قازداۋىستى قازىبەك بي دۇنيەدەن وتەر الدىندا وسى تايكەلتىر بيگە وسيەت ايتىپ, ءوزىن تۇركىستانداعى قوجا احمەت ياساۋي كەسەنەسىنە اپارىپ جەرلەۋىن تاپسىرادى. مەزگىل قىس ايى بولعاندىقتان جول جۇرۋگە قالىڭ قار كەدەرگى جاساپ قازىبەك ءبيدىڭ مۇردەسىن اق جاۋىپ ارۋلاپ امانات ايتىپ, قىس بويى سورە تاستا ساقتاپ, كوكتەم شىعا تۇركىستانداعى قوجا احمەت ياساۋي كەسەنەسىنە اپارىپ جەرلەپتى.
بالا كەزىمدە مەنى اكەم مارقۇم سەڭكىبايداعى قازىبەك ءبيدىڭ سورە تاسىن كورسەتۋگە تالاي رەت اپارعانى ەسىمدە. سورە تاس بەس بولىكتەن تۇراتىن. اسىرەسە, جەرگە ايقىش-ۇيقىش كولبەۋلەتە قادالعان ءتورت قادا تاستىڭ ۇستىنە قويىلعان تاس تابىت ەرەكشە ەدى. شەبەردىڭ قولىنان قاشالعان تاس تابىتتىڭ اعاشتان جونىپ شىعارىلعانداي ەتىپ اسا ۇقىپتى جاسالعانى تاڭداي قاقتىرارلىقتاي. يت-قۇس ءبيدىڭ مۇردەسىنە زاقىم كەلتىرمەۋى ءۇشىن مۇردەنى جەردەن ەداۋىر بيىكتە ساقتاعاندارى كورىنىپ تۇر. سودان بەرى قانشاما جىلدار ءوتتى دەسەڭىزشى.
كەڭەس وكىمەتىنىڭ تىڭ جەر مەن تىڭايعان جەرلەردى يگەرەمىز دەپ ءار رەسپۋبليكادان قازاقستانعا ءتۇرلى ۇلت وكىلىن اكەلىپ توككەندەرى كۇنى كەشەگىدەي. ۇشى-قيىرى كورىنبەيتىن ۇلان-عايىر يەن دالامەن قوسا مۇنداعى تاۋ-تاستى دا جوسپارعا قوسقاندارىن قايتەرسىڭ. سول جوسپاردى ورىنداۋ ءۇشىن اۋىلدىڭ ىرگەسىنە دەيىن جىرتىلىپ, مال جايىلاتىن جايىلىمنىڭ ءوزى تارىلا باستاعانى ەسىمىزدە. ناتيجەسىندە جەر بەتىنەن قانشاما كونە قورعاندار, ەسكەرتكىشتەر جويىلىپ كەتتى. ەسكەلدىدەگى ءماشھۇر ءجۇسىپ كوپەي ۇلىنىڭ زيراتىنا حالىقتى بارعىزباس ءۇشىن وكىمەت ادامدارى ونى بۇزعىزىپ, جەرمەن جەكسەن ەتكىزدى. وسى تۇستا اۋىل ادامدارى سەڭكىبايداعى قازىبەك ءبيدىڭ سورە تاسىن امان ساقتاپ قالۋ ءۇشىن جاڭساق اقپار تاراتىپ, ونداعى تاس تابىتتى الماتىدان كەلگەن عالىمدار زەرتتەۋگە الىپ كەتتى دەپ تىعىپ تاستاعاندارىن سەزەتىنمىن. مەن سول تاس تابىتتى 20 جىل بويى ىزدەپ تاۋ-تاس, ورمان-توعايدى شارلاۋدان جالىقپادىم. شىنىن ايتقاندا بۇل جۇمىس مايانىڭ ىشىنەن ينە ىزدەگەنمەن بىردەي ەدى. ايتسە دە ءۇمىتىمدى ۇزبەي باستاعان ءىستى اياعىنا دەيىن جەتكىزۋگە تىرىسىپ باقتىم. قۇدايدىڭ ءبىر ءساتتى كۇنى ويلاماعان جەردەن كيەلى تاس تابىلدى!
سەنەر-سەنبەسىمدى بىلمەي ءبىراز ەسەڭگىرەپ تۇرىپ قالدىم. قۇددى قازىبەك بي دۇنيەگە قايتا كەلگەندەي اسەر جان دۇنيەمدى تەبىرەنتتى. ءبىر كەرەمەتى بالەن عاسىرلىق تاريحى بار تاس تابىتتىڭ سول باياعى مەن كورگەن قالپىندا ساقتالعانىنا قايرانمىن!..
مۇحامەت-قايىر ءشارىپوۆ
پاۆلودار وبلىسى,
باياناۋىل اۋدانى
