قازاقستان • 29 تامىز، 2019

«مەنىڭ وتانىم – قازاقستان» ساباعى

90 رەتكورسەتىلدى

ءبىلىم كۇنى قارساڭىندا مەكتەپ تابالدىرىعىن العاش اتتاعان وقۋشىلارمەن اتا زاڭدى جاس ۇرپاققا ءتۇسىندىرۋ، دارىپتەۋ ماقساتىندا اشىق تاربيە ساعاتى ءوتتى. تۇڭعىش پرەزيدەنت – ەلباسى كىتاپحاناسىنىڭ مۋزەيىندە جىل سايىن وتەتىن ءداستۇرلى ەمەس فورماتتاعى مەرەكەلىك ساباققا بيىل №73 مەكتەپ-ليتسەيىنىڭ 1-سىنىپ وقۋشىلارى تاڭدالعان.

بالالارعا كونستيتۋتسيا، وتان تۋرالى تۇسىنىك قالىپتاستىرۋدى كوزدەيتىن تانىمدىق تاربيە ساعاتىنا بالاقايلار جان-جاقتى دايىندالىپ كەلىپتى. وقۋ-تاربيە پروتسەسى بىرنەشە بولىمنەن تۇردى. «سەن بىلەسىڭ بە؟» دەپ اتالاتىن العاشقى كەزەڭدە مۇعالىم بالالاردان الدا قانداي مەرەكە تويلاناتىنىن سۇرادى. ال بالاقايلار بىرىنەن سوڭ ءبىرى «30 تامىز – كونستيتۋتسيا كۇنى دەپ اتالادى»، «العاشقى قوڭىراۋ سوعىلاتىن 1 قىركۇيەك – ءبىلىم كۇنى كەلە جاتىر»، دەگەن جاۋاپتارىن ايتتى. وسىدان كەيىن پەداگوگ وقۋشىلارعا اتا زاڭنىڭ وزدەرىندەي ادام قۇقىقتارىن قورعايتىن تالاپتار جازىلعان باستى قۇجات ەكەنىن ءتۇسىندىردى. ساباق بارىسىندا بالالارعا وتان جونىندە دە تانىمدىق اقپارات بەرىلىپ، كەزەڭ قورىتىندىسىندا بالدىرعاندار وتان تۋرالى «ول – ءبىزدىڭ جەرىمىز، تۋى­مىز، ءۇيىمىز، دوستارىمىز» دەگەن ويلا­رىن جەتكىزىپ، ساباقتىڭ تاقىرىبىنا ساي جاتتاعان ولەڭ شۋماقتارىن وقىدى. ەكىنشى كەزەڭدە مۇعالىم بالالاردى اتا زاڭىمىزدا جازىلعان قۇقىعىمىزدىڭ ءبىرى رەتىندە تەگىن ءبىلىم الۋدى اتاپ ءوتىپ، مەكتەپ، وقۋ مەن ءىلىم جيناۋعا شاقىرىپ، جالقاۋلىقتان جەرىنۋگە ۇيرەتتى. كەلەسى كەزەڭدە قازاقستاننىڭ مەملەكەتتىك رامىزدەرىنە بايلانىستى نەگىزگى ءارى باستى تۇسىنىكتەر بالا تىلىنە ساي ءتۇسىندىرىلدى.

تاربيە ساعاتىنىڭ سوڭىندا ەلباسى كىتاپحاناسى ديرەكتورىنىڭ ورىنباسارى بوتاگوز قايىپوۆا ۇجىمىنىڭ اتىنان بارشا قازاقستاندىقتى كونستيتۋتسيا كۇنىمەن جانە بارلىق ءبىلىم سالاسىنىڭ قىزمەتكەرلەرىن، سونداي-اق ءبىلىم الۋشىلاردى الداعى مەرەكەمەن قۇتتىقتادى ءارى اشىق ساباققا قاتىسقان وقۋشىلارعا مازمۇندى كىتاپتار مەن مەكتەپكە قاجەتتى قۇرال-جابدىقتاردى تابىستادى.

اشىق تاربيە ساعاتى بولعاندىقتان، شاراعا اتا-انالار دا جينالعان بولاتىن. بالالارىنىڭ العاشقى قادامىنا قولداۋ ءبىلدىرىپ كەلگەن كوپشىلىكتىڭ اتىنان كوپ جاساعان اجە اسىلكۇل بىرىمقۇلقىزى ءسوز الىپ: «بيىل مەنىڭ شوبەرەممەن قاتار بالالار ءبىرىنشى سىنىپقا بارعالى وتىر. ءبىلىم كۇنى قارساڭىندا ولارعا اشىق ساباق وتكىزىپ، دايىندىق جۇرگىزگەن ماماندارعا العىس ايتامىن. اينالايىن، بوبەكتەرىم، العاشقى قادامدارىڭ قۇتتى بولسىن! سەندەرگە تاربيە مەن ءبىلىم بەرىپ وتىرعان اتا-انالارىڭ، ۇستازدارىڭ امان بولسىن! ولاردى قۋانتىپ، كەلەشەكتە ەلدىڭ ماقتانىشى بولۋدى قالاساڭدار، ساباقتى زەيىنمەن وقىپ، ءبىلىم وزاتى بولىڭدار!»، دەپ باتاسىن بەردى.

سوڭعى جاڭالىقتار

ەلدىك نىشاندار تاريحى

قازاقستان • بۇگىن، 18:14

اتىراۋ: ءۇي قاماققا قامالعان قىز

ايماقتار • بۇگىن، 18:00

بيىل اۋىلعا تابيعي گاز جەتەدى

ايماقتار • بۇگىن، 14:29

ۇقساس جاڭالىقتار