ونەگەسى ءورىستى فەستيۆالدى ەلباسى قورى مەن قورعالجىن ەكولوگيالىق وبسەرۆاتورياسى مەكەمەسى ۇيىمداستىرىپ وتىر. باعدارلاماسى دا كەڭىنەن قامتىلعان. جاستارعا اسا قاجەتتى تاقىرىپتار توڭىرەگىندە ترەنينگتەر, شەبەرلىك كلاسستارى, اكتسيالار, سپورت جارىستارى ۇيىمداستىرىلدى. ماسەلەن, «مەكتەپكە جول» اكتسياسى. ەلباسى قورىنىڭ اتىنان 1500-دەن استام الەۋمەتتىك جاعىنان از قامتىلعان, سونداي-اق كوپبالالى وتباسىلاردىڭ جەتكىنشەكتەرىنە مەكتەپكە قاجەتتى قۇرال-جابدىقتار تابىس ەتىلدى.
ەجەلگى دالا ءتوسىن ەلجىرەتكەن تۇڭعىش شاراعا ءبىر جارىم مىڭعا جۋىق 10 مەن 25 جاس ارالىعىنداعى بالالار مەن جاسوسپىرىمدەر جينالدى. ءجۇز سان قۇس مەكەندەيتىن قورعالجىننىڭ كۇمىس كولدەرى شاتتىقتان تولقىپ جاتقانداي. دالا سىرىن, وتانىمىزدىڭ قايتالانباس دارا سىرىن جاس كوكىرەككە قوتارىپ قۇيىپ بەرگەن حالىقارالىق بايقاۋ-فەستيۆال كەنجەبەك كۇمىسبەكوۆ اتىنداعى قورعالجىن اۋداندىق مادەنيەت ءۇيى كوركەمونەرپاز ۇجىمىنىڭ «قۇس مەكەنى – قورعالجىن» تاقىرىبىنداعى تەاترلاندىرىلعان كورىنىسىمەن اشىلدى. قۇس بازارىندا وتكەن قىزىققا ءبىر قۋانارلىعى, جەرگىلىكتى ونەرپازدار ۇزبەي قاتىستى. توپ جارعاندار دا از ەمەس. ماسەلەن, حارەوگرافيا جانرى بويىنشا ونەر كورسەتكەن «Angels» ۇلگىلى زاماناۋي بي ءانسامبلى ءبىرىنشى ورىندى يەلەنسە, «فلامينگو» حالىقتىق بي ءانسامبلى ەكىنشى ورىندى ەنشىلەدى.
جەڭىمپازداردىڭ گالا كونتسەرتى جاستاردىڭ ويىن-ساۋىق كەشىنە ۇلاستى. كەش قوناقتارى دوس, توعجان مۇراتوۆا جانە «قاراپايىم» توبىنىڭ ونەرىنەن ادەمى اسەر العان اۋدان تۇرعىندارى رۋحاني ازىققا ءبىر كەنەلىپ قالدى.
اقمولا وبلىسى
