دەنساۋلىق ساقتاۋ ءمينيسترىنىڭ ورىنباسارى ءلاززات اقتاەۆانىڭ ايتۋىنا قاراعاندا, بۇل شەشىم پرەزيدەنت قاسىم-جومارت توقاەۆتىڭ سايلاۋالدى تۇعىرناماسىندا ايتىلعان: ء«دارى-دارمەك ساپاسىن باقىلاۋدى كۇشەيتۋ جانە بولشەك ساۋداداعى ونىڭ باعاسىن رەتتەۋ تۋرالى» تالابىن ىسكە اسىرۋ شارالارىنىڭ شەڭبەرىندە قابىلدانعان.
پرەزيدەنتتىڭ ءدارى-دارمەك ساپاسىن قاداعالاۋدى كۇشەيتۋ كەرەك دەگەن تالابىن رەتسەپسىز ساتۋعا تىيىم سالۋ ارقىلى ورىنداۋدىڭ قانداي ءجونى بار ەكەنىن تۇسىنە المادىق. مينيستر ساپانى تەكسەرتكىسى كەلسە بىرنەشە پرەپاراتتار الىپ, ارنايى زەرتحانالاردا تەكسەرتپەي مە؟ ەگەر ءبىر ءدارى-دارمەكتىڭ قۇرامى تۇيىندەمەسىندە كورسەتىلگەن ساپاعا ۇيلەسپەيتىن بولسا, وندايدى ساتۋعا تىيىم سالۋعا بولادى. ال ەندى ءدارىنىڭ ساپاسىن انىقتاۋ مەن ونى رەتسەپتپەن ساتۋدىڭ قانداي بايلانىسى بار؟
رەتسەپكە قۇنتتىلىعى جوق كىسىلەر وزىنە اسا قاجەتتى پرەپاراتتارعا العان رۇقسات قاعازىن دا قالتاسىنا سالىپ جۇرە قويمايدى. ال اۋىل ادامدارىنا ونى جازىپ بەرە قوياتىن دارىگەر دە قولعا تۇسپەيدى. ءتىپتى قالالى جەرلەردە دە بىرنەشە جىلدان بەرى قولدانىپ جۇرگەن دارىڭە رەتسەپت الا قويۋ وڭاي ەمەس. جاقىنداپ كەتسەڭ بولدى, قازىر ەمحانالار ابدەن تەكسەرمەي ەشقانداي رەتسەپت جازبايدى. رەتسەپت الۋدىڭ وسىنداي قيىنشىلىقتارى بار.
ءدارىنى رەتسەپسىز بەرۋگە تىيىم سالۋدىڭ جالپى حالىققا تيگىزەتىن زيانىن باسىمىزدان وتكىزىپ وتىرعان جاننىڭ ءبىرىمىز. بىرنەشە جىلدان بەرى ءتۇرلى سەبەپپەن قان قىسىمىم اياق استىنان كوتەرىلىپ كەتەدى. وندايدا كاپتوپريل دەگەن حالىق اراسىندا «جەدەل جاردەم» اتالىپ كەتكەن ءبىر پرەپاراتتى اۋزىما سالا قوياتىنمىن. اينالايىن, اينالاسى 15-20 مينۋتتا قىسىمدى قالپىنا كەلتىرەدى. وسى ۋاقىتقا دەيىن ونى بارلىق ءدارىحانالار ەمىن-ەركىن ساتا بەرەتىن. ءتىپتى رەتسەپتى قاشان العانىم, قايدا قويعانىم دا ەسىمدە جوق.
