اتىراۋلىق سۋرەتشى ادىلقايىر جانتاسوۆ بيىلعى جازعى دەمالىسىن كيپردىڭ نيكوسيا قالاسىندا وتكىزدى. سول ەلدىڭ اتاقتى بيزنەسمەنى سۋات يرفان گيۋنسەلدىڭ شاقىرۋىمەن تۇركى تىلدەس ەلدەردىڭ سۋرەتشىلەرى وسى شاھارعا جينالعان. قازاقستاننان بارعان ون قىلقالام شەبەرىنىڭ اراسىندا قر سۋرەتشىلەر وداعىنىڭ مۇشەسى, ن.تىلەنديەۆ اتىنداعى كىشى ونەر اكادەمياسىنىڭ وقىتۋشىسى ادىلقايىر جانتاسوۆ تا بار.
- سۋات يرفان وتكەن جىلى قازىرگى زامانعى ونەر مۋزەيىنىڭ ىرگەتاسىن قالاعان بولاتىن. قازىر قۇرىلىس ءجۇرىپ جاتىر. التى قاباتتى ۇلكەن نىساندا 14 زال بولادى. وعان 20 ميلليونداي سۋرەت جينالۋ كەرەك. وسى ماقساتتا بىرنەشە مەملەكەتتەردىڭ سۋرەتشىلەرى باس قوسىپ, ەڭبەك ەتتىك. ءبىزدىڭ بارلىق جاعدايىمىز جاسالدى,-دەيدى ءا.جانتاسوۆ.
مۋزەيگە اتىراۋلىق سۋرەتشىنىڭ ءۇش تۋىندىسى تاڭدالىپ الىنعان. ونىڭ ءبىرى – «كوكپار». ء«تورتىنشى كۇنى شەبەرحانامىزعا سۋات بي كەلدى. جۇمىسىما ۇزاق قاراپ تۇردى, «ناعىز مۋزەيدىڭ تورىندە تۇراتىن تۋىندى ەكەن», -دەدى. «بۇل كارتينانىڭ تاقىرىبى-كوكپار»,-دەپ ەدىم, ء«تۇسىندىم» دەپ باسىن يزەدى. ودان بولەك «باقتالاس» پەن «تولاعايدى» تاڭداپ الدى. «تولاعايدى» 2013 جىلى سالعانمىن, الدىن الا سۋرەتىن جىبەرىپ ەدىم. مۋزەيگە الاتىنىن ايتتى. ءبىر قىزىعى, وسى كارتيناداعى تاۋ كورىنىسى كيپردەگى «بەشبارماق» تاۋىن ەسكە تۇسىرەدى. ونى اتالعان تاۋدى ءوز كوزىممەن كورگەندە اڭعارىپ, تاڭ قالدىم», - دەيدى سۋرەتشى.
شىعارماشىلىق يەلەرىندە بولاشاقتى تۋىندىلارى ارقىلى بولجاۋ بولىپ تۇرادى. قيالى ۇشقىر سۋرەتشى ادىلقايىر دا وسىنداي وقيعالار ءجيى كەزدەسەتىنىن ايتادى. بىرنەشە جىل بۇرىن قاعازعا تۇسىرگەن تۋىندىلارىنداعى بەينەلەرمەن جەرورتا تەڭىزىنىڭ جاعالاۋىندا «كەزدەسىپ» قايتقان قىلقالام شەبەرىنىڭ قازىر ناعىز شابىتتى شاعى. «الداعى جىلى دا كيپرگە شاقىرتۋ الدىم. وعان دەيىن دايىندالىپ, ويىمدا جۇرگەن دۇنيەلەردى رەتتەۋىم كەرەك. كەلەر جازدا كيپردە جەكە شىعارماشىلىق كورمەم وتەدى», - دەپ قۋانىشتى جاڭالىعىمەن ءبولىستى.
جەردىڭ ءبىر بۇرىشىنداعى ونەر ورداسىندا قازاقتىڭ «كوكپارى», قازاق سۋرەتشىسىنىڭ قولتاڭباسى تۇرعانى قانداي جاقسى!
اتىراۋ
