ايتا كەتۋ كەرەك, KinderWorld International Group Ltd كومپانياسىنىڭ ءبىلىم بەرۋ كلاستەرى اۋستراليا, ۆەتنام جانە مالايزيادا بالالارعا ساپالى ءبىلىم بەرۋمەن اينالىسىپ كەلەدى. ەندى سينگاپۋرلىقتار قازاقستان نارىعىنا كىرىپ, ەلىمىزدە ءوز ورتالىقتارىن سالماقشى.
ە.ايتاحانوۆ رەسپۋبليكالىق ماڭىزى بار قالا مارتەبەسىن جۋىردا العان شىمكەنت ءۇشىن جاڭا وقۋ ورىندارى اسا ماڭىزدى ەكەنىن ايتىپ, قالانىڭ دامۋىنا زور ۇلەس قوساتىنىنا سەنىم ءبىلدىردى. جاڭا جوبانىڭ قۇنى شامامەن 23-25 ملن اقش دوللارىن قۇرايدى. ونى سۇيەمەلدەۋمەن «Kazakh invest» اق اينالىسپاق. ورتالىقتان اشىلاتىن بالاباقشا 6 ايدان 6 جاسقا دەيىنگى 600 بالاعا لايىقتالعان. وندا جابىق ويىن الاڭى مەن باسسەين بولادى. باقشادا بالالاردى شەت تىلدەرىنە, وقۋ مەن ساناۋعا, قوعامتانۋ, مۋزىكا, بي مەن بەينەلەۋ ونەرىنە ۇيرەتەدى. مۇنان بولەك, 3-تەن 12 جاسقا دەيىنگى بالالارعا ارنالعان بايىتۋ ورتالىعىن اشۋ جوسپارلانۋدا, وندا بالالار عىلىممەن, تەحنولوگيالارمەن, ينجەنەريامەن, ماتەماتيكامەن, روبوتوتەحنيكامەن جانە AR/VR جۇيەسىمەن تانىسادى.
ال حالىقارالىق مەكتەپتە ءداستۇرلى پاندەردەن باسقا باعدارلامالاۋعا, روبوتوتەحنيكاعا جانە 3D باسپاعا ارنالعان فاكۋلتاتيۆتىك ساباقتار وتەدى. سونداي-اق اقش-تا جانە باسقا دا ەلدەردە وقىتاتىن ستۋدەنتتەردىڭ جازعى الماسۋ باعدارلامالارى جۇمىس ىستەيتىن بولادى.
ءبىلىم بەرۋ مەتروپوليسى – بۇل بالالار, جاستار جانە قوعام ءۇشىن ءتۇرلى ءبىلىم بەرۋ ءىس-شارالارىن وتكىزۋ جوسپارلانىپ وتىرعان وقۋ كەڭىستىگى. مەتروپوليستىڭ ديزاينى مەن تۇجىرىمداماسى سينگاپۋردىڭ ۇلتتىق ۋنيۆەرسيتەتىنىڭ قالاشىعىنا ۇقساس بولماق. بولاشاقتا زاماناۋي مەتروپوليس ۋنيۆەرسيتەت, جاتاقحانا, عىلىمي ورتالىق, مەديتسينالىق ورتالىق, ەكسپەريمەنتتىك وقۋ-ويىن ورتالىعى جانە باسقا دا قاجەتتى ينفراقۇرىلىمداردى قامتىعان ءىرى كەشەنگە اينالماق.
شىمكەنت