وتكەن جولى, ەڭبەك دەمالىسىمدا وبلىس ورتالىعىنان اۋىلعا بارماق بولىپ, جولعا شىققان ەدىم, قان قىسىمىم اياق استىنان كوتەرىلە قالعانى... جولداعى دارىحاناعا كىرىپ الا قويايىن دەسەك... قايداعى... ءمينيستردىڭ بۇيرىعى بار, ءبىز ونى بۇزا المايمىز دەپ ساتپادى. بەتىمىز قىپ-قىزىل بولىپ, ءبىر اللاعا سىيىنىپ اۋدان ورتالىعىنا زورعا جەتتىك. ماقساتىمىز ءدارىنى وسىنداعى ءدارىحانادان الا قويۋ ەدى. ءمينيستردىڭ بۇيرىعى مۇندا ءالى جەتە قويماعان شىعار دەگەن ۇمىتتە ەدىك. بىراق بۇلار دا ساتا المايمىز دەپ شالقاسىنان ءتۇستى. ايتەۋىر, پروۆيزور قۇدايعا قاراعان جان ەكەن, جاعدايدى تۇسىنگەن سوڭ عانا «ەشكىمگە ايتا كورمەڭىز» دەپ جاسىرىپ ساتتى...
وسىنداي جاعداي جالعىز ءبىزدىڭ باسىمىزدا ەمەس شىعار. سوندىقتان ادام وزىنە نە قاجەت ەكەنىن ءبىلىپ تۇرسا, جەدەل كومەك بەرەتىن پرەپاراتتاردى ەركىن ساتۋدى توقتاۋعا بولمايتىنىن مينيسترلىكتىڭ ەسكەرۋى قاجەت دەپ ويلايمىز.
ارينە قۇرامىندا ءتۇرلى زياندى ەلەمەنتتەرى بار, ماس قىلاتىن ەسىرتكى زاتتارى, ەستەن تاندىراتىن كومپونەنتتەرى بار ءدارى-دارمەكتەردى ەركىن ساتۋعا بولمايدى. الايدا, بارلىق ءدارى-دارمەكتى رەتسەپكە بايلاپ تاستاۋ – ادام دەنساۋلىعىن ساقتاۋعا قامقورلىق دەپ ەشكىم ايتا الماس. ءوزىن ءوزى باقىلاۋسىز ەمدەپ, دەنساۋلىعىن قۇرتاتىن ساۋاتسىز ادامدار بىزدە جوق. ءتىپتى دارىگەر جازىپ بەرگەن رەتسەپتەردەگى ءدارى-دارمەكتىڭ ءوزىن ءبىزدىڭ حالقىمىز ساقتىقپەن ىشۋگە ۇيرەنگەن. ويتكەنى ءبىر سىرقاتقا ەم بولاتىن پرەپارات ەكىنشى جاقتان زيان بولىپ جاتاتىنىن جاقسى بىلەدى. ورىستىڭ «گدە لەچيت, گدە كولەچيت» دەگەن ماتەلىن دە كوپشىلىك بىلەدى. سوندىقتان ءبىزدى دەنساۋلىقتارىن قاپيادا جوعالتىپ الۋى مۇمكىن اقىلسىز بالا-شاعا دەپ ويلاماۋ كەرەك.
ال پرەزيدەنتتىڭ تالابىن دۇرىس ءتۇسىنىپ, پرەپاراتتاردىڭ ساپاسىن زەرتحانالارعا سالىپ, تەكسەرۋ, قايسىبىرىنىكى تۇيىندەمەگە سايكەس بولماي جاتسا, ساتۋعا تىيىم سالۋ – مينيسترلىكتىڭ مىندەتى. سونىمەن بىرگە پرەزيدەنت بولشەك ساۋداداعى باعانى رەتتەۋ كەرەكتىگى جونىندە دە تالاپ قويدى. ونى اتقارۋ دا وسى مينيسترلىكتىڭ مىندەتى. جاقىن تۇرعان ەكى دارىحاناداعى ءبىر پرەپاراتتىڭ باعاسى ەكى ءتۇرلى ەكەندىگىن كوزىمىز كورىپ ءجۇر. ءبارى دە ءدارى-دارمەكتى ءبىر جەردەن الادى, الايدا حالىقتىڭ دەنساۋلىعىنىڭ ەسەبىنەن «تەز بايىعىسى» كەلەتىن كەيبىر ءدارىحانالار وعان قوساتىن ءوزىنىڭ تابىسىن اسپانداتىپ قويىپ جاتادى. مىنە, وسىندايلاردى تىزگىندەۋ كەرەك.
