«پەداگوگ مارتەبەسى تۋرالى» زاڭ جوباسى قر تۇڭعىش پرەزيدەنتى – ەلباسى ن. ءا. نازارباەۆتىڭ باستاماسى بويىنشا ازىرلەنگەن», — دەدى اسقار مامين.
ازىرلەنگەن زاڭ جوباسى مەملەكەت باسشىسى ق. ك. توقاەۆتىڭ ورتا ءبىلىم بەرۋ جۇيەسىن دامىتۋ جانە ءبىلىم ساپاسىن ارتتىرۋ جونىندەگى العا قويعان مىندەتتەرىنە جاۋاپ بەرەدى.
زاڭ جوباسىن ازىرلەۋدىڭ نەگىزگى يدەياسى — مۇعالىمدەردىڭ جۇكتەمەسىن ازايتۋ, ولاردى وزدەرىنە ءتان ەمەس جۇمىستاردى ورىنداۋدان بوساتۋ ارقىلى ءوزىن-ءوزى دامىتۋعا جانە شىعارماشىلىققا مۇمكىندىك بەرۋ.
بۇعان قوسا, مۇعالىمدەردىڭ جالاقىسىن ارتتىرۋعا, ەڭبەك دەمالىسىن ۇلعايتۋعا, پەداگوگتىك شەبەرلىك, تالىمگەرلىك ءۇشىن قوسىمشا اقى تولەۋگە باعىتتالعان شارالار كوزدەلۋدە. ايتا كەتۋ كەرەك, بۇل زاڭ جوباسى وڭىرلەردىڭ اكىمدەرىنە بيۋدجەت مۇمكىندىگىنە قاراي مۇعالىمدەرگە ماتەريالدىق كومەك كورسەتۋ ماسەلەسىن وزدىگىنەن شەشۋگە مۇمكىندىك بەرەدى.
«مۇعالىمدەردىڭ كاسىبي تۇرعىدان دامۋىنا جانە باسەكەگە قابىلەتتىلىگىن ارتتىرۋعا جاعداي جاساۋ جوسپارلانعان, — دەدى اسقار مامين. — پەداگوگ مارتەبەسىن ارتتىرۋ, ولاردى ىنتالاندىرۋ مىندەتى دە كوزدەلەدى».
ۇكىمەت باسشىسىنىڭ ايتۋىنشا, جالپى زاڭ جوباسىن ىسكە اسىرۋ مۇعالىم ماماندىعىنىڭ مارتەبەسىن ارتتىرۋعا, ولاردىڭ ار-نامىسى مەن قادىر-قاسيەتىن قورعاۋعا, پەداگوگتار ءۇشىن الەۋمەتتىك كەپىلدىكتەر جۇيەسىن جاساۋعا جول اشادى.
ماسەلەنى قاراۋ قورىتىندىسى بويىنشا, قر پرەمەر-ءمينيسترى اسقار مامين وسى جىلدىڭ 1 قىركۇيەگىنە قاراي پارلامەنت ماجىلىسىنە «پەداگوگ مارتەبەسى تۋرالى» جانە «پەداگوگ مارتەبەسى, وقۋشى مەن مۇعالىم جۇكتەمەسىن تومەندەتۋ ماسەلەلەرى جونىندەگى كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىن ەنگىزۋدى قامتاماسىز ەتۋدى تاپسىردى.
