ايماقتار • 23 تامىز، 2019

شيەلىدە اقمارجان بىتىك شىقتى

36 رەت كورسەتىلدى

قىزىلوردا وبلىسىنىڭ شيەلى اۋدانىندا كۇرىش وراعى باستالدى. بەستام اۋىلىنداعى «بەستام ەلى» شارۋا قوجالىعىنىڭ القابىندا باستاۋ العان بيىلعى «التىن وراق» مەرەكەسى شيەلىلىك ديقانداردىڭ باسىن قوسىپ قانا قويماي، كورشىلەس جاڭاقورعان اۋدانى ەگىنشىلەرىن دە قامتىدى. اۋا رايى مەن ەگىن ەگۋ تەحنولوگيا­سى ۇقساس ىرگەلەس اۋداندار ءبىر-ءبىرىنىڭ وزىق تاجىريبەلەرىن بولىسە وتىرىپ، ىنتىماقتى جۇمىس ۇيىم­داس­تى­رۋدى جالعاستىرۋى قولداۋعا تۇرارلىق شارۋا. كۇرىش ورۋ ناۋقانىنىڭ باستالۋ شاراسىنا ارنايى قاتىسقان پارلامەنت سەناتىنىڭ دەپۋتاتى بەكمىرزا ەلامانوۆ وسىلاي دەيدى.

كۇرىش وراعىنىڭ باستالۋ راسىمىندە شيەلى اۋدانىنىڭ اكىمى ءاشىم ورازبەك ۇلى بيىلعى اۋىلشارۋاشىلىق جىلىنىڭ ەرەكشەلىگى مەن الا جازداي دالا القابىندا تىنىمسىز ەڭبەك ەتكەن ديقانداردىڭ تولىمدى ەڭبەگىنە لايىقتى باعا بەرە وتىرىپ، جيىن-تەرىمنىڭ ءساتتى ءوتۋىن تىلەدى. اۋدان باسشىسى ءار جىلدىڭ وزىندىك كۇردەلىلىگى بولارىن ايتا كەلە، سول قيىنشىلىقتاردى جەڭۋ­دە ديقاندار قاۋىمىنىڭ قا­جىرلىلىعى مەن بەينەتكەش­تى­گىنە سۇيسىنەتىنىن جەتكىزدى. سونداي-اق جاڭاقورعان اۋدانىنىڭ اكىمى عالىم امىرەەۆ، شيەلى اۋدانى قوعامدىق كەڭەس توراعاسى پەردالى ارحاباەۆتار قۇتتىقتاۋ ءسوز سويلەدى. «بەستام ەلى» شارۋا قوجالىعىنىڭ توراعاسى بالتاش قوشقاروۆ جيىن-تەرىمنىڭ قىسقا مەرزىمدە اياقتالارىنا ۋادە بەرىپ، ارىپتەستەرىنە قىرماندارىنىڭ دوڭدە بولۋىنا تىلەك ايتتى.

بيىل شيەلى اۋدانىنىڭ ەگىن­شىلەرى 12 475 گەكتار كولەمگە بايىرعى داقىل سىر سالىسىن ورنالاستىرسا، مامانداردىڭ بولجامىنشا ونىڭ 70 پايىزدان استامى جوعارى ءونىم بەرۋگە لايىق. سونداي-اق «اقمايا»، «توڭكەرىس-ك»، «بيدايكول» سەكىلدى ىرگەلى شارۋاشىلىقتار مول ءونىم الۋعا ساپالى جۇمىس ۇيىمداستىرا ءبىلدى. مۇنان وزگە جاڭا جانە ەسكى جوڭىشقا كولەمى 9 مىڭ گەكتاردىڭ ۇستىندە. كۇرىش وراعى مەن جوڭىشقا ءشوبىن دايىنداۋ جۇمىستارى قاتار جۇرگىزىلە بەرەتىندىكتەن ءتۇرلى كومبايندار مەن قاجەتتى تەحنيكالاردىڭ ساقاداي ساي بولۋى ەڭبەك ونىمدىلىگىن ارتتىرارى ءسوزسىز. مۇنىڭ الدىن الا جاسالعان جوسپارعا ساي ەكەنىن شارۋاشىلىق توراعالارى مەن اۋداندىق اۋىلشارۋاشىلىق ءبولىمى ماماندارىمەن پىكىرلەسۋ بارىسىندا كوز جەتكىزدىك. تاعى دا ايتار نارسە، باقشا، كوك­ونىس ونىمدەرىن جيناۋ جۇ­مىستارى دا شيەلى اۋدانىندا ۇيىمشىلدىقپەن اتقارىلىپ كەلە جاتقانى. بۇل داقىلدار كولەمى 2 مىڭ گەكتارعا تاياۋ. ياعني، دالا اكادەميگى اتانعان، ەكى مارتە ەڭبەك ەرى ىبىراي اتا جاقاەۆتىڭ ءىزباسار جەرلەستەرى ەگىنشىلىك سالاسىنىڭ ءمانىن ورتايتپاي قىزۋ جۇمىس ۇستىندە ەكەندىگى كوپكە ۇلگى بولارلىق. بۇل تۋرالى بەلگىلى ايتىس اقىندارى كەنجەباي ءجۇسىپوۆ پەن ەرجان ءامىر كەستەلى سوزبەن وي ورنەكتەدى.

كومبايندار كۇرىش القابىندا زىرعي جونەلگەندە مۇنداعى استىقتىڭ بىتىكتىگىنە سۇيسىنگەن ارداگەرلەر اق باتالارىن بەرىپ جاتتى. ال قوجالىق ۇجىمدارى ەگىس وراعىنا قاتىسۋشىلارعا ار­ناپ اق داستارقان جايىپ، قو­ناقتارعا ءدام-تۇزىن ۇسىندى. اۋداندىق مادەنيەت ءبولىمىنىڭ ونەر­پازدارى ءوز ونەرلەرىمەن كەل­گەن مەيمانداردىڭ مەن ەگىنشى­لەر­دىڭ كوڭىلىن سەرپىلتتى.

 

نۇرماحان ەلتاي

 

قىزىلوردا وبلىسى،

شيەلى اۋدانى

 

سوڭعى جاڭالىقتار

الماتى قالاسى «سارى» ايماقتا

كوروناۆيرۋس • بۇگىن، 10:28

ارقالىقتا مىڭ ادام كۇي تارتتى

ايماقتار • بۇگىن، 08:45

كوشباسشى وزگەرگەن جوق

سپورت • بۇگىن، 08:44

قالا كۇنىندەگى بايگە جارىسى

سپورت • بۇگىن، 08:42

يسپانيادا ولجالى بولدى

تەننيس • بۇگىن، 08:40

ورگانيكالىق قالدىقتاردى وڭدەيدى

قازاقستان • بۇگىن، 08:38

جاسىل مەتاللۋرگيا قازىر دە بار

قازاقستان • بۇگىن، 08:37

ۇقساس جاڭالىقتار