردىڭ بەسىنشى كۇنى اياق استىنان سىرقاتتانىپ, توپىراق قورعالجىن اۋدانىنىڭ اباي اۋىلى ماڭىنان بۇيىرىپتى.
ەل اعالارى ومىردەن وتكەن ادامنىڭ ءمان-جايىن, ساپارىنىڭ ءمانىسىن بىلگەن سوڭ قۇرمەت كورسەتىپ, ارۋلاپ, جەر بەسىككە تاپسىرعان. ارادا ءبىراز ۋاقىت وتكەن سوڭ ارتتا قالعان ەل-جۇرتى جينالىپ كەلىپ, تاقۋانىڭ باسىنا مازار تۇرعىزادى. مازاردى سالۋ ءۇشىن وسى وڭىردە كوپ كەزدەسەتىن ۇساق تاستاردى پايدالانعان. بەرىك بولسىن دەپ جىلقىنىڭ قىلىن ارالاستىرىپ, وسىمدىك تامىرلارىنىڭ قوسپاسىن قۇيىپ, كىرپىش سوققان. شيكى كىرپىش بولسا دا بۇگىنگىنىڭ وتقا كۇيدىرىلگەنىنەن كەم ەمەس. بالكىم ارتىق. ال سىرى – قۇپيا. سايىن دالانىڭ ازىناي سوققان جەلى مەن ارقانىڭ اق جاۋىنىنا شىداپ ءالى تۇر. ءالى دە تالاي زامان شىدايتىن ءتۇرى بار. ءبىر ەرەكشەلىگى, كۇڭگىرت جانە اشىق ءتۇستى كىرپىش الماستىرىلىپ, كەزەكتەسكەن تارتىپپەن قالاعان. وسى ءتاسىلدىڭ ءوزى وزگەشە رەڭ بەرىپ تۇر.
بۇگىنگى زاماندا ءالىپتومار تاقۋانىڭ جامباسى جەرگە تيگەن جەر ءدىني عيبادات ورنى بولىپ سانالادى. باسىنا كەلىپ ءمىناجات ەتكەن جان بايلىقتىڭ مۇرات ەمەس, جان تازىلىعى مەن ارلى ادالدىقتىڭ ماڭگىلىك سەرىك ەكەندىگىن ۇعىنادى. ەڭسەلى مازار ەل رۋحىنىڭ بيىك ەكەندىگىن مەڭزەپ تۇر.
اقمولا وبلىسى,
قورعالجىن اۋدانى
