وسى ماقساتقا بيۋدجەتتەن 815 ملن تەڭگە بولىنگەن. قازىرگى تاڭدا وقۋلىقتاردىڭ 98 پروتسەنتى مەكتەپتەردىڭ كىتاپحانالارىنا جەتكىزىلدى.
قاراعاندى قالالىق ءبىلىم ءبولىمىنىڭ باسشىسى گۇلسىم قوجاحمەتوۆا 4-ءشى, 9-شى جانە 10-سىنىپ وقۋشىلارى ءۇشىن بيىلعى جىلى جاڭارتىلعان وقۋلىقتاردىڭ تولىق جيىنتىعى ساتىپ الىنعانىن جەتكىزدى.
– قالعان سىنىپتار ءالى ۇيرەنشىكتى باعدارلاما بويىنشا ءجۇرىپ جاتىر, دەگەنمەن ولار ءۇشىن دە وقۋلىقتار ساتىپ الىندى. ءبىرىنشى سىنىپ وقۋشىلارىنا جۇمىس داپتەرلەرى جيىنتىعىن تاراتىپ بەرەمىز. باسقا سىنىپ وقۋشىلارىنا ولاردى ساتىپ الۋدىڭ قاجەتى جوق. ءبىلىم جانە عىلىم ءمينيسترى ايتقانداي, ولاردىڭ تولىققاندى ءبىلىم الۋىنا قاراپايىم داپتەرلەردىڭ ءوزى-اق جەتىپ جاتىر, – دەپ حابارلادى ول.
سونداي-اق, قالالىق ءبىلىم باسشىسى بيىلعى وقۋ جىلىندا وقۋشىلارعا بارلىق وقۋلىقتاردى وزىمەن بىرگە الىپ ءجۇرۋ مىندەتتى ەمەس ەكەنىن اتاپ ءوتتى. ءبىلىم مينيسترلىگى «جەڭىل پورتفەل» جوباسىن ۇسىنعان: وقۋشىلارعا مەكتەپتە قاعاز كىتاپتارىن قالدىرۋعا بولادى, ال ۇيدە ولار ەلەكتروندى كىتاپتاردى پايدالانا الادى. كەرەك بولعان جاعدايدا ۆيرتۋالدى وقۋ قۇرالدارىن ءبىلىم جانە عىلىم مينيسترلىگىنىڭ سايتىنان جۇكتەپ الۋعا بولادى.
قاراعاندى وبلىسى
